Yehova Mbwaakatuma Jelemiya

Yehova wakasala Jelemiya kuba mushinshimi kubene Juda. Wakamulwiita kushimikila akucenjesha bantu ayi bacileeke kucita shibiibi. Jelemiya wakaamba ayi: ‘Yehova, nebo ndi mwaana muniini. Inga nshicikoonshi kwaamba kubantu.’ Yehova wakamulwiita ayi: ‘Utaloondi. Ndaakukulwiita nsheshi ukaambe. Ndaakukucafwa.’

Yehova wakalwiita Jelemiya kubunganya bamanene akupwaya nongo boonse kabalangilisha, akwaamba ayi: ‘Jelusalemu ilaakupwayoolwa bweenka ubu.’ Bamanene bakakalala abuumbi Jelemiya ndyaakacita Yehova nshaakamulwiita. Mupailishi waliina lya Pasha wakooma Jelemiya akumwaanga myeendo amaansa. Aboobo wakalingabo peenka mpobakamwaangila. Ndyebwakaca Pasha wakamwaangulula. Jelemiya wakaamba ayi: ‘Camana. Ndacileka kushimikila bantu.’ Ano sa ncakwiila wakacileka? Sobwe. Pesule lya kuyeeyawo, Jelemiya wakaamba ayi: ‘Makani akwe Yehova ali anga ngumulilo mumubili wangu. Inga nshicileeki kushimikila.’ Jelemiya wakatolelela kucenjesha bantu.

Ndyepakeenda myaaka iinji, mu Juda mwakaba mwaami umwi. Bapailishi abashinshimi bakubeca bakalinga kupatite makani Jelemiya ngaakalinga kushimikila. Bakalwiita banaabaami ayi: ‘Muntu uyu alyeelete kucaikwa.’ Jelemiya wakaamba ayi: ‘Na muncaaye, ingayi mwacaya muntu utacite mulandu. Ndaamba maswi akwe Yehova, kuteshi angu.’ Banaabaami ndyebakanyumfwa boobo, bakaamba ayi: ‘Musankwa uyu taeelete kucaikwa.’

Jelemiya wakatolelela kushimikila, aboobo banaabaami bakakalala abuumbi. Bakalwiita mwaami ayi acaye Jelemiya. Mwaami wakabalwiita ayi inga bamucita cili coonse ncobasuni. Bakamubwesa akumuwaala mumukalo ulaamfu, mwakalinga matipa, kwaamba ayi afwe. Jelemiya wakatalika kuya bupila mumatipa.

Lyalo Ebedimeleki musebenshi wa mwaami wakaya mukulwiita mwaami ayi: ‘Bana banu bamuwaala mumukalo Jelemiya! Na tubule kumukusha atoofwa.’ Mwaami wakatuma Ebedimeleki abasankwa bali 30 kuya mukukusha Jelemiya mumukalo. Bweenka mbuli Jelemiya, aswebo tatweelete kusuminisha cintu cili coonse kutupa kucileka kushimikila.