Esita Mbwaakapulusha Benemishaabo

Esita wakalinga mwanakashi mwine Juda uyo wakalinga kukala mu tauni yakalinga kwiitwa ayi Susa mu Pesha. Nebukadinesa wakabwesa Mukwashi wakwe Esita kuswa ku Jelusalemu. Wakalinga kusunga Esita ngu Modekayi mupyala wakwe alimwi musebenshi wakwe Aasuwela, Mwaami wa Pesha.

Mwaami Aasuwela wakalinga kusuni kweeba mwanakashi umwi. Basebenshi bakwe bakamuletela banakashi babotu mu Pesha, kwiilikaawo a Esita. Pa banakashi boonse, mwaami wakasalaawo Esita kwaamba ayi abe mukaakwe. Modekayi wakalwiita Esita ayi ataliyubululi ayi ngu muJuda.

Amani musankwa wakalinga kulisumpula ngwaakalinga munene wa beendeleshi bamwi boonse. Wakalinga kusuni ayi boonse kabamufukamina. Modekayi wakakaka kucita boobo, aboobo Amani wakakalala abuumbi cakwaamba ayi wakalinga kusuni kumucaya. Amani ndyaakashiba ayi Modekayi ngu muJuda, wakayeeya ayi acaye baJuda boonse bakalinga mubwaami bwa Pesha. Wakalwiita mwaami ayi: ‘BaJuda mbantu batabete kabotu, ulyeelete kubacaya.’ Aasuwela wakaamba ayi: ‘Cita kweelana ambowayeeya,’ alimwi wakamupa ankusu shakubika mulawo. Amani wakabika mulawo wakwaamba ayi bantu balyeelete kucaya baJuda boonse, pabushiku bwa namba 13 mumweenshi wa Ada. Sombi Yehova wakalinga kubwene shoonse shakalinga kucitika.

Esita taakalinga kuushiwo mulawo uyu. Aboobo Modekayi wakatuma muntu umwi kwaamba ayi atole nkalata kuli Esita, mwakalinga kulembetwe mulawo uyo akuya mukumulwiita ayi: ‘Koya ukabandike a mwaami.’ Esita wakaamba ayi: ‘Uli woonse uya ku mwaami kwakubula kumwiita, alacaikwa. Mwaami taakwe kunjitaawo kwanshiku 30! Sombi ntooya. Na atondeke nkoli yakwe ya bwaami kuli ndime teshi ncaikwe. Ano na abule kucita boobo, ntocaikwa.’

Esita wakaya mulubaansa lwa ŋanda ya mwaami. Mwaami ndyaakamubona, wakamutondeka nkoli yakwe ya bwaami. Wakaya ku mwaami, aboobo mwaami wakamwiipusha ayi: ‘Ino nciinshi nconsuni Esita?’ Wakakumbula ayi: ‘Ntomwiita mwebo a Amani kusa kukusekelela.’ Ndyebakalinga kusekelela, Esita wakabeeta kukusekelela akumwi. Ndyebakalinga kukusekelela kwabili, mwaami wakeepusha Esita alimwi ayi: ‘Nciinshi ncoosuni ayi nkucitile?’ Wakakumbula ayi: ‘Muntu umwi mu bwaami bwanu alisuni kuncaya akucaya bene misheesu. Twasenga amutupulushe.’ Mwaami wakeepusha ayi: ‘Ino ngani usuni kumucaya?’ Wakaamba ayi: ‘Ngooyu musankwa utabete kabotu, Amani.’ Aasuwela wakakalala abuumbi cakwaamba ayi wakalwiita bantu ayi bacaye Amani peenkaapo.

Nacibi boobo, taakuwo wakalinga kusa mukucikonsha kwaalula mulawo Amani ngwaakabika nabibo mwaami mwiine. Aboobo mwaami wakasala Modekayi kuba munene wabeendeleshi akumupa nkusu shakubika mulawo upya. Modekayi wakabika mulawo wakusuminisha baJuda kulishitilisha kubalwani babo. Aboobo pa 13 mumweenshi wa Ada, baJuda bakakoma balwani babo. Kuswabo bushiku ubo, mwaaka amwaaka bakalinga kusekelela kukoma uku.