Kwiisha Kusebensesha Buloshuwa ya Makani Abotu
1. Ino buloshuwa ya Makani Abotu yakalembwa buyani?
1 Mbuli mbotwakabandika mu Mulimo wesu wa Bwami wa mu July, buloshuwa ya Makani Abotu Kuswa Kuli Lesa ncisebensesho cisuniki abuumbi! Malembo alimo atondeshekwabo kwakubula kwalembela limwi kwaamba ayi mwine ŋanda asangalale akwiiya kuswa mu Baibo. Nabi mabuku esu aanji alilembetwe munshila yakwaamba ayi shikubelenga inga weeya mwiine, sombi libuku ili lilipuseneko mukwiinga lyakalembwa kwaamba ayi utobelenga ulyeelete kwiishikwa amufundishi. Aboobo, na twapa muntu, tulyeelete kumutondesha mbotwiiya kwaamba ayi abone mbocisangalasha kwiiya makani abotu amu Baibo.—Mate. 13:44.
2. Ino inga twasebensesha buyani buloshuwa ya Makani Abotu na twacana muntu?
2 Ciindi cakutaanguna: Inga mwaamba ayi: “Ndamweendela mukwiinga bantu baanji balalisukama sha makani abuumi mbweshi bukabe kunembo. Sa mutooyeeya ayi shintu shilaakubawo kabotu? [Amulindile bakumbule.] Baibo ilicite makani abotu eenga atupa kulangila. Amubone miipusho Baibo njoikumbula.” Amumupe buloshuwa mwiine ŋanda, akumwaambila ayi asaleewo mwiipusho womwi payeyo ili kwisule lya kava. Lyalo amumutondeshe mbotwiiya kwiinda mukusebensesha palagilafu yakutaanguna muciiyo ncasala. Nshila imwi nkwiipusha mwiipusho mwiine ŋanda kuswa muciiyo comwasala, akumutondesha buloshuwa mboicafwa kucana cikumbulo kuswa mu Baibo. Na kuli vidyo pa jw.org yeelela ciiyo ico, inga mwamutondesha.
3. Amupandulule mbweenga mwasebensesha buloshuwa ya Makani Abotu ndyemutokwiisha.
3 Mbweenga Mwacita Ciiyo: (1) Amubelenge mwiipusho ucite namba kwaamba ayi mucafwe mwiine ŋanda kubikila maano ku makani anene. (2) Amubelenge palagilafu itokonkaawo. (3) Amubelenge malembo alembetwe panshi lya palagilafu, akwiipusha miipusho yeenga yacafwa mwiine ŋanda kubona malembo mbwatokumbula mwiipusho ngomwabelenga pakutaanguna. (4) Na mapalagilafu ngobilo pa mwiipusho womwi, amucite bweenka mbuli mbotwaamba pa 2 alimwi 3. Na vidyo itokwelela mwiipusho alimwi tamuna kumutondesha mwiine ŋanda, amucite boobo ndyemutobandika. (5) Mukumanisha, amwiipushe mwiine ŋanda kwaamba ayi akumbule mwiipusho ucite namba kwaamba ayi mushinishe na wanyumfwishisha.
4. Ino nciinshi ceenga catucafwa kusebensesha kabotu buloshuwa iyi?
4 Amushibe kabotu mbweenga mwasebensesha cisebensesho ici cisuniki abuumbi. Amucisebenseshe paciindi cili coonse ceelete. Kamutana kuya mukwiisha, amumuyeeye shikwiiya wanu, amuyeeye mbweenga mwamucafwa kunyumfwishisha ambweenga mwasebensesha kabotu malembo ali muciiyo. (Tus. 15:28; Milimo ya Batumwi 17:2, 3) Kwiinda kwaciindi, mulaakubona ayi ncakwiila buloshuwa iyi ncisebensesho cibotu cakwiishilaako bantu cancine!