Amukonkele Cikoshanyo Cabashinshimi—Abakuku
1. Ino ngumulandu nshi inga twalinyumfwa mbuli Abakuku mbwaakalinyumfwa?
1 Shintu shibiibi ndyeshitofulilaako mucishi citushingulukite, inga twalinyumfwa bweenka mbuli Abakuku mbwaakalinyumfwa, ndyaakepusha Yehova ayi: “Ceebonshi mulanengesha kubona shintu shitaluleme? Ceebonshi mulalangilishabo shilubo sha mushobo uyu?” (Hab. 1:3; 2 Timo. 3:1, 13) Kuyeeya pa makani akwe Abakuku alimwi acikoshanyo cakwe cibotu cakushomeka inga catucafwa kuyuma ndyetutolindila bushiku bwakwe Yehova bwakoombolosha.—2 Pita. 3:7.
2. Ino munshiku shino inga twatondesha buyani ayi tulashomeka?
2 Amube Bantu Bashomeka: Muciindi cakulisukama abuumbi pamulandu washibiibi, Abakuku wakabikila maano abuumbi buumi bwakwe bwakumushimu. (Hab. 2:1) Yehova wakaambila mushinshimi wakwe cakushinisha ayi maswi Akwe alaakukumanishikwa paciindi ceelete alimwi akwaamba ayi “mululami ulaakuba abuumi pamulandu wakushomeka kwakwe.” (Hab. 2:2-4, NW) Ino ici cilaamba anshi ku Beneklistu bekala munshiku shino shamamanino? Cintu ciyandika abuumbi teshi kushiba ayi mamanino alaakusa lili sombi kushoma kwaamba ayi alaakusa. Lushomo inga lwatucafwa kutolelela kubikila maano buumi bwesu bwakumushimu akushimikila.—Ebu. 10:38, 39.
3. Ino ngumulandu nshi tulyeelete kutolelela kusebensela Yehova calusangalalo?
3 Amusekelele Muli Yehova: Lushomo lwesu lulaakusunkwa Gogi wakucishi ca Magogu ndyeshi akabukile bantu bakwe Yehova. (Ese. 38:2, 10-12) Nkondo ilaleta mapensho, nabi kubaabo bakoma. Shakulya inga shaceya, buboni kusoweka, abukalo kuya panshi. Ino tulaakucita buyani na mapensho akatalike? Abakuku wakalinga kulangila mapensho, aboobo wakashinisha kutolelela kusebensela Yehova calusangalalo. (Hab. 3:16-19) “Lusangalalo lwakwe Yehova” lulaakutucafwa kuyuma ciindi camapensho atoosa kunembo.—Neye. 8:10; Ebu. 12:2, NW.
4. Ino inga twaba alusangalalo nshi pacecino ciindi alimwi akunembo?
4 Abo Yehova mbweshi akapulushe pa bushiku bwakwe bwa koomboloshi balaakutolelela kwiishikwa nshila shakwe Lesa sha buumi. (Hab. 2:14) Abo beshibakabushikwe abalo balaakwiiya pali Yehova. Nabi pacecino ciindi atwaambileko bamwi makani akwe Yehova ancito shakwe shibotu!—Kulu. 34:1; 71:17.