Bashikwiiya Mbobakatambula Mushimu Usalashi

Ndipakeenda nshiku 10 kuswa ciindi Yesu ndyaakaboolela kwiculu, bashikwiiya bakwe bakatambula mushimu usalashi. Ishi shakacitika pa Pentekositi mu 33 C.E., paciindi bantu baanji bakaswa mumisena ipusenepusene ndyebakaya ku Jelusalemu mukusekelela. Bashikwiiya bakwe Yesu bali 120 bakalinga kubungene mucipinda capeculu. Lyalo cakuteengashila kwakacitika cintu cikankamika. Bakabona shimwi shakalinga kuboneka anga njimilaka ya mulilo yakaya mukwikala pamitwi yabo, lyalo boonse bakatalika kwaamba mumishobo ipusenepusene. Muŋanda mwakalinga kunyumfwika coongo anga ncipuupu cinene.

Bantu bakaya ku Jelusalemu kuswa mushishi shimwi ndyebakanyumfwa coongo mu ŋanda, bakacicilaako kwaamba ayi babone shakalinga kucitika. Bakakankamana ndyebakanyumfwa bashikwiiya, kabaamba mishobo imwi. Bakaamba ayi: ‘Aba bantu mbene Galili, ino bacishiba buyani kwaamba mumishobo yesu?’

Lyalo Pita abatumwi bamwi bakeemikana kunembo lya bantu. Pita wakaambila bantu Yesu mbwaakacaikwa, a Yehova mbwaakamubusha. Pita wakaamba ayi: ‘Pacecino ciindi Yesu ali kwiculu kulyaansa lyalulyo lyakwe Lesa alimwi watupa mushimu usalashi uyo ngwaakatushomesha. Nsheshaankamiko ishi nshemwabona akunyumfwa.’

Maswi Pita ngakaamba akabashika pamoyo, aboobo bakamwiipusha ayi: “Ino tucite buyani?” Wakabakumbula ayi: ‘Amwaane akusanduka kuswa kushibiibi shanu lyalo akubombekwa muliina lyakwe Yesu. Amwebo mutotambula cipo ca mushimu usalashi.’ Pabushiku ubo bantu bashika pafwiifwi a 3,000 bakabombekwa. Kuswabo paciindi ico bashikwiiya bakalinga kuya cifulilaako mu Jelusalemu. Kwiinda mukucafwikwa amushimu usalashi, batumwi bakatalika mabungano aanji kwaamba ayi banokwiisha bashikwiiya shintu shoonse Yesu nshaakabalwiita.