Sheenga Shatucafwa Kushimikila Kabotu—Kwiisha Shikwiiya Kubelenga Baibo Munshila Icafwa
Mulandu Ncociyandikila: Kwaamba ayi akule akuya panembo lwakumushimu, shikwiiya Baibo taeelete kushibabo shiiyo shitaanshi sha makani akwe Lesa. (Ebu. 5:12–6:1) Kwiiya kulisuniki kweelesha cankusu. Ici cilabikilisha kucatanya makani apya ku ayo ngomushi kale alimwi akushiba mbweenga amucafwa. (Tus. 2:1-6) Kwaamba ayi shikwiiya acikoonshe kukumbula miipusho yamu Baibo kwiinda mukusebensesha mabuku esu, ulyeelete kucana ciindi cakuyandoola shikumbulo mumabuku aya. Kweelesha cankusu kusebensesha nshatokwiiya kulaakumucafwa kulwana masunko ali woonse mubuumi bwakwe bwa Bwineklistu.—Luka 6:47, 48.
Nsheenga Twacita:
• Amumucafwe kushiba kwaamba ayi katana kutalika kwiiya ulyeelete kusenga lucafwo lwakwe Yehova kwiinda mumupailo.—Joni 14:26; 1 Koli. 2:10.
• Kuswabo pabushiku bwakutaanguna kwiiyaakwe, amumuyuminishe kulibambila ciiyo ca Baibo. Amusebenseshe libuku lyanu kumwiisha mbweenga wacana shikumbulo.
• Amumuyiishe kukumbula mumaswi aakwe. Ciiyo ca Baibo taceelete kubabo anga ndubasu lwakwiipusha miipusho ashikumbulo shakubelengabo kuswa mulibuku.
• Amumuyuminshe shikwiiya wanu kubelenga maswi akwe Lesa bushiku abushiku. Amumutondeshe mulongo wakubelenga Baibo ucanika pa jw.org, na mu Ngazi Yamulindizi ya August 1, 2009, mape. 15-18 (CN) utondesha nshila icafwa kucita boobo. Kuba acilabo cakubelenga Baibo bushiku abushiku kulisuniki kubikilaako maano alimwi kucita boobo kulaleta mpindu.—Kulu. 1:2, 3.
• Amumutondeshe shikwiiya wanu mbweenga wasebensesha Watchtower Laibulali na Watchtower LAIBULALI YA PA INTANETI kucana shikumbulo sha miipusho yamu Baibo. Amumucafwe kushiba meena amubufwaafwi amabuku ngotusebensesha kumabungano.
Amweeleshe Kucita Sheeshi Mweenshi Uno:
• Na mwamanisha kwiiya kamutwi nabi capita, amumwiipushe shikwiiya Baibo wanu kwaamba ayi aambe nsheeya mumaswi aniniibo. Na tamucite shikwiiya, amweeleshe kubona mbweenga mwaamba mubufwaafwi nshemwabelenga kuswa mulubasu lwa Baibo na palagilafu yamu Ngazi Yamulindizi, kucita boobo kulaakumucafwa kunyumfwisha nshemubelenga.