Mbweenga Boonse Mulibungano Bacafwa Beshikwiiya Baibo Kuya Panembo Akubombekwa

1-2. Ino mbaani beenga bacafwilisha shikwiiya Baibo kuya panembo akubombekwa?

BA Amy bekala kucishi ca Fiji bakaamba ayi: “Ndakalinga kukondwa anshendakalinga kwiiya kuswa mu Baibo. Ndakalinga kucishi kwaamba ayi nshancine. Ano ndyendakatalika kucanika pomwi abamakwesu abenankashi, cakancafwa kwaalula buumi bwangu akubombekwa.” Ici cilatwiisha cintu comwi ciyandika: Shikwiiya Baibo inga watolelela kuya panembo lwakumushimu na libungano lyamucafwa.

² Shikushimikila uliwoonse inga wacafwilisha bapya kuya panembo. (Efe. 4:16) Painiya waliina lya Leilani, ukala ku Vanuatu, wakaamba ayi: “Kuli mwaambo waamba ayi; mushi woonse ulacafwilisha kwaamba ayi mwaana akule kabotu. Ntoobona ayi ubu mbocibete akucafwa bantu kuba bashikwiiya; cilatola kusebensela pomwi kwa libungano kwaamba ayi muntu ese mucancine.” Aboobo kwaamba ayi mwaana akule, alayandika lucafwo kuswa kubashali, beshikamukowa, beshicibusa, alimwi abamatica kucikolo. Balacita boobo kwiinda mukumuyuminisha akumwiisha shiiyo shiyandika. Amulibungano mbocibete. Bamakwesu abenankashi inga bacafwa shikwiiya kwiinda mukumupandako maano, kumuyuminisha, alimwi akutondesha cakubonenaako cibotu ceenga camupa kuya panembo akubombekwa.​—Tus. 15:22.

3. Ino nshiinshi nshomweeya kuswa kumakani akaamba ba Ana, ba Dorin, alimwi aba Leilani?

³ Ino nceebonshi shikushimikila ucite ciiyo ca Baibo alyeelete kusangalala na bamwi mulibungano balisuni kucafwa shikwiiya wakwe? Amunyumfwe shakaamba painiya ulibetele waliina lya Ana uyo ukala ku Moldova. Wakaamba ayi, “Muntu womwi inga taacikonshi kucafwa shikwiiya Baibo na watalika kuya panembo.” Mukwesu Dorin, alakwe painiya ulibetele mucishi ca Moldova wakaamba ayi, “Liinji cilacitika ayi sheenga shaamba shikushimikila umwi nebo nshentana kuyeeyawo, nsheenga shamushika pamoyo shikwiiya Baibo.” Ba Leilani abalo bakaamba ayi, “Kutondeshekwa lusuno alimwi akuyuminishikwa nkweenga shikwiiya watondeshekwa inga kwamucafwa kulinyumfwa kuba lubasu lwa bantu bakwe Yehova.”​—Joni 13:35.

4. Ino tutokwiiya nshi mumutwi uyu?

⁴ Nacibi boobo, mpashi inga mwaliipusha ayi, ‘Ino inga ndacikonsha buyani kucafwa shikwiiya Baibo kuya panembo na teshi ndime weshi kumwiisha?’ Amuleke tubandike nsheenga twaciita na twaya abamwi kuciiyo ca Baibo alimwi na shikwiiya watalika kusa kumabungano. Alimwi tutokwiiya ansheenga bamanene bacita kwaamba ayi bacafwe shikwiiya Baibo kuya panembo akubombekwa.

NA MWAYA AUMWI KUCIIYO CAKWE CA BAIBO

5. Ino ngumukuli nshi ngomucite na mwaya aumwi kuciiyo ca Baibo?

⁵ Shikushimikila utokwiisha ngoocite mukuli wakucafwa shikwiiya Baibo kunyumfwishisha Maswi akwe Lesa. Na shikushimikila umwi wamusenga ayi muye akwe kuciiyo cakwe, mulyeelete kulibona mbuli mucafwi. Mukuli wanu ngwakumucafwa. (Shiku. 4:9, 10) Ano ino nshiinshi nsheenga mwaciita kwaamba ayi mumucaafwe kabotu?

6. Na mwaya aumwi kuciiyo cakwe ca Baibo, ino njiisho njetucana palilembo lya Tushimpi 20:18 inga mwaikonkela buyani?

⁶ Amulibambile limwi kamutana kuya kuciiyo ca Baibo. Cakutaanguna, amusenge shikushimikila ngomutooyaakwe kumulwiitako paniini pali shikwiiya wakwe. (Amubelenge Tushimpi 20:18.) Mpashi inga mwamwiipusha ayi: “Ino ngamakani nshi ngomushi pabuumi bwakwe shikwiiya? Ino ngumutwi nshi ngomutooya mukwiiya akwe? Ino nciinshi ncomusuni ayi anyumfwishe pamutwi uyu? Sa kuli cimwi nconteelete kucita na kwaamba ndyetuli paciiyo? Ino nciinshi ceenga cayuminisha shikwiiya kuya panembo?” Nacibi boobo, ici tacaambi ayi alyeelete kumulwita makani ngomuteelete kushiba pali shikwiiya Baibo, sombi nsheenga wamulwiita inga shamucafwa abuumbi. Ba Joy basebensa mbuli mishonali balabandika makani mbuli aaya abaabo mbobatooyabo kuciiyo ca Baibo. Bakaamba ayi: “Makani aya alacafwa wooyo ngontosebensaakwe kuba alusuno lwakucafwa shikwiiya Baibo alimwi akusalila limwi nsheenga waamba ndyetuli paciiyo.”

7. Ino nceebonshi mulyeelete kulibambila kamutana kuya aumwi kuciiyo cakwe ca Baibo?

⁷ Na umwi wamusenga ayi mukaye akwe kuciiyo cakwe ca Baibo, inga cabota kulibambila limwi mutwi ngwatooya mukwiisha. (Esila 7:10) Mukwesu Dorin, uyo ngotwaambawo kumatalikilo, wakaamba ayi: “Ndakondwa na uyo ngontooyaakwe walibambila limwi. Kucita boobo kulacafwa kwaamba ayi aambe shicafwa paciiyo.” Kwiilikaawo, shikwiiya alabona ayi noonse mwalibambila kabotu ciiyo, alimwi ici cilaba cakubonenaako cibotu kuli nguwe. Nabi kwaamba ayi inga tamucikoonshi kulibambila cakushikaawo, amucane ciindi cakunyumfwishisha kabotu shiteente shinene shili muciiyo.

8. Ino inga mwacita buyani kwaamba ayi munokwaamba shicafwa ndyemutopaila paciiyo ca Baibo?

⁸ Mupailo ndubasu luyandika abuumbi paciiyo ca Baibo, aboobo amuyeeyele limwi nsheshi mwaambe na bamusenge ayi mupaile. Kucita boobo kulaakumucafwa kwaamba mupailo uyuminisha. (Kulu. 141:2) Ba Hanae, bekala ku Japan, baciibaluka mipailo yakalinga kwaamba nankashi wakalinga kusa ashikubaiisha Baibo. Bakaamba ayi: “Ndakabona kwaamba ayi wakalinga kucite bushicibusa buyumu a Yehova, aboobo anebo ndakalinga kusuni kuba mbuli nguwe. Alimwi ndakalinga kunyumfwa kabotu na waamba liina lyangu ndyaatopaila.”

9. Kweelana a Jemusi 1:19, ino inga mwacita buyani na mwaya aumwi kuciiyo cakwe ca Baibo?

⁹ Amucafwe shikwiisha ndyatoocita ciiyo ca Baibo. Nankashi waliina lya Omamuyovbi painiya ulibetele ukala ku Nigeria wakaamba ayi: “Uyo ngowayaakwe kuciiyo inga waamba shicafwa abuumbi, nacibi boobo, taeelete kwaamba bunene, mukwiinga alicishi ayi shikwiisha ngototanjilila ciiyo.” Ano ino inga washiba buyani ndyeenga waambawo alimwi ansheenga waamba paciiyo? (Tus. 25:11) Amukutike cakubikila maano shikwiisha ashikwiiya Baibo ndyebatobandika. (Amubelenge Jemusi 1:19.) Kucita boobo nkweenga kwamucafwa kushiba ndyeenga mwaambawo. Nacibi boobo, mulyeelete kutaanguna kuyeeyawo kamutana kwaamba. Kucakubonenaako, inga tacibi kabotu kwaamba bunene, kutalika kwaamba shikwiisha kaacaamba na kuleta makani amwi. Sombi inga mwacafwa shikwiiya Baibo kwiinda mukwaambawo paniini, kwaamba cikoshanyo, kwiipusha mwiipusho, na kusansulula citeente citokwaambwawo. Cimwi ciindi inga mwalinyumfwa anga taakuwo nceenga mwaambawo pamutwi utobandikwawo. Nacibi boobo, kumulumbabo shikwiiya Baibo inga kwamupa kulinyumfwa ayi mulamubikila maano alimwi ici inga camucafwa kuya panembo.

10. Ino kulwiita shikwiiya Baibo nshemwakeendaamo inga kwamucafwa buyani?

¹⁰ Amwaambe nshemwakeendaamo. Na inga camucafwa shikwiiya Baibo, mpashi inga mwabandikawo paniini mbomwakeeya cancine, mbomwakakoma lipenshi limwi, na Yehova mbwaamucafwa mubuumi bwanu. (Kulu. 78:4, 7) Mpashi kunyumfwa nshemwakeendaamo nkweenga kwacafwa shikwiiya. Mpashi inga kwayumya lushomo lwakwe na kupa kwaamba ayi atolelele kuya panembo akubombekwa. Alimwi mpashi nkweenga kwamucafwa kushiba nsheenga wacita kwaamba ayi akome bweelesho mbwatokwiindaamo. (1 Pit. 5:9) Ba Gabriel bekala kucishi ca Brazil, pacecino ciindi batoosebensa mbuli painiya, balebaluka mbobakacafwikwa ndyebakalinga kwiiya Baibo. Bakaamba ayi: “Ndyendakanyumfwa shakeendaamo bamakwesu, ndakeeyawo kwaamba ayi Yehova alishi mapensho ngotwiindaamo. Alimwi na bakacikonsha kwaakoma, nkokwaamba ayi anebo inga ndacikonsha.”

SHIKWIIYA BAIBO NDYESA KUMABUNGANO

11-12. Ino nceebonshi tulyeelete kumutambula camaansa obilo shikwiiya Baibo na wesa kumabungano?

¹¹ Kwaamba ayi shikwiiya Baibo aye panembo akubombekwa, alyeelete kunoosa kumabungano lyoonse akufubilaamo. (Ebu. 10:24, 25) Shikumwiisha ngoweelete kutaanguna kumwiita ayi akese kumabungano. Ano na wesa kumabungano, soonse inga twamuyuminisha kwaamba ayi atolelele kusa ku Ŋanda ya Bwaami. Ino nshiinshi nsheenga twaciita?

¹² Amumutambule camaansa obilo. (Loma. 15:7) Na shikwiiya Baibo walinyumfwa kutambulwa kabotu ndyesa kumabungano, inga wasuna kutolelela kusa ku Ŋanda ya Bwaami. Kwakubula kumupa kulinyumfwa cibiibi, amumutambule camaansa obilo, akumushibisha kubamwi. Muciindi cakuyeeya ayi shikumwiisha atomulama, amubandikaakwe mukwiinga inga caba ayi shikumwiisha taana kushika na mpashi atoolama mikuli imwi. Amubikile maano kushesho nshaatokwaamba, akutondesha ayi mulamubikila maano. Ino nciinshi ceenga cacitika na mwamutambula camaansa obilo? Amunyumfwe shakaamba ba Dmitrii, bakabombekwa myaaka iniini yaiinda alimwi pacecino ciindi batoosebensa mbuli musebenshi ucafwilisha. Kwaamba paciindi cakutaanguna ndyebakesa kumabungano, bakaamba ayi: “Mukwesu umwi ndyakambona kanindilila caboowa pansengwe lya Ŋanda ya Bwaami, wakesa lyalo twakenjilila pomwi. Baanji bakesa mukuŋansha. Ndakakankamana. Ndakanyumfwa kabotu abuumbi cakwaamba ayi ndakayeeya ayi inga cabota kunobungana bushiku abushiku. Nshina kulinyumfwawo kale bobulya.”

13. Ino cakubonenaako canu inga camucafwa buyani shikwiiya Baibo?

¹³ Amube cakubonenaako cibotu. Cakubonenaako canu cibotu inga cacafwa shikwiiya Baibo kushoma kwaamba ayi tuli Beneklistu bancine. (Mate. 5:16) Ba Vitalii, basebensa mbuli painiya waciindi coonse bekala ku Moldova, bakaamba ayi: “Ndyendakabona bamulibungano bamwi mbobakalinga kukala, kuyeeya alimwi akucita shintu, ndakashoma ayi Bakamboni Bakwe Yehova mbobupailishi bwancine.”

14. Ino cakubonenaako canu inga camucafwa buyani shikwiiya Baibo kutolelela kuya panembo?

¹⁴ Kwaamba ayi shikwiiya Baibo eelele kubombekwa, alyeelete kukonkela nshatokwiiya. Ano ici teshi cuubu. Nacibi boobo, na shikwiiya Baibo wabona kukonkela njiisho shamu Baibo mbokwamucafwa, inga wasuna kukonkela cakubonenaako canu. (1 Koli. 11:1) Amuyeeye shakacitikila ba Hanae, abo mbotwaambawo kumatalikilo. Bakaamba ayi: “Bamakwesu abenankashi bakalinga cakubonenaako cibotu cashintu nshendakalinga kwiiya. Ndakabona mbweenga ndayuminisha bamwi, kulekelela alimwi akutondesha lusuno. Lyoonse bakalinga kwaamba shibotu pa bamwi. Ndakalinga kusuni kukonkela cakubonenaako cabo.”

15. Ino Tushimpi 27:17 ilatucafwa buyani kubona ncociyandikila kuba bushicibusa a shikwiiya Baibo ndyatolelela kusa kumabungano?

¹⁵ Amube shicibusa wakwe shikwiiya Baibo. Shikwiiya Baibo ndyatolelela kusa kumabungano, amutolelele kutondesha ayi mulamubikila maano. (Filip. 2:4) Amubandikaakwe kwaamba ayi mumushibe kabotu. Inga mwamulwiita mbomukondetwe ceebo cakuya panembo kwakwe, akumwiipusha mbwaatofubilaamo muciiyo ca Baibo, shintu mboshitokweenda mumukwashi wakwe alimwi akuncito. Nacibi boobo, amuleye kumwiipusha miipusho yeenga yamulensha nsoni. Kucita boobo inga kwayumya bushicibusa bwanu anguwe. Kuba bushicibusa a shikwiiya Baibo, inga kwamucafwa kuya panembo akubombekwa. (Amubelenge Tushimpi 27:17.) Pacecino ciindi ba Hanae batosebensa mbuli painiya waciindi coonse. Kwaamba paciindi cakutaanguna ndyebakatalika kusa kumabungano, ba Hanae bakaamba ayi: “Ndyendakatalika kuba abeshicibusa mulibungano, lyoonse ndakalinga kulangila kucanika kumabungano, alimwi nshindakalinga kulofwawo nabi kaandemete. Ndakalinga kusangalala kuba pomwi abeshicibusa bangu bapya, alimwi ici cakancafwa kumana bushicibusa abantu batakalinga kupaila Yehova. Ndakalinga kusuni kuba abushicibusa buyumu a Yehova alimwi abamakwesu abenankashi. Aboobo ndakasalawo kubombekwa.”

16. Ino nshiinshi shimwi nsheenga mwaciita kwaamba ayi mucafwe shikwiiya Baibo kulinyumfwa kuba lubasu lwa libungano?

¹⁶ Shikwiiya ndyatolelela kuya panembo, amumucaafwe kulinyumfwa kuba lubasu lwa libungano. Inga mwamwiitako kukubungana abamwi. (Ebu. 13:2) Kuyeeya paciindi ndyebakalinga kwiiya Baibo, ba Denis, bekala ku Moldova, bakaamba ayi: “Liinji, nebo amukaangu bakalinga kutwiitako kukubungana abamakwesu. Bakalinga kutulwiitako Yehova mbwakabacafwa, alimwi ici cakalinga kutuyuminisha. Ici cakatupa kuba bashinishite kwaamba ayi tulisuni kusebensela Yehova, alimwi akushoma ayi tulaakucana buumi bubotu na tukacite boobo.” Na shikwiiya Baibo waba shikushimikila, inga mwayaakwe muncito yakushimikila. Mukwesu waliina lya Diego, ukala ku Brazil wakaamba ayi: “Bamakwesu baanji bakalinga kunjitaako kuyaabo muncito yakushimikila. Kucita boobo kwakancafwa kubashiba kabotu, kwiiya shiinji alimwi akulinyumfwa kuba pafwiifwi a Yehova alimwi a Yesu.”

INO BAMANENE INGA BACAFWILISHA BUYANI?

17. Ino nshiinshi bamanene mulibungano nsheenga bacita kwaamba ayi bacafwe beshikwiiya Baibo?

¹⁷ Amucane ciindi cakubandika abeshikwiiya Baibo. Nobamanene, na mwatondesha lusuno akubikila maano ku beshikwiiya Baibo, inga mwabacafwa kuya panembo akubombekwa. Sa inga mweelesha kucana ciindi cakubandika abeshikwiiya Baibo kumabungano lyoonse? Balaakushiba ayi mulababikila maano na mweebaluka liina lyabo, bunene bunene na batalika kukumbulawo. Sa inga mwacanaako ciindi cakuya ashikushimikila kuciiyo cakwe ca Baibo? Na kamutondesha lusuno akubikila maano ku beshikwiiya Baibo, inga mwabacafwa abuumbi. Painiya waliina lya Jackie ukala ku Nigeria, wakaamba ayi: “Beshikwiiya Baibo baanji balakankamana na bashiba kwaamba ayi mukwesu ngondalingaakwe paciiyo ca Baibo ngumunene mulibungano. Shikwiiya Baibo womwi wakaamba ayi ba pasita bangu inga tabacicitiwo ico. Balafwakashilabo babile alimwi na babapa maali!” Pacecino ciindi shikwiiya Baibo uyu wakatalika kucanika kumabungano.

18. Ino bamanene inga bacita buyani kwaamba ayi bakumanishe shilembetwe pa Milimo 20:28?

¹⁸ Amwiishe akuyuminisha beshikushimikila. Nobamanene, mulicite mukuli unene wakucafwa beshikushimikila kushiba bwakushimikila alimwi akwiisha kabotu. (Amubelenge Milimo 20:28.) Na shikushimikila taalinyumfwi kwaanguluka kucita ciiyo ca Baibo ndyemuliiwo, amulyaabe kucita ciiyo ca Baibo. Ba Jackie, mbotwaambawo kale kumatalikilo bakaamba ayi: “Bamanene liinji balanjipusha pa shiiyo shangu sha Baibo. Na ndacana mapensho mukucita ciiyo ca Baibo, balancafwa.” Bamanene inga bacita shiinji kwaamba ayi bayuminishe beshikushimikila. (1 Tesa. 5:11) Ba Jackie bakatolelela akwaamba ayi: “Ndanyumfwa kabotu abuumbi na bamanene banjuminisha akundwiita ayi balalumba pakusebensa cankusu kwangu. Maswi aya alampa kulinyumfwa kabotu bweenka muntu mbwanyumfwa kabotu na wanwa maanshi atontola pesule lyakweenda mulumwi. Alimwi kuyuminisha kwabo kulampa kulinyumfwa kwaamba ayi ndacita kabotu kusebensa cankusu, aboobo ici cilampa kuba alusangalalo ndyentoocita shiiyo sha Baibo.”​—Tus. 25:25.

19. Ino nciinshi ceenga catupa kuba alusangalalo?

¹⁹ Nabi kwaamba ayi pacecino ciindi tatucitewo ciiyo ca Baibo, inga twacikonsha kucafwa bamwi kuya panembo lwakumushimu. Kwakubula kwaambawo bunene, inga twacafwa shikushimikila ndyatoocita ciiyo ca Baibo na twalibambila kabotu. Inga twaba abushicibusa abeshikwiiya Baibo na besa ku Ŋanda ya Bwaami, alimwi inga twabacafwa kwiinda mukutondesha cakubonenaako cibotu. Bamanene inga bayuminisha shiiyo sha Baibo kwiinda mukucana ciindi cakubandikaabo. Alimwi inga bayuminisha beshikushimikila kwiinda mukubacafwa kushiba bwakwiisha kabotu alimwi akubalumba. Tulaba alusangalalo na twacitawo comwi naciceyi kwaamba ayi tucafwe bamwi kusuna alimwi akusebensela Yehova!