Tempele Yakwe Yehova

Solomoni ndyaakaba mwaami wa bene Isilaeli Yehova wakamwiipusha ayi: ‘Nciinshi ncoosuni ayi nkupe?’ Solomoni wakakumbula ayi: ‘Ncili mwanike alimwi nshicishiiwo abwakulela. Amumpe busongo bwakucikonsha kulela bantu banu.’ Yehova wakaamba ayi: ‘Mukwiinga wasenga busongo, ntookupa busongo alushibo kwiinda shakabawo kale amuntu uli woonse. Alimwi ulaakuba mubile. Alimwi na unoonyumfwila, ndaakukupa buumi bulaamfu.’

Solomoni wakatalika kuyaka tempele. Wakasebensesha golodi ibotu kwiindaawo, silifa, shisamu, a mabwe. Kwakalinga basebenshi baanji abuumbi bacishi kabotu ncito yakuyaka. Bakamanisha kuyaka tempele pesule lya myaaka 7, aboobo cakashika ciindi ca kuyaaba kuli Yehova. Yakalinga kucite cipaililo pakalinga milambu. Lyalo Solomoni wakafukama kunembo lya cipaililo akupaila ayi: ‘O Yehova, tempele iyi njiniini abuumbi alimwi teshi ibotu abuumbi kuli ndiwe, sombi twasenga ayi utambule kulambila kwesu akukutika mipailo yesu.’ Ino Yehova wakalinyumfwa buyani pa tempele Solomoni njaakayaka amupailo ngwaakapaila? Ndyaakamanabo kupaila, mulilo wakaswa kwiculu akutenta milambu yakalinga pacipaililo. Yehova wakasangalala abuumbi pa tempele njobakamuyakila. Alimwi bene Isilaeli abalo bakasangalala ndyebakabona sheeshi.

Mwaami Solomoni wakashibikwa abuumbi mu Isilaeli alimwi amumisena imwi yakulaale ceebo ca busongo bwakwe. Bantu bakalinga kusa kuli nguwe kwaamba ayi abacaafwe. Mwaami mwanakashi waku Shiba alakwe wakesa kuli Solomoni akumwiipusha miipusho iyumu. Ndyaakanyumfwa mbwaakakumbula wakaamba ayi: ‘Nshikwe kushoma bantu nshobakalinga kundwiita pali ndiwe, ano ndabona ayi nshindakashimikilwa shaceyabo kulaale. Yehova, Lesa wako, wakupa shoolwe.’ Shintu shakabota abuumbi mucishi ca Isilaeli, alimwi bantu bakalinga kusangalete. Sombi shintu shakalinga kusa mukwaaluka.