Jonasani Musankwa Utaloondi Alimwi Ushomeka

Jonasani mwaana wakwiiya wa Mwaami Saulo, wakalinga musoja utaloondi. Defedi wakaamba ayi Jonasani wakalinga kucite lubilo kwiinda mumbankwashi alimwi ucite nkusu kwiinda nkalamu. Bushiku bumwi Jonasani wakabona masoja abene Filisiti ali 20 pakalundu. Wakalwiita shikumunyamwita shilwanisho ayi: ‘Tutobalwana na Yehova atusuminishe. Na bene Filisiti baambe ayi kamusa, ingayi Yehova watusuminisha kuya mukubalwana.’ Bene Filisiti bakoolobesha ayi: ‘Kamusa tulwane!’ Jonasani ashikumunyamwita shilwanisho bakatanta kalundu akukoma bene Filisiti.

Ceebo cakwaamba ayi Jonasani wakalinga mwaana wakwiiya wakwe Saulo, ngowakalinga kweelete kupyana bwaami. Sombi wakalinga kucishi ayi Yehova wakasala Defedi kuba mwaami wa bene Isilaeli; nacibi boobo, taakwe kumunyumfwila munyono Defedi. Jonasani wakalinga kunyumfwana abuumbi a Defedi. Bakashomeshanya kucafwana akushitilishanya. Jonasani wakapa Defedi cakufwala cakwe, lisumo, buta, a beloti mbuli citondesho ca bushicibusa bwabo.

Defedi ndyaakalinga kucica Saulo, Jonasani wakaya mukumubona akumulwiita ayi: ‘Yumabo alimwi utaloondi. Yehova wakasala ndiwe kuba mwaami. Alimwi abata balicishi.’ Sa awebo inga wasuna kuba amubyo uli kabotu mbuli Jonasani?

Mankanda aanji Jonasani wakabika buumi bwakwe mumapensho kwaamba ayi acafwe shicibusa wakwe. Wakalinga kucishi ayi Mwaami Saulo wakalinga kusuni kucaya Defedi, aboobo wakalwiita baishi ayi: ‘Mulaakubisha na mukacaye Defedi; mukwiinga taakuwo cibiibi ncaakacita.’ Saulo wakakalala abuumbi pamakani Jonasani ngaakaamba. Ndyepakeenda myaaka, Saulo wakafwa munkondo pomwi a Jonasani mwanaakwe.

Jonasani ndyaakafwa, Defedi wakalangoola Mefibosheti mwanaakwe Jonasani. Ndyaakamucana, wakamulwiita ayi: ‘Mukwiinga nebo abaiso twakalinga kunyumfwana abuumbi, ndaakukulama kwa buumi bwako boonse. Ulaakunookala muŋanda yangu akulya pomwi andime.’ Defedi taakwe kumulubaako shicibusa wakwe Jonasani.