Yehova Mbwaakasala Joshuwa

Pesule lyakutanjilila bene Isilaeli kwa myaaka iinji, Mose wakalinga pafwiifwi akufwa. Yehova wakamulwiita ayi: ‘Teshi ndiwe weshi ukatanjilile bene Isilaeli kunjila mu Cishi Cakashomeshekwa. Sombi ndaakukutondeshabo cishi ico.’ Lyalo Mose wakasenga Yehova kusala muntu umwi wakutanjilila bene Isilaeli. Yehova wakamulwiita ayi: ‘Uye kuli Joshuwa akumulwiita ayi ngweshi akanootanjilila bene Isilaeli.’

Mose wakalwiita bene Isilaeli ayi atoofwa conoono alimwi ayi Yehova wakasala Joshuwa kutanjilila bene Isilaeli kuya mu Cishi Cakashomeshekwa. Lyalo Mose wakaambila Joshuwa ayi: ‘Utaloondi. Yehova alaakukucafwa.’ Lyalo Mose wakatanta Kalundu ka Nebo apo Yehova mpwakamutondesha cishi ncaakashomesha Abulaamu, Isaki, a Jakobo. Mose wakafwa kaacite myaaka 120.

Yehova wakalwiita Joshuwa ayi: ‘Subuka Mulonga wa Joodani akuya ku Kenani. Ndaakukucafwa bweenka mbondakacafwa Mose. Ulyeelete kushinisha kunobelenga Milawo yangu bushiku abushiku. Utaloondi. Yumabo. Kooya ukacite kweelana ambondakulwiita.’

Joshuwa wakatuma beshikuya mukubona cishi bobilo ku Jeliko. Tulaakwiiya shiinji pa Jeliko mumakani atokonkelaawo. Ndyebakaboola bakamulwiita ayi cilibo kabotu inga benjila mucishi ca Kenani. Bushiku bwakakonkelaawo, Joshuwa wakalwiita bene Isilaeli ayi batalike kulonga. Lyalo wakatuma bapailishi bakalinga kuyumwite libokoshi lya cipangano ayi batanjile kusubuka Mulonga wa Joodani. Paciindi ici mulonga wakalinga kuswite abuumbi. Bapailishi bakalinga kuyumwite libokoshi lya cipangano ndyebakalyatabo mumaanshi, maanshi ayo akacileka kukuunka, lyalo akayuma! Bapailishi bakaya mukwiimikana payumu pakati ka mulonga bene Isilaeli boonse ndyebakalinga kusubuka. Sa utoobona ayi ishi shakabeebalusha shakacitika pa Lweenge Lusalala?

Bene Isilaeli bakashika mu Cishi Cakashomeshekwa pesule lya myaaka iinji. Bakayaka maanda amatauni. Bakacikonsha kulima myuunda akushanga shisepo. Cakalinga cishi mwakalinga kuswite buuci a mukupa.