Munjelo Mbwaakaya Kuli Maliya

Lisabeti wakalinga kucite shikamukowa wacanike waliina lya Maliya, uyo wakalinga kukala ku Nasaleti mu Galili. Maliya wakalinga wakobekelwa kuli Josefu, kapenta. Lisabeti ndyaakalinga kucite lifumo lya myeenshi 6, munjelo Gabuliyelo wakabonekela kuli Maliya. Akwaamba ayi: ‘Waboneka, Maliya. Yehova wakupa coolwe cinene.’ Maliya taakwe kunyumfwishisha munjelo ncaakasansulula. Lyalo wakamwaambila ayi: ‘Ulaakumita akushala mwaana musankwa uyo ngweshi ukatumbe ayi Yesu. Alaakweendelesha mbuli Mwaami. Bwaami bwakwe bulaakuba bwa muyayaya.’

Maliya wakaamba ayi: ‘Ino ici inga cacitika buyani? Nebo nenteshiiwo amusankwa.’ Gabuliyelo wakaamba ayi: ‘Kuli Yehova taaku ciyumu. Mushimu usalashi ulaakusa pali ndiwe, lyalo ulaakuba amwaana musankwa. Lisabeti shikamukowa wako alakwe alicite lifumo.’ Lyalo Maliya wakaamba ayi: ‘Acicitike kweelana ambomwaamba. Mukwiinga nebo ndimusebenshi wakwe Yehova.’

Maliya wakeenda mushinso wakutanta tulundu kuya mukufwakashila Lisabeti. Maliya ndyaakanshabo Lisabeti, mwaana Lisabeti ngwaakalinga kumitite wakanyanyaala mumala. Lyalo Lisabeti wakasushikwa mushimu usalashi, akwaamba ayi: ‘Maliya, Yehova wakupa coolwe. Ncoolwe cinene kuli ndime kufwakashilwa a banyina Mwaami wangu.’ Maliya wakaamba ayi: ‘Ndalumba Yehova amoyo wangu woonse.’ Maliya wakekala a Lisabeti kwa myeenshi yotatwe, lyalo wakaboolelaamo ku Nasaleti.

Josefu ndyaakashiba ayi Maliya alicite lifumo, wakalinga kusuni kumanisha cibusa cabo. Sombi munjelo wakabonekela kuli nguwe muciloto akumwaambila ayi: ‘Utaloondi kweeba Maliya. Taakuwo cibiibi ncaacita.’ Aboobo Josefu wakeeba Maliya akumutola kuŋanda yakwe.