Paulo Mbwaakatumwa ku Loma

Lweendo lwatatu lwakwe Paulo lwakushimikila lwakamanina mu Jelusalemu. Ku Jelusalemu wakaangwa akubikwa mujeele. Mucili anga nciloto ncaakabona mashiku, Yesu wakamwaambila ayi: ‘Ulaakuya ku Loma mukushimikila.’ Paulo bakamukusha ku Jelusalemu akumutola ku Sisaliya, uko nkwakaangwa kwamyaaka yobilo. Ndyaakalinga koomboloshekwa amweendeleshi Fesitasi, Paulo wakaamba ayi: ‘Ndisuni koomboloshekwa a Sisa ku Loma.’ Fesitasi ndyaakanyumfwa boobo wakaamba ayi: ‘Mbowasenga ayi Sisa akoomboloshe mulandu wako, anu utootolwa nkomunya uko.’ Paulo bakamutantika mubwaato bwakalinga kuya ku Loma, alimwi wakaya pomwi a Luka a Alisitakasi.

Ndyebakalinga pa lweenge, kwakesa cipuupu cinene ico cakatola nshiku shiinji. Boonse bakalinga mubwaato bakayeeya ayi batoofwa. Sombi Paulo wakabaambila ayi: ‘Muciloto munjelo wakandwiita ayi: ‘Utaloondi Paulo! Ulaakushika ku Loma abaabo boonse mbooli abo.’ Mutaloondi! Teshi tufweewo.’

Cipuupu ico cakatola nshiku 14. Lyalo, bakabona nsumbu. Yakalinga ni nsumbu ya Molita. Bwaato ndyebwakashika pasaanti bwakapasuka akunyonyooka, sombi bantu boonse bali 276 bakalinga mubwaato bakacikonsha kushika kwiitala. Bamwi bakasamba njabwe lyalo bamwi bakatanta pashimipulanga shakapasuka kuswa kubwaato. Bantu baku Molita bakabalama kabotu akubakunkila mulilo kwaamba ayi bayote.

Ndipakeenda myeenshi yotatwe masoja akatola Paulo ku Loma mu bwaato bumwi. Ndyaakashika, bamakwesu bakesa mukumubona. Paulo ndyaakababona, wakalumba Yehova akuyuminishikwa. Nabi kwaamba Paulo wakalinga kaili, bakamusuminisha kukala muŋanda ya lenti, kaalindililwa amusoja. Wakeekala muŋanda ya lenti kwamyaaka yobilo. Bantu bakalinga kusa mukumubona, wakalinga kubashimikila pa Bwaami bwakwe Lesa akubaiisha pali Yesu. Alimwi Paulo wakalinga kulembela makalata mabungano aku Esha Maina aku Judeya. Ncakwiila Yehova wakasebensesha Paulo kushimikila makani abotu mushishi shiinji.