Bwaami Mbobwakapaansana

Mu Isilaeli mwakalinga luumuno Solomoni ndyaakalinga kulambila Yehova. Sombi wakeeba banakashi baku shishi shimwi baanji abo bakalinga kulambila shibumbwabumbwa. Aboobo paniini paniini Solomoni wakacinja akutalika kulambila shibumbwabumbwa. Yehova taakwe kukondwa. Aboobo wakaambila Solomoni ayi: ‘Ntookunyaya bwaami bwa bene Isilaeli akubwaabanya mumbasu shobilo. Lubasu lunene ndaakupa musebenshi wako womwi, lyalo mukwashi wako ulaakunokweendeleshabo lubasu luniini.’

Kuli acimwi Yehova ncaakacita cakatondesha nshaakalinga kusa mukucita. Jeloboamu musebenshi wakwe Solomoni ndyaakalinga palweendo, wakakumanya mushinshimi Aija. Aija wakakwamuna cakufwala cakwe mushipansha shili 12 akulwiita Jeloboamu ayi: ‘Yehova alaakunyaya mukwashi wakwe Solomoni bwaami bwa bene Isilaeli akubwabanya mumbasu shobilo. Bwesa shipansha shili 10 ishi mukwiinga ulaakuba mwaami wa mikowa 10 ya bene Isilaeli.’ Mwaami Solomoni ndyaakanyumfwa makani aya wakalinga kusuni kucaya Jeloboamu! Aboobo Jeloboamu wakalobokela ku Ijipiti. Mukuya kwaciindi, Solomoni wakafwa, lyalo mwanaakwe musankwa Leoboamu wakaba mwaami. Jeloboamu wakayeeya ayi inga cabota ano kuboolela ku Isilaeli.

Bacinene ba bene Isilaeli bakalwiita Leoboamu ayi: ‘Na bantu unoobalama kabotu, abalo balaakunoshomeka.’ Sombi babye Leoboamu bacanike bakamulwiita ayi: ‘Ulyeelete kunoobapensha akubapa ncito shiyumu!’ Leoboamu wakakonkela shakaamba babye bacanike. Wakalinga kupensha bantu, abalo bakamubukila. Bakabika Jeloboamu kuba mwaami wa mikowa 10, akutalika kwiitwa ayi bwaami bwa bene Isilaeli. Lyalo mikowa imwi yobilo yakatalika kwiitwa ayi bwaami bwa bene Juda, alimwi mikowa iyi yobilo bakalinga kumusuni abuumbi Leoboamu. Kuswabo ciindi ici mikowa 12 ya bene Isilaeli yakapansaana.

Jeloboamu taakalinga kusuniiwo kwaamba ayi bantu banooya ku Jelusalemu mukulambila, uko kwakalinga bwaami bwakwe Leoboamu. Sa ulishi ncaakacitila boobo? Wakalinga kuloonda ayi inga bamubukila akuya kulubasu lwakwe Leoboamu. Aboobo wakapanga shibumbwabumbwa sha golodi shobilo akulwiita bantu ayi: ‘Ku Jelusalemu nkulaamfu abuumbi. Munopaililabo kokuno kweenka.’ Abalo bantu bakatalika kupaila shibumbwabumbwa sha golodi akuluba Yehova alimwi.