Bakapondokela Yehova

Bene Isilaeli ndyebakalinga muluyanga, Kola, Datani alimwi a Abilamu, abantu bamwi bali 250 bakabukila Mose. Bakaamba ayi: ‘Tatukusuniiwo! Ino ngani wakakubika ayi ube mutanjilishi wesu alakwe Aloni ayi abe mupailishi munene? Soonse tuli bantu bakwe Yehova, kuteshibo ndiwe a Aloni.’ Yehova taakwe kukondwa asheeshi. Mukwiinga wakalinga kubona ayi babukila nguwe!

Mose wakalwiita Kola abaabo bakalinga kulubasu lwakwe ayi: ‘Ciilo amukese ku tente isalalite, mukalete ashakubikawo mulilo shicite tununkila kabotu pakutenta. Yehova alaakututondesha wooyo ngwaakasala.’

Bushiku bwakakonkelaawo, Kola abasankwa bali 250 bakaya mukukumanya Mose ku tente isalalite. Bakatenta tununkila kabotu pakutenta anga abalo mbapailishi. Yehova wakalwiita Mose a Aloni ayi: ‘Amusoonoke Kola abantu bakwe.’

Nabi kwaamba ayi Kola wakalinga waya mukukumanya Mose ku tente, Datani, Abilamu, amikwashi yabo bakakaka kuyaako. Yehova wakalwiita bene Isilaeli kusoonoka ku matente akwe Kola, Datani, a Abilamu. Alimwi bakacita boobo cakufwambaana. Datani a Abilamu, amikwashi yabo bakaya mukwiimikana pansengwe lya matente abo. Ndyaakamanabo kwaamba maswi aya inshi yakacaluka mpobakalinga kwiimfwi akubamina! Lyalo mulilo wakaswa kwiculu akutenta Kola abasankwa bali 250 bakalinga kulubasu lwakwe.

Yehova wakalwiita Mose ayi: ‘Bwesa nkoli kumutanjilili womwi awomwi wa mukowa, akulembaawo liina lyakwe. Sombi pa nkoli ya mukowa wakwe Lefi, ulembewo liina lyakwe Aloni. Ubike nkoli isho mu tente yakulambililaamo, lyalo nkoli ya wooyo ngondasala ilaakusonsa.’

Bushiku bwakakonkelaawo, Mose wakabwesa nkoli shoonse akuya mukutondesha bamatanjilili. Inkoli yakwe Aloni yakasonsa akusapuka maluba, alimwi akucata shisepo shipite shiitwa ayi alimondi! Ubu Yehova mbwaakatondesha patuba ayi wakasala Aloni kuba mupailishi munene.