Amushitilishe Cikwati Canu

Yehova alabona shishomesho beebene nshebakapangana ayi shilayandika abuumbi. Alimwi wakaamba ayi musankwa amwanakashi beebene tabeelete kulekana. (Mate. 19:5, 6) Pakati kabantu bakwe Lesa, palacanika beebene baanji basangalete mumikwashi yabo. Nacibi boobo, taakuwo beebene bamaninite alimwi boonse balacana mapensho. Mubupusano abantu baanji mbobabona, swebo tatweelete kunoobona ayi kulekana alimwi akupansaana njenshila ibotu yakumana mapensho mucikwati. Ino Beneklistu beebene inga bashitilisha buyani cikwati cabo?

Amubone nshila shiyandika shosanwe sheenga shamucafwa.

1. Amushitilishe moyo wanu kwiinda mukuleya shintu sheenga shanyonyoola cikwati canu mbuli kukumbwa muntu ngomutebeenaakwe alimwi akweebela shintu shileta miyeeyo yakoonana.​—Mate. 5:28; 2 Pita 2:14.

2. Amuyumye bushicibusa bwanu a Lesa, akunoosebensa cankusu kwaamba ayi cikwati canu cinoosangalasha Yehova.​—Kulu. 97:10.

3. Amutolelele kufwala buntu bupya, alimwi akucita tuntu tuniini niini tutondesha ayi mulibasuni abo mbomweebenaabo. Kucita boobo kulaakusangalasha mbomweebenaabo.​—Kolo. 3:8-10, 12-14.

4. Munoobandikishanya cabulemu lyoonse alimwi cakwaanguluka.​—Kolo. 4:6.

5. Munotondesha lusuno ndyemutokumanisha mukuli wanu kubaabo mbomweebenaabo na cesa kumakani akoonana.​—1 Koli 7:3, 4; 10:24.

Na Beneklistu kabalemeka cikwati, balatondesha bulemu kuli Yehova, uyo wakatalikisha cikwati.

AMWEEBELE VIDYO ICITE MUTWI UTOKWAAMBA AYI TULYEELETE “KUCICA CAKULIYUMYA”​—AMUCICE KWEELANA AMILAWO, LYALO AKUBANDIKA MIIPUSHO ITOKONKELAAWO:

• 

  Nabi kwaamba ayi cikwati cilatalika kabotu, ino ngamapensho nshi beebene ngeenga bacana?

• 

  Ino njiisho shamu Baibo inga shacafwa buyani beebene balinyumfwa ayi mucikwati cabo tamuwo lusuno?

• 

  Ino njimilawo nshi Yehova njaakabika pamakani acikwati?

• Ino nshiinshi beebene nshobeelete kucita kwaamba ayi mucikwati mube lusangalalo?