Lubumbu lwa Jelusalemu

Atuboolele kwisule paniini. Neyemiya mwine Isilaeli wakalinga musebenshi wa Mwaami Atasakisesi, wakalinga kukala mu Shushani tauni ya bene Pesha. Mukwabo Neyemiya wakatola makani anyumfwisha cibiibi kuswa ku Juda, akwaamba ayi: ‘Bantu bakaboolela ku Jelusalemu tabatookala kabotu. Lubumbu a minjililo shakanyonyoolwa a bene Babiloni tashina kubambwa.’ Neyemiya wakakalala. Wakalinga kusuni kuya ku Jelusalemu mukucafwa, aboobo wakapaila kwaamba ayi mwaami amusuminishe kuya.

Paciindi cimwi, mwaami wakabona ayi Neyemiya atooboneka kulisukama. Wakaamba ayi: ‘Nshina kukubonaawo kale kuungumana bobulya. Ino nciinshi cabica?’ Neyemiya wakakumbula ayi: ‘Ino inga ndaba buyani usangalete na ndabala inene ya Jelusalemu ili mumatongo?’ Lyalo mwaami wakamwiipusha ayi: ‘Ino nciinshi ncosuni ayi nkucitile?’ Neyemiya peenkaapo wakapaila mumoyo. Lyalo wakaamba ayi: ‘Ndasenga amunsuminishe kuya ku Juda mukubamba lubumbu lwa Jelusalemu.’ Mwaami Atasakisesi wakasuminisha Neyemiya kuya akushinisha ayi weenda kabotu mushinso ulaamfu uyu. Wakamubika kuba mweendeleshi wa Juda alimwi wakamupa ashisamu shakuya mukuyakila minjililo ya Jelusalemu.

Ndyaakashika ku Jelusalemu, Neyemiya wakashinguluka Jelusalemu kubona lubumbu lwakanyonyoolwa. Lyalo wakeeta bapailishi abeendeleshi akubalwiita ayi: ‘Lubumbu lwakanyonyoolwa. Tulyeelete kutalika kuyaka.’ Bantu bakasumina, aboobo bakatalika kuyaka.

Sombi balwani ba bene Isilaeli bakatalika kubaseka akwaamba ayi: ‘Lubumbu ndomutoyaka na mwaaba watantaawo inga walumwayulula.’ Tabakwe kubikila maano kukusekwa uko bakatolelela kuyaka. Bakayaka lubumbu lulaamfu alimwi luyumu.

Balwani bakapangana ayi bakaswe mumisena ipusenepusene akulwana bantu bamu Jelusalemu cakuteengashila. Bene Juda ndyebakanyumfwa balwani babo nshobakalinga kusuni kucita, bakaloonda. Sombi Neyemiya wakabaambila ayi: ‘Mutaloondi. Yehova ali andiswe.’ Aboobo wakabika beshikushitilisha baabo bakalinga kusebensa, lyalo taakuwo wakabalwana.

Bakamanisha kuyaka lubumbu a minjililo munshiku 52. Neyemiya wakaleta bene Lefi boonse kukusekelela kwa kwaaba Jelusalemu kuli Yehova. Wakababika mumakoto obilo abeshikwiimba. Bakatanta masitepusi kuya peculu lya lubumbu ku Mwinjililo wa Kantupu. Lyalo likoto lya beshikwiimba limwi lyakalulama kucipiko. Bakalinga kwiimba kuli Yehova kwiinda mukulisha mapeenga, misebe, atulumbu. Esila wakaya alikoto lyomwi, alakwe Neyemiya alikoto limwi, makoto oonse obilo akakumana pa tempele. Bantu boonse—basankwa, banakashi, alimwi abaana bakabenga milambu kuli Yehova akusekelela. Ciyobeyobe cakusangalala kwabo cakalinga kunyumfwikilabo kulaale.