Gidyoni Mbwaakakoma Bene Midyani

Mukuya kwaciindi, bene Isilaeli bakaswa kuli Yehova akutalika kupaila balesa bakubeca alimwi. Kwa myaaka 7 bene Midyani bakalinga kwiipa shifubwa akunyonyoola shishango sha bene Isilaeli. Kwaamba ayi balishitilishe, bene Isilaeli bakalinga kuyuba mushimfwengo sha mabwe amutulundu. Bakasenga Yehova kwaamba ayi abacaafwe. Aboobo Yehova wakatuma munjelo kumusankwa wacanike waliina lya Gidyoni. Munjelo wakaambila Gidyoni ayi: ‘Yehova wakusala kwaamba ayi ube shikulwana nkondo muyumu.’ Lyalo Gidyoni wakaamba ayi: ‘Ino inga ndacikonsha buyani kupulusha bene Isilaeli? Taakuwo mbombete.’

Ino Gidyoni wakalinga kusa mukushiba buyani ayi Yehova ali anguwe? Wakabika booya palubaansa akwaambila Yehova ayi: ‘Na macuunsa nkacane ayi booya ubu bwatontola ku mume nabi kwaamba ayi panshi mpobubete mpayumu, ndaakushiba ayi ncakwiila mulisuni ayi mpulushe bene Isilaeli.’ Bushiku bwakakonkelaawo macuunsa, booya bwakalinga kutontolete nabi kwaamba ayi panshi mpobwakalinga kubete pakalinga payumu! Sombi wakasenga Yehova alimwi kulengesha booya kuba buyumu nabi kwaamba ayi panshi mpobwakalinga kubete pakalinga patontola ku mume. Ishi ndyeshakacitika, Gidyoni wakashoma cakutatoonsha ayi ncakwiila Yehova wakamusala. Wakabunganya masoja akwe akuya mukulwana bene Midyani.

Yehova wakaambila Gidyoni ayi: ‘Ndaakulengesha bene Isilaeli kukoma. Ano mukwiinga ulicite masoja aanji, inga watalika kuyeeya ayi mwakoma nkondo munkusu shanu. Lwiita baabo boonse bacite boowa kuboolela kuŋanda.’ Aboobo masoja 22,000 akaboolela akucaalabo aali 10,000. Sombi Yehova alimwi wakaamba ayi: ‘Bafulisha abuumbi. Batole ku mulonga, akubalwiita ayi banwe maanshi. Ucaalebo abaabo beshi banwe maanshi cakubikila maano kubalwani.’ Basankwa bali 300 beenkabo mbobakatondesha kubikila maano ndyebakalinga kunwa maanshi. Yehova wakashomesha ayi basankwa baniini beenka aba batoocikonsha kukoma masoja abene Midyani ali 135,000.

Mashiku Yehova wakaambila Gidyoni ayi: ‘Kamuya ano mukalwane bene Midyani!’ Gidyoni wakapa basankwa bakwe mapeenga anongo shinene shakalinga kucite matoci mukati. Wakabaambila ayi: ‘Amunangilishe, akucita nceshi ncite.’ Gidyoni wakalisha lupeenga, akupwaya nongo, akunyamuna toci mwiculu, akoolobesha ayi: ‘Ngumupeeni wakwe Yehova awakwe Gidyoni!’ Abalo basankwa bakwe boonse bali 300 bakakonkela nshaakacita. Bene Midyani bakaloonda abuumbi akupilinganishikwa. Lyalo bakatalika kucayana beene abeene. Yehova wakacafwa bene Isilaeli kukoma balwani babo alimwi.