Tabakwe Kucita Ncobakashomesha

Yehova wakalwiita Mose ayi: ‘Tanta kalundu use kuli ndime. Ntolemba milawo yangu pamabwe apampamene lyalo ntookupa.’ Mose wakatanta kalundu akukala pakalundu ako kwa nshiku 40. Lyalo Yehova wakalemba Milawo 10 pamabwe obilo apampamene akupa Mose.

Ndyepakeenda ciindi bene Isilaeli bakatalika kuyeeya ayi Mose wabaloboka. Aboobo bakalwiita Aloni ayi: ‘Tulisuni wakututanjilila. Tupangile lesa!’ Aloni wakabalwiita ayi: ‘Amumpe golodi wanu.’ Wakasungulula golodi akupanga koombe ka golodi. Lyalo bantu bakaamba ayi: ‘Nobene Isilaeli, uyu ngolesa wesu, uyo wakatukusha mucishi ca Ijipiti!’ Aboobo bakatalika kulambila koombe ka golodi, akucita kusekelela. Sa ishi nshobakacita shakalingabo kabotu? Sobwe, mukwiinga bakashomesha ayi balaakunolambila Yehova eenkabo. Sombi tabakwe kucita kweelana ambobakashomesha.

Yehova wakalinga kubona shakalinga kucitika, aboobo wakalwiita Mose ayi: ‘Koya ukabone bantu nshobatoocita. Tabakwe kukonkela nshondakabalwiita, batolambila lesa wakubeca.’ Mose wakaseluka pa kalundu kayumwite mabwe obilo apampamene.

Ndyaakashika pafwiifwi akwakalinga bantu, wakabanyumfwa kabeemba. Lyalo wakababona kabashana akulambila koombe ka golodi. Mose wakakalala abuumbi. Aboobo wakawaala panshi mabwe obilo apampamene lyalo akapwaika. Lyalo peenka apo wakapwayoola koombe ka golodi. Wakeepusha Aloni ayi: ‘Ino bantu aba bakucita buyani, cakwaamba ayi ubaleeke bacite cibiibi ca mushobo wooyu?’ Aloni wakakumbula ayi: ‘Mutankalalili nkambo. Mwebo mulishi bantu aba mbobabete. Bakalinga kusuni lesa, aboobo ndakasungulula golodi wabo akupanga koombe!’ Aloni taakalinga kweelete kucita boobo. Mose wakatanta kalundu alimwi akusenga kuli Yehova kwaamba ayi abalekelele bantu.

Yehova wakabalekelela abo bakalinga kulibambite kumunyumfwila. Sa waboona bene Isilaeli ncobakalinga kuyandikila kukonkela butanjilishi bwakwe Mose?