Defedi a Golyati

Yehova wakalwiita Samwelo ayi: ‘Koya kuŋanda yakwe Jese. Womwi pabana bakwe Jese ngweshi abe mwaami wa bene Isilaeli.’ Aboobo Samwelo wakaya kuŋanda yakwe Jese. Ndyaakabona mwanaakwe Jese musankwa wakutaanguna, wakayeeya ayi: ‘Cilyeelete uyu ngomusankwa Lesa ngwaasala.’ Sombi Yehova wakalwiita Samwelo ayi teshi nguwe. Yehova wakaamba ayi: ‘Nebo ndabona shili mumoyo wa muntu, kuteshi mbwaboneka pansengwe.’

Jese wakaleta bana bakwe basankwa bamwi bali 6 kuli Samwelo. Sombi Samwelo wakaamba ayi: ‘Taapuwo nabi womwi Yehova ngwasala. Sa aba mbobaana basankwa beenkabo mboocite?’ Jese wakakumbula ayi: ‘Kuli aumwi mwanikebantu, Defedi. Waya mukweembela mbelele.’ Defedi ndyaakapola, Yehova wakalwiita Samwelo ayi: ‘Ngooyu!’ Samwelo wakananika Defedi mbuli wooyo wakalinga kusa mukuba mwaami wa bene Isilaeli kwiinda mukumutila mafuta pamutwi.

Ndyepakeenda ciindi, bene Isilaeli bakatalika nkondo a bene Filisiti, abo bakalinga kucite musoja ushimpite alimwi ucishi kabotu kulwana waliina lya Golyati, uyo wakalinga kubalwanina nkondo. Golyati wakalinga kunyansha bene Isilaeli bushiku abushiku. Wakoolobesha ayi: ‘Amusale musankwa womwi ese kuno tulwane. Na acikonshe kulwana ndime akuncaya tutooba basha banu. Sombi na mukoome akumucaya, mutooba basha besu.’

Defedi wakesa kwakalinga bene Isilaeli, wakaletela bamakwabo shakulya abo bakalinga masoja. Ndyaakanyumfwa shakalinga kwaamba Golyati, Defedi wakaamba ayi: ‘Ntomulwana!’ Mwaami Saulo wakaambila Defedi ayi: ‘Waceeya abuumbi.’ Defedi wakakumbula ayi: ‘Yehova atooncafwa.’

Lyalo Saulo wakafwalika Defedi shakufwala shakwe sha nkondo, sombi Defedi wakaamba ayi: ‘Inga nshicikoonshi kuya mushakufwala ishi mukwiinga nshishibite.’ Defedi wakabwesa cakuwaalisha mabwe cakwe akuya kumulonga. Wakasala mabwe abotu ali 5 akwaabika mucipokolo. Lyalo wakacicila kuli Golyati. Golyati wakoolobesha ayi: ‘Kosa kuno mwanike. Sunu mubili wako utooba cakulya ca bayuni abanyama bamuluundu.’ Defedi taakwe kuloonda. Alakwe wakoolobesha ayi: ‘Webo utoosa mukundwana amupeeni amasumo, ono nebo ntookulwana muliina lyakwe Yehova. Tootolwana andiswe; sombi utolwana a Lesa. Bantu boonse sunu batoshiba kwaamba ayi Yehova alicite nkusu kwiinda mupeeni na lisumo. Noonse atoomwaaba mumaansa esu.’

Defedi wakabwesa libwe akulibika mu cakuwaalisha mabwe akulifupula cankusu. Kwiinda mulucafwo lwakwe Yehova, libwe lyakaya mukuuma munkumo yakwe Golyati akutapila. Lyalo musankwa muyumu uyu wakawa panshi akufwa. Lyalo bene Filisiti boonse bakacica. Sa awebo ulacinka manungo muli Yehova, bweenka mbuli Defedi?