Esila Wakaiisha Milawo Yakwe Lesa

Pakeenda mpashi myaaka 70 kuswa ciindi bene Isilaeli baanji ndyebakaboolela ku Jelusalemu, sombi bamwi bakacaala mucishi ca bene Pesha. Womwi pabaabo bakacaala wakalinga mupailishi waliina lya Esila, uyo wakalinga kwiisha Milawo yakwe Yehova. Esila wakanyumfwa ayi bantu ku Jelusalemu tabakalinga kukonkela Milawo, aboobo wakalinga kusuni kuya mukubacafwa. Atasakisesi Mwaami wa bene Pesha wakamulwiita ayi: ‘Lesa wakakupa busongo kwaamba ayi unokwiisha Milawo yakwe. Koya, alimwi ubwese uli woonse ngoosuni kuyaakwe.’ Esila wakabunganya baabo boonse bakalinga kusuni kuboolela ku Jelusalemu. Bakapaila kuli Yehova kwaamba ayi abacaafwe kweenda kabotu, lyalo bakatalikaako.

Bakashika ku Jelusalemu pesule lyakweenda myeenshi 4. Banaabaami mu Jelusalemu bakalwiita Esila ayi: ‘Bene Isilaeli tabatoonyumfwila Yehova alimwi bakeeba abanakashi bapaila balesa bakubeca.’ Ino Esila wakacita buyani? Wakafukama pameenso abantu akupaila kuli Yehova ayi: ‘Yehova, mwatucitila shintu shiinji abuumbi, sombi twabiisha kuli ndimwe.’ Bantu bakaaluka, sombi bakatolelela kucita shintu shitabete kabotu alimwi. Esila wakasala bamanene aboomboloshi kwaamba ayi balange pamakani aya. Myeenshi yotatwe yakakonkelawo, abo batakalinga kulambila Yehova bakabatanda.

Pakeenda myaaka 12. Paciindi ici, lubumbu lwa Jelusalemu kaluyakitwe kale. Aboobo Esila wakeeta bantu kwaamba ayi ababelengele Milawo yakwe Lesa. Esila ndyaakafwekulabo libuku, bantu bakeemikana. Wakalumbaisha Yehova, abalo bantu bakasuminisha kwiinda mukutambika maansa. Lyalo Esila wakabelenga akusansulula Milawo yakwe Lesa, bantu boonse bakakutika cakubikila maano. Bakasumina ayi bakalinga baswa kuli Yehova alimwi bakalila. Bushiku bwakakonkelawo, Esila wakababelengela Milawo aimwi. Bakesa mukushiba ayi kapatana kwiinda ciindi, bakalinga kweelete kucita Kusekelela kwa Shimpaka. Aboobo bakatalika kulibambila peenkaapo.

Kwanshiku 7 shakusekelela, bantu bakasangalala akulumba Yehova ceebo ca shakulya shiinji nshobakatebula. Kuswabo muciindi cakwe Joshuwa tabana kubawo kale akusekelela mbuli kooku. Pesule lyakusekelela, bantu bakabungana akupaila ayi: ‘Yehova, mwakatupulusha kuswa mubusha, mwakatupa shakulya muluyanga, akutupa cishi ici cibotu. Sombi mankanda aanji tatwakalinga kumunyumfwila. Mwakatuma bashinshimi kusa mukutucenjesha, sombi tatukwe kunyumfwa. Nacibi boobo, mwakatukalikila moyo. Mwakacita nshemwakashomesha Abulaamu. Aboobo tutoshomesha ayi tunanomunyumfwila.’ Bakalemba nshebakashomesha, lyalo banaabaami, bene Lefi, abapailishi bakabikawo keshibilo.