Tente Yakulambililaamo

Mose ndyaakalinga pa Kalundu ka Sinayi, Yehova wakamulwiita ayi ayake tente ilibetele, yakalinga kwiitwa ayi tente yakulambililaamo. Ku tente iyi, bene Isilaeli nkobakalinga kweelete kulambilila Lesa. Bakalinga kweelete kunokweenda ayo kuli koonse nkobalongela.

Yehova wakaamba ayi: ‘Lwiita bantu kuleta shili shoonse nsheenga bacikonsha kwaamba ayi muyake tente.’ Bene Isilaeli bakapa golodi, silifa, mukuba, mabwe abotu abuumbi, ashakulibotesha sha banakashi. Bakapa a booya bwa mbelele, shisani shibotu, shipaya sha shinyama, ashintu shimwi shiinji. Bakalyaaba kupa shintu shiinji abuumbi cakwaamba ayi Mose wakacita kubalwiita ayi: ‘Mbubo shakwana! Mutaleti ashimwi.’

Basankwa abanakashi baanji bakalinga kucite lushibo bakacafwa mukuyaka tente isalalite. Yehova wakabapa busongo bwakabacafwa kusebensa ncito. Bamwi bakalinga kutunga shisani akushibotesha. Bamwi bakalinga kubamba mabwe, kupanga shintu sha golodi, na shakubesa.

Bantu bakayaka tente kweelana a Yehova mbwaakabalwiita. Bakapanga cisani cibotu abuumbi ncebakabika pakati ka musena Usalalite awooyo Usalalite Kwiindaawo. Mumusena Usalalite Kwiindaawo mwakalinga libokosi lya cipangano, lyakapangwa acisamu ca mulombe agolodi. Mumusena Usalalite mwakalinga cakubikawo malampi ca golodi, tebo, acipaililo cakutentelawo tununkila kabotu pakutenta. Mulubaansa mwakalinga cipaililo cinene alimwi acakubikamo maanshi cakapangwa amukuba. Libokosi lya cipangano lyakalinga kucafwa bene Isilaeli kwiibaluka cipangano cabo ca kunyumfwila Yehova. Sa cipangano ulicishi? Cipangano ncishomesho cilibetele.

Yehova wakasala Aloni abana bakwe basankwa kwaamba ayi banosebensa mbuli bapailishi pa tente isalalite. Bakalinga kweelete kwiilama kabotu akubenga milambu kuli Yehova. Aloni eenkabo ngowakalinga kusuminishikwa kunjila Mumusena Usalalite Kwiindaawo mbuli mupailishi munene. Wakalinga kucita boobo linkanda lyomwi pamwaaka kwaamba ayi abenge mulambu wa shibiibi shakwe, sha mukwashi wakwe, ashibiibi sha bene Isilaeli boonse.

Bene Isilaeli bakamanisha kuyaka tente isalalite pesule lya mwaaka womwi kuswa ciindi ndyebakaswa ku Ijipiti. Aboobo paciindi ici bakaba amusena wakusebensesha pakulambila Yehova.

Yehova wakasusha tente isalalite abulemu bwakwe alimwi wakalengesha likumbi kusa mukwiimikana peculu lya tente. Bene Isilaeli tabakalinga kulongawo na likumbi liliimfwi peculu lya tente. Ano na likumbi lyasena, bakalinga kushiba ayi nciindi ca kulonga. Bakalinga kumwaya tente akukonkela likumbi.