Lesa Wakalenga Musankwa a Mwanakashi Bakutaanguna

Yehova wakalima muunda kumusena wiitwa ayi Edeni. Muunda uyo wakalinga kuswite maluba, shisamu, ashinyama. Lyalo wakalenga musankwa wakutaanguna Adamu kuswa kubulongo akumuyoyela muuya upa buumi mumashono. Sa ulishi cakacitika? Musankwa uyo wakaba abuumi! Yehova wakapa Adamu mukuli wakulama muunda, akumulwiita ayi atumbe meena shinyama.

Yehova wakapa Adamu mulawo uyandika abuumbi. Wakamulwiita ayi: ‘Inga walya cisepo ca cisamu cili coonse mumuunda kukushakobo cisepo ca cisamu comwi cilibetele. Na ukalye cisepo kuswa kucisamu ici, ulaakufwa.’

Lyalo paciindi cimwi Yehova wakaamba ayi: ‘Ntoopangila Adamu shikumucafwa.’ Aboobo wakalengesha Adamu koona cakufwa, lyalo Lesa wakakusha lipinga lyomwi kuli Adamu akumupangila mukaakwe. Mukaakwe uyo liina lyakwe wakalinga Efa. Adamu a Efa bakaba mukwashi wakutaanguna. Ino Adamu wakalinyumfwa buyani ndyebakamuletela mukaakwe? Wakakondwa abuumbi, aboobo wakaamba ayi: ‘Amubone muntu Yehova ngwaakapanga kuswa kulipinga lyangu! Cabota abuumbi! Uyu ngomukaangu.’

Yehova wakalwiita Adamu a Efa kuba abaana akususha cishi capanshi. Wakalinga kusuni ayi basebensele pomwi mulusangalalo akubamba cishi coonse kuba paladaiso, na musena ubotu abuumbi, bweenka mbuli muunda wa Edeni. Ano ishi tashikwe kucitika. Ino nceebonshi? Tulaakwiiya shiinji mumutwi utokonkelaawo.