Paulo a Timoti

Timoti wakalinga mukwesu wacanike wamulibungano lyaku Lisitila. Baishi bakalinga baGiliki lyalo banyina bakalinga baJuda. Timoti wakeeya pali Yehova kaacili mwanike kuswa kuli banyina ba Yunisi, a bankambiyakwe banakashi ba Loisi.

Paulo ndyaakalinga palweendo lwakwe lwabili lwakushimikila, wakesa mukucana ayi Timoti wakalinga kubasuni abuumbi bamakwesu abenankashi alimwi wakalinga kusunishishi kubacafwa. Paulo wakasenga Timoti ayi ayaakwe palweendo lwakwe. Mukuya kwaciindi Paulo wakaiisha Timoti kucishiba kabotu bwakwiisha alimwi abwakushimikila makani abotu.

Mushimu usalashi wakalinga kutanjilila Paulo a Timoti kuli koonse nkweenga baya. Bushiku bumwi mashiku, Paulo wakabona musankwa mucili anga nciloto kamwaambila ayi aye ku Makedoniya mukubacafwa. Aboobo, Paulo, Timoti, Sailasi a Luka bakaya ku Makedoniya mukushimikila akutalika mabungano.

Basankwa abanakashi baanji bakaba Beneklistu mu Makedoniya, tauni yakalinga mu Tesalonika. Nacibi boobo, baJuda bamwi bakanyumfwila munyono Paulo abaabo mbaakalingaabo. Bakabunganya bantu baanji akutola Paulo abaabo mbaakalingaabo kubeendeleshi bamu tauni iyo, kaboolobesha ayi: ‘Basankwa aba mbalwani bamfulumeende ya Loma!’ Paulo a Timoti bakalinga kusa mukuba mumapensho, aboobo bakacicila ku Biliya mashiku.

Bantu mu Biliya bakalinga kusunishishi kwiiya makani abotu, alimwi baGiliki a baJuda bakaba bashomi. Sombi baJuda bamwi ndyebakaswa ku Tesalonika bakaleta shoongo, aboobo Paulo wakaya ku Atenisi. Timoti a Sailasi bakacaala mu Biliya kwaamba ayi bayuminishe bamakwesu. Mukuya kwaciindi Paulo wakatuma Timoti ku Tesalonika kwaamba ayi akacafwe bamakwesu abo bakalinga kupenshekwa abuumbi. Alimwi Paulo wakatuma Timoti mukufwakashila mabungano aamwi aanji kwaamba ayi akabayuminishe.

Paulo wakalwiita Timoti ayi: ‘Abo boonse basuni kusebensela Yehova balaakupenshekwa.’ Timoti wakapenshekwa akwaangwa ceebo calushomo lwakwe. Wakalinga kusangalete mukwiinga wakabona ayi ncoolwe cakutondesha ayi alicite lushomo muli Yehova.

Paulo wakalwiita bene Filipi ayi: ‘Ntoomutumina Timoti. Alaakumwiisha ncocaamba kweenda mucancine alimwi alaakumwiisha bwakushimikila.’ Paulo wakalinga kushomete ayi Timoti inga wacikonsha kusebensa kabotu ncito iyi. Paulo a Timoti bakalinga beshicibusa alimwi bakasebensela pomwi kwamyaaka iinji.