A Wicked Queen Is PunishedMwaami Mwanakashi Mubiibi Mbwaakanishikwa

Mwaami Aabu wakalinga kubona muunda washisepo wakwe Naboti, na weemikana paliwindo lya ŋanda yakwe ya bwaami ku Jesiliilu. Aabu wakalinga kuusuni muunda uyu, aboobo wakeelesha kubandika a Naboti kwaamba ayi amuulishe. Sombi Naboti wakakaka, mukwiinga Mulawo wakwe Yehova tawakalinga kusuminisha kuulisha luundu lwa kupyana. Sa Aabu wakalemeka cintu ciluleme Naboti ncaakacita? Sobwe. Aabu wakakalala abuumbi. Taakwe kuswa mucipinda cakwe alimwi wakakaka akulya.

Mukaakwe Aabu Jesebelo mwanakashi mubiibi abuumbi wakamwaambila ayi: ‘Sa mwebo te ndimwe baami ba cishi ca Isilaeli. Inga mwaba acili coonse ncomusuni. Ntoomubwesela muunda ulya.’ Jesebelo wakalemba makalata akwaatuma kubamanene bamu Jesiliilu, akubalwiita ayi babekeshe Naboti ayi watukana Lesa aboobo alyeelete kucaikwa kwiinda mukumuuma mabwe. Abalo bamanene bakacita kweelana a Jesebelo mbwaakabalwiita, lyalo wakalwiita Aabu ayi: ‘Naboti ulifwite. Muunda ngwanu ano.’

Teshi Naboti eenkabo wakacaikwa kuli Jesebelo. Wakacaya bantu baanji bakalinga kusuni Yehova. Wakalinga kulambila shibumbwabumbwa akucita shintu shimwi shibiibi. Yehova wakalinga kubona shibiibi shoonse Jesebelo nshaakalinga kucita. Ino wakamucita buyani?

Aabu ndyaakafwa, Jeolamu mwanaakwe musankwa wakaba mwaami. Yehova wakatuma musankwa waliina lya Jewu kuya mukwaanisha Jesebelo amukwashi wakwe.

Jewu wakatanta cikoci cakwe akuya ku Jesiliilu uko Jesebelo nkwaakalinga kukala. Jeolamu wakatanta cikoci cakwe akuya mukukumanya Jewu, ndyaakamucana wakamwiipusha ayi: ‘Sa wesa muluumuno?’ Jewu wakakumbula ayi: ‘Ino inga kwaba buyani luumuno banyoko ba Jesebelo ndyebatoocita shibiibi?’ Ndyaakalinga kusuni ayi asanduluke akucica, Jewu wakamuyasa lisumo, lyalo wakafwa.

Lyalo Jewu wakaya kuŋanda yakwe Jesebelo. Jesebelo ndyaakanyumfwa ayi Jewu atoosa wakalipenta kumeenso akusakula kabotu misusu yakwe. Lyalo wakaya weemikana paliwindo lyapeculu kaasondela. Jewu ndyaakashika, Jesebelo wakamwaansha cakubula bulemu. Lyalo Jewu wakoolobesha kubasebenshi bakwe Jesebelo bakalingaakwe ayi: “Amumuwaale panshi!” Abalo bakamuwaala kuswa peculu paliwindo, wakaloka panshi akufwa.

Pesule lyakucita sheeshi, Jewu wakacaya bana bakwe Aabu bali 70 akunyonyoola shoonse nshobakalinga kusebensesha mukulambila Baali. Sa waboona ayi Yehova alabona shintu shoonse alimwi paciindi ceelete, alaanisha bacita shibiibi?