Lute a Naomi

Ndyekwakalinga nsala mu Isilaeli, mwine Isilaeli waliina lya Naomi wakalongela kucishi ca Moabu pomwi abeebaye abaana basankwa bobilo. Mukuya kwaciindi beebaye Naomi bakafwa. Bana bakwe basankwa bakeeba banakashi bene Moabu Lute a Opa. Sombi cakabicaako ncakwaamba ayi abalo bana bakwe Naomi basankwa bakafwa.

Naomi ndyaakanyumfwa ayi ku Isilaeli kuli shakulya, wakaboolela kucishi cinemishaabo. Lute a Opa bakaya anguwe, ano ndyebakalinga kuya munshila, Naomi wakabaambila ayi: ‘Mwakalinga kabotu kubana bangu akuli ndime. Ndisuni kwaamba ayi noonse nobilo mukeebwe alimwi. Amuboolele kucishi cinemishaanu.’ Lute a Opa bakakumbula ayi: ‘Tulimusuni! Tulisuni kuya andimwe.’ Sombi Naomi wakatolelela kubalwiita ayi baboolele. Aboobo, Opa wakaboolelaamo, sombi Lute wakakaka. Naomi wakaambila Lute ayi: ‘Opa atoboolela kubene mishaabo akuli balesa bakwe. Awebo boolela.’ Sombi Lute wakakumbula ayi: ‘Teshi mushiyewo. Bene mishaanu, anebo balaakuba bene misheesu, alimwi Lesa wanu ulaakuba Lesa wangu.’ Ino Naomi wakalinyumfwa buyani Lute ndyaakaamba boobo?

Lute a Naomi bakashika mu Isilaeli kumatalikilo aciindi cakutebula bale. Bumwi bushiku, Lute wakaya mukubweselela bale wakacaala mumuunda wa musankwa waliina lya Bowasi, uyo wakalinga mwanaakwe Laabu. Bowasi wakanyumfwa ayi Lute wakalinga mwine Moabu uyo wakatondesha kushomeka kuli Naomi. Wakalwiita basebenshi bakwe kunooshiyaako bale ndyebatotebula kwaamba ayi Lute anoosacibweselela.

Lyalo macolesha bushiku ubo, Naomi wakeepusha Lute ayi: ‘Ino walinga kusebensela mumuunda wa baani?’ Lyalo Lute wakakumbula ayi: ‘Mumuunda wakwe Bowasi.’ Naomi wakaamba ayi: ‘Bowasi ngushikamukowa wa beebaangu. Tolelela kusebensa mumuunda wakwe pantu pomwi abanakashi bacanike bamwi. Taakuwo eshi akakushuupe.’

Lute wakatolelela kusebensa mumuunda wakwe Bowasi kushikila ciindi cakutebula ndyecakamana. Bowasi wakabona kwaamba ayi Lute wakalinga kusebensa cankusu alimwi wakalinga mwanakashi uli kabotu abuumbi. Paciindi cilya, na musankwa weebete wafwa kwakubula kushiya baana basankwa, mukaakwe wakalinga kweelete kweebwa kuli shikamukowa wakwe ibaye. Aboobo Bowasi wakeeba Lute. Bakaba amwaana musankwa waliina lya Obedi, uyo wakesa mukuba bankambiyakwe Mwaami Defedi. Beshicibusa bakwe Naomi bakakondwa abuumbi. Bakaamba ayi: ‘Cakutaanguna, Yehova wakakupa Lute, uyo wakalinga kabotu abuumbi kuli ndiwe, alimwi wakupa a mwishikulu. Aalumbaishikwe Yehova.’