Musoja a Mwanakashi Wacanike

Mucishi ca Silya, mwakalinga mwanakashi wacanike mwine Isilaeli, masoja abene Silya ngobakakusha kumukwashi wakwe. Wakaba musebenshi wa muka Naamani munene wa masoja. Mwanakashi wacanike uyu wakalinga kupaila Yehova nabi kwaamba ayi bantu mbaakalinga kukalaabo tabakalinga kucita boobo.

Naamani wakalinga kucite bulwashi bubiibi, alimwi wakalinga kunyumfwa kucisa lyoonse. Mwanakashi wacanike uyu wakalinga kusunishishi kucafwa Naamani. Aboobo wakalwiita muka Naamani ayi: ‘Ndimushi weenga washilika beebaanu. Mu Isilaeli, muli mushinshimi wakwe Yehova Elisha. Inga wabashilika beebaanu.’

Muka Naamani wakalwiita ibaye shakaamba mwanakashi wacanike. Wakalinga kusuni kweeleshaako cili coonse, aboobo wakaya kuŋanda yakwe Elisha ku Isilaeli. Naamani wakalinga kulangila Elisha kumutambula munshila ilibetele mbuli muntu uyandika. Sombi Elisha wakatumabo musebenshi wakwe kuya mukwaansha Naamani akumulwiita shakucita ayi: ‘Kooya ukasambe mu Mulonga wa Joodani mankanda 7. Lyalo ulaakuba kabotu.’

Naamani wakakalala abuumbi. Wakaamba ayi: ‘Nebo ndalinga kuyeeya ayi atonshilika kwiinda mukwiita pali Lesa wakwe akwiinsha maansa akwe pamubili wangu. Ano wandwiitabo kuya ku mulonga wamu Isilaeli. Tulicite milonga ibotu abuumbi mu Silya. Ino nceebonshi inga nshiyibo mukusamba mu milonga ya kumishesu?’ Naamani wakakalala, akuswaako kuŋanda yakwe Elisha.

Ano basebenshi bakwe bakaamba ayi: ‘Sa inga tamuciti cili coonse ncobamulwiita kwaamba ayi moole? Mushinshimi ncaamulwiita kucita ncintu cuubu. Ino mbuyani kucitabo?’ Naamani wakanyumfwila nshobakaamba. Wakaya ku Mulonga wa Joodani akuliwaala mumaanshi mankanda 7. Ndyaakaliwaala linkanda lya namba 7, wakoola. Wakakondwa abuumbi akuboolela kuli Elisha mukulumba. Naamani wakaamba ayi: ‘Ano ndashiiba ayi Yehova ngo Lesa wancine.’ Ino utoobona ayi mwanakashi wacanike mwine Isilaeli wakalinyumfwa buyani Naamani ndyaakaboola kuŋanda kaali woola?