Mwaami Defedi Mbwaakabisha

Saulo ndyaakafwa, Defedi wakaba mwaami. Paciindi ici wakalinga kucite myaaka 30. Pesule lyakusebensa mbuli mwaami kwa myaaka, bushiku bumwi mashiku ndyaakalinga paciluli ca ŋanda yakwe, wakabona mwanakashi mubotu. Defedi wakesa mukushiba ayi mwanakashi uyo ngu Batisheba mukaakwe Uliya musoja. Defedi wakeeta Batisheba kuŋanda yakwe. Wakoonaakwe lyalo wakaba alifumo. Defedi wakeelesha kusisa ncaakacita. Wakalwiita munene wamasoja ayi abike Uliya kunembo munkondo, lyalo balo baboolele mwisule. Pesule lyakwaamba ayi Uliya wacaikwa munkondo, Defedi wakeeba Batisheba.

Sombi Yehova wakabona shibiibi shoonse Defedi nshaakacita. Ino wakacita buyani? Wakatuma mushinshimi Natani kuya kuli Defedi. Natani wakaambila Defedi ayi: ‘Musankwa umwi mubile wakalinga kucite mbelele shiinji, sombi musankwa umwi mukandu wakalinga kucite kaana ka mbelele komwibo kanakashi nkaakalinga kusuni abuumbi. Musankwa mubile wakabwesa kaana ka mbelele ka musankwa mukandu.’ Defedi wakakalala akwaamba ayi: ‘Musankwa uyo ulyeelete kucaikwa!’ Lyalo Natani wakalwiita Defedi ayi: ‘Musankwa uyo ndiwe!’ Defedi wakanyumfwa cibiibi abuumbi, akwaambila Natani ayi: ‘Ncakwiila ndabiisha pameenso akwe Yehova.’ Kubisha kwakwe Defedi kwakamuletela mapensho aanji abuumbi amukwashi wakwe. Yehova wakaanisha Defedi sombi taakwe kumucaya mukwiinga wakatondesha kushomeka akuliceesha.

Defedi wakalinga kusuni kuyaka tempele yakwe Yehova, sombi Yehova wakasala Solomoni mwanaakwe kwaamba ayi ngweshi ayake tempele. Defedi wakatalika kulibambila shintu Solomoni nshaakalinga kusa mukusebensesha pakuyaka tempele akwaamba ayi: ‘Tempele yakwe Yehova ilyeelete kuba ibotu kwiindaawo. Solomoni acili mwanike, sombi ntoomucafwa kulibambila.’ Defedi wakapa maali akwe aanji akucafwilisha muncito yakuyaka. Wakacana bantu bacishi kabotu kuyaka. Wakabunganya golodi a silifa, akuleta shisamu sha sida kuswa ku Taya aku Sidoni. Ndyaakalinga pafwiifwi kufwa, Defedi wakapa Solomoni butanjilishi bwa mbwaakalinga kweelete kuyaka tempele. Wakaamba ayi: ‘Yehova ngowakapa kwaamba ayi nkulembele shintu shoonse ishi. Yehova alaakukucafwa. Utaloondi. Yumabo akusebensa ncito.’