Laabu Mbwaakasisa Basankwa Bakaya Mukubona Cishi

Bene Isilaeli bakaya mukubona cishi ndyebakashika ku Jeliko, bakaya mukukala kuŋanda ya mwanakashi waliina lya Laabu. Mwaami waku Jeliko wakeshiba, aboobo wakatuma masoja kuya kuŋanda yakwe Laabu. Laabu wakasisa basankwa bakesa mukubona cishi paciluli akulwiita masoja a mwaami kuya kulubasu lumwi. Wakalwiita basankwa bakesa mukubona cishi ayi: ‘Ntoomucafwa mukwiinga ndishi ayi Yehova ali andimwe alimwi ndishi ayi mulaakukoma. Ndasenga amunshomeshe ayi mulaakupulusha mukwashi wangu.’

Basankwa bakesa mukubona cishi bakalwiita Laabu ayi: ‘Taakuwo muntu nabi womwi pa bamuŋanda yako weshi akacaikwe, aboobo ukaange lutambo lusalala paliwindo lya ŋanda yako, lyalo webo amukwashi wako mulaakupuluka.’

Lyalo Laabu wakabakushisha paliwindo basankwa aba kabacatite kulutambo. Bakaya mukuyuba kutulundu kwanshiku shotatwe kabatana kuboolela kuli Joshuwa. Lyalo bene Isilaeli bakasubuka Mulonga wa Joodani akulibambila kukoma tauni ya Jeliko. Jeliko njoyakalinga tauni yakataanguna kukomwa. Yehova wakabalwiita kushinguluka musena uyu linkanda lyomwi pabushiku kwanshiku 6. Pabushiku bwa namba 7 bakashinguluka tauni iyi mankanda 7. Bapailishi bakalisha mapeenga, lyalo masoja akoolobesha abuumbi. Lyalo lubumbu loonse lwa Jeliko lwakawa! Sombi ŋanda yakwe Laabu iyo yakalinga kulubumbu lwa Jeliko taina kuwa. Laabu amukwashi wakwe bakapuluka mukwiinga bakashoma muli Yehova.