Nobashali—Amucafwe Bana Banu Kusuna Yehova

1-2. Ino nceebonshi malembo amwi alaba ayandika abuumbi kuli ndiswe na shintu shaaluka mubuumi bwesu?

PABUSHIKU bwa bwiinga bwabo, musankwa amwanakashi batokweebana balakutika cakubikila maano kulikani lya Baibo lyaamba pamakani acikwati. Malembo aambwa mulikani lya bwiinga nga Malembo batokweebana ngobakanyumfwawo kale. Nacibi boobo, paciindi ici malembo aya alaba ayandika abuumbi kuli mbabo. Ino nceebonshi? Nceebo cakwaamba ayi ngo malembo ngeshi banookonkela mucikwati cabo.

² Ishi shilikoshenye ambociba na Beneklistu beebene baba bashali. Mpashi kwamyaaka iinji bakanyumfwawo makani aamba pakulela baana. Ano na baba bashali makani aya alaba ayandika abuumbi kuli mbabo. Ncakutatoonsha kuba amwaana ngumukuli unene abuumbi! Alimwi na shintu shaaluka mubuumi bwesu, malembo amwi alaba ayandika abuumbi kuli ndiswe. Nceceeco basebenshi bakwe Yehova ncobabelengela alimwi akukutumana kuyeeya pa Malembo ‘lyoonse mubuumi bwabo,’ bweenka mbuli bamaami ba bene Isilaeli mbobakalwiitikwa kucita.​—Duto. 17:19.

3. Ino tutoobandika nshi mumutwi uyu?

³ Nobashali, kwiisha bana banu pali Yehova ncoolwe cinene abuumbi ncomucite, Mwineklistu nceenga wabaaco. Sombi mpashi inga mwasuna kucita shiinji kuteshi kubacafwabo kushiba makani aamba pali Lesa. Inga mwayandika kucafwa bana banu kumusuna abuumbi Yehova. Ino inga mwacita buyani kwaamba ayi mucafwe bana banu kusuna Yehova? Mumutwi uyu tutobandika njiisho shamu Baibo shili 4 sheenga shamucafwa mbuli bashali. (2 Timo. 3:16) Alimwi tutokwiiya akukonkela njiisho ishi mbokwacafwa bashali bamwi Beneklistu.

NJIISHO SHILI 4 SHEENGA SHACAFWA BASHALI

4. Ino nciinshi bashali nceenga bacita kwaamba ayi bacafwe bana babo kusuna Yehova? (Jemusi 1:5)

⁴ Njiisho 1: Amulangoole butanjilishi bwakwe Yehova. Amusenge Yehova kwaamba ayi amupe busongo mbomutoyandika kwaamba ayi mucafwe bana banu kusuna nguwe. (Amubelenge Jemusi 1:5.) Yehova eenkabo ngweenga wamulwiita makani acafwa. Ino nciinshi ncetwaambila boobo? Ceebo ca sheebo shobilo. Cakutaanguna, Yehova ngoocishi kabotu abuumbi kuba mushali ncocaamba. (Kulu. 36:9) Alimwi makani abusongo ngaatulwiita alacafwa lyoonse.​—Isa. 48:17.

5. (a) Ino Yehova alabacafwa buyani bashali? (b) Kweelana ashatondeshekwa muvidyo, ino nshiinshi nshomweeya kucakubonenaako ca Mukwesu a Nankashi Amorim mbobakalela bana babo?

⁵ Yehova alapa bashali makani aanji kuswa mu Baibo ngeenga basebensesha kucafwa bana babo kumusuna. (Mate. 24:45) Kucakubonenaako, inga mwacana makani aanji acafwa mu magazini yamu Chitonga ya Sinsimuka pamutwi utokwaamba ayi “Lucafwo Kumikwashi.” Kwamyaaka iinji makani aya akalinga kucanika mu magazini iyi yakapulintwa. Alimwi pacecino ciindi alacanika pa webusaiti yesu. Kwiilikaawo, kuli mavidyo aanji akwiipusha miipusho alimwi a ashitondesho eenga acafwa bashali kukonkela kululika kwakwe Yehova ndyebatokwiisha bana babo.b—Tus. 2:4-6.

6. Ino mushali musankwa umwi amukaakwe balalinyumfwa buyani pabutanjilishi mbobatambula kuswa kulibunga lyakwe Yehova?

⁶ Bashali baanji balalumba palucafwo Yehova ndwaabapa kwiinda mulibunga lyakwe. Mushali musankwa waliina lya Joe wakaamba ayi: “Teshi cuubu kwiisha cancine baana botatwe. Nebo abakaangu lyoonse tulapaila kuli Yehova kwaamba ayi atucaafwe. Alimwi lyoonse na twabelenga makani na kweebela vidyo kuswa kulibunga itokwaamba pabukaalo mbotutokwiindaamo, tulalinyumfwa ayi twacana makani apaciindi ceelete. Lyoonse tulacinka manungo muli Yehova.” Ba Joe abakaabo bakacana kwaamba ayi makani aya alacafwa bana babo kuyumya bushicibusa bwabo a Yehova.

7. Ino nceebonshi bashali balyeelete kusebensa cankusu kutondesha cakubonenaako cibotu? (Bene Loma 2:21)

⁷ Njiisho 2: Amutondeshe cakubonenaako cibotu. Baana balalangilisha bashali babo cakubikila maano alimwi liinji balakonkela cakubonenaako cabo. Kwalo ncakwiila taakuwo mushali umaninite. (Loma. 3:23) Nacibi boobo, bashali balyeelete kucita nsheenga bacikonsha kwaamba ayi batondeshe cakubonenaako cibotu kubana babo. (Amubelenge Bene Loma 2:21.) Kulansha pa baana, mushali umwi wakaamba ayi: “Baana balakonkela nshobabona kuli ndiswe.” Wakeelikaawo akwaamba ayi: “Balatulwiita na shintu nshetwaamba tasheendelani ashintu nshetubaiisha.” Aboobo na tulisuni kwaamba ayi tucafwe bana besu kusuna Yehova, cilyeelete kubonekela patuba kwaamba ayi aswebo tulimusuni abuumbi Yehova.

8-9. Ino mweeya nshi pamakani akaamba ba Andrew aba Emma?

⁸ Kuli shiinji bashali nsheenga bacita kwaamba ayi bacafwe bana babo kusuna Yehova. Mukwesu ucite myaaka 17 waliina lya Andrew wakaamba ayi: “Bashali bangu lyoonse bakalinga kuncafwa kubona kuyandika kwa kupaila. Lyoonse mashiku kaantana koona bata bakalinga kusa mukupaila pomwi andime, nabi bacana kwaamba ayi ndapaila kale neenka. Lyoonse bakalinga kutwiibalusha ayi: ‘Inga wabandika a Yehova mankanda ali woonse ngoosuni.’ Ici cakampa kubona kwaamba ayi kupaila ncintu ciyandika abuumbi. Aboobo pacecino ciindi kupaila ncuubu kuli ndime alimwi kulampa kulinyumfwa ayi Yehova ngu mushali unsuni.” Nobashali, mutaluubi kwaamba ayi lusuno lwanu pali Yehova inga lwacafwa bana banu abalo kusuna Yehova.

⁹ Amuyeeye pacakubonenaako ca nankashi waliina lya Emma. Baishi ndyebakaswa paŋanda, bakashiya nkongole shiinji isho banyina nshobakalinga kuyandika kulipila. Wakaamba ayi: “Liinji bama tabakalinga kubaawo amaali, nacibi boobo, lyoonse bakalinga kwaamba Yehova mbwabikila maano ku basebenshi bakwe akubapa nshebayandika. Shintu nshobakalinga kucita shakalinga kuncafwa kubona kwaamba ayi ncakwiila bakalinga kushoma nshobakalinga kwaamba. Bama bakalinga kukonkela shintu nshobakalinga kundwiita.” Ino nshiinshi nsheenga tweeyawo? Bashali inga bacikonsha kwiisha bana babo kwiinda mucakubonenaako cabo nabi ndyebali mubukaalo buyumu.​—Gala. 6:9.

10. Ino ndilili bashali bene Isilaeli baanji ndyebakalinga kuba acoolwe cakubandika abana babo pali Yehova? (Dutolonomi 6:6, 7)

¹⁰ Njiisho 3: Amucane ciindi cakubandika abana banu lyoonse. Yehova wakalwiita bene Isilaeli kwiisha bana babo pali nguwe lyoonse. (Amubelenge Dutolonomi 6:6, 7.) Bushiku boonse bashali aba bakalinga kucite coolwe cakubandika abana babo alimwi akubacafwa kusuna Yehova. Kucakubonenaako, musankwa wacanike mwine Isilaeli mpashi wakalinga kutola ciindi cilaamfu kucafwa baishi kushanga na kutebula shishango. Mpashi nankashi yakwe wakalinga kutola ciindi cilaamfu kucafwa banyina kutunga, kupanga shakufwala, alimwi anciito shimwi shapa lubaansa. Cilyeelete ici cakalinga kupa coolwe bashali abaana kubandika pamakani aanji ndyebatoosebensela pomwi. Kucakubonenaako, mpashi bakalinga kubandika pa bubotu bwakwe Yehova alimwi ambwakalinga kucafwa mukwashi.

11. Ino ncoolwe nshi cimwi nceenga bashali Beneklistu basebensesha kubandika abana babo?

¹¹ Pacecino ciindi, shintu shilipuseneeko amboshakalinga kale kale. Mushishi shiinji, bashali abaana tabacaniki pomwi bushiku boonse. Inga caba ayi bashali bali kuncito, abalo baana bali kucikolo. Aboobo bashali balyeelete kucana ciindi cakubandika abana babo. (Efe. 5:15, 16; Filip. 1:10) Coolwe comwi nceenga mukwashi waba pomwi akubandika nciindi ndyebatoocita kulambila kwa mukwashi. Mukwesu wacanike waliina lya Alexander wakaamba ayi: “Lyoonse bata balabika bubaambo bwa kulambila kwa mukwashi, alimwi balashinisha kwaamba ayi taakuwo cili coonse ceenga capilinganya ciindi ici ndyetuba pomwi. Pesule lya kulambila kwa mukwashi tulekalabo akutalika kubandika.”

12. Ino mushali musankwa alyeelete kuleya nshi ndyebatoocita kulambila kwa mukwashi?

¹² Ino mushali musankwa inga wacita buyani, kwaamba ayi baana banoosangalala pakulambila kwa mukwashi? Mpashi inga mwabika bubaambo bwa kwiiya abana banu libuku lyesu libotu abuumbi lya Amusangalale Abuumi Kwamuyayaya! Libuku ili inga lyamupa coolwe cibotu abuumbi cakubandikishanya. Kwaamba ayi bana banu babe baangulukite kwaamba nshebatoyeeya, amuleye kubalulika na kubakalalila paciindi ndyemutoocita kulambila kwa mukwashi. Alimwi amweeleshe kuleya kukalala na bana banu baamba muyeeyo uteendelani anjiisho shamu Baibo. Muciindi cakukalala, amusangalale kwaamba ayi bamulwiita lushinisho lwa mbobatoyeeya. Alimwi amubayuminishe kuba baangulukite kucita boobo. Cilaba cuubu kucafwa bana banu na kamucishi mbobalinyumfwa.

13. Ino ndilili ndyeenga bashali bacafwa bana babo kuyumya bushicibusa bwabo a Yehova?

¹³ Nobashali, bushiku buli boonse amweeleshe kucana ciindi cakucafwa bana banu kuyumya bushicibusa bwabo a Yehova. Inga mwaiisha bana banu pali Lesa wesu shilusuno ciindi cili coonse kuteshibo ndyemutoobaiisha Baibo. Mushali mwanakashi waliina lya Lisa wakaamba ayi: “Twakaiisha bana besu pali Yehova kwiinda mukusebensesha shili shoonse nshetwabona pafwiifwi. Kucakubonenaako, na kabwa wesu wacita cintu cimwi cabasekesha, twakalinga kubalwiita kwaamba ayi ici cilatondesha ayi Yehova ngu Lesa usangalete. Alimwi ngowakapa kwaamba ayi aswebo tunooba basangalete akuseka na twabona shintu shimwi shisekesha.”

14. Ino nceebonshi bashali balyeelete kucafwa bana babo kusala kabotu beshicibusa? (Tushimpi 13:20)

¹⁴ Njiisho 4: Amucafwe bana banu kuba abeshicibusa bali kabotu. Baibo ilaamba cakuteenda mweela kwaamba ayi beshicibusa inga batucafwa kucita kabotu na kutacita kabotu. (Amubelenge Tushimpi 13:20.) Nobashali, sa beshicibusa ba bana banu mulibeshi? Sa mwakababonaawo kale akucana ciindi ca kubashiba kabotu? Ino inga mwacita buyani kwaamba ayi mucafwe bana banu kucana beshicibusa basuni Yehova? (1 Koli. 15:33) Inga mwacafwa bana banu kuba abeshicibusa bali kabotu, kwiinda mukwiitako bamwi batoocita kabotu lwakumushimu, ndyemutoocita shintu shimwi shakumushimu.​—Kulu. 119:63.

15. Ino bashali inga bacita buyani kwaamba ayi bacafwe bana babo kucana beshicibusa bali kabotu?

¹⁵ Amuyeeye pa cakubonenaako ca mushali musankwa waliina lya Tony. Wakaamba nshaakacita amukaakwe kwaamba ayi bacafwe bana babo kuba abeshicibusa bali kabotu. Wakaamba ayi: “Kwamyaaka iinji nebo abakaangu tuleetako bamakwesu abenankashi bapusenepusene, bacanike alimwi abacinene. Tulabeetako kucakulya alimwi akucitaabo kulambila kwa mukwashi. Iyi njenshila ibotu icafwa kushiba baabo basuni Yehova alimwi bamusebensela calusangalalo. Twakalinga kucite coolwe ca kwiitako bamatanjilili balubasu, bamishonali, alimwi abamwi kuŋanda yesu. Bana besu bakeeya shiinji ku cakubonenaako ca bamakwesu abenankashi aba pamakani akulyaaba kwabo alimwi akusebensa cankusu muncito yakwe Yehova. Ishi shoonse shakacafwa bana besu kuyumya bushicibusa bwabo a Yehova.” Nobashali, amube bashinishite kucafwa bana banu kucana beshicibusa bali kabotu.

AMUTOLELELE KULANGILA!

16. Ino inga mwacita buyani na mwanaanu wakaka kusebensela Yehova?

¹⁶ Ino inga mwacita buyani na mwanaanu wakaka kusebensela Yehova pesule lyakwaamba ayi mwacita shoonse nsheenga mwacikonsha kumucafwa? Mutayeeyi kwaamba ayi mpashi mwaalilwa kumucafwa. Soonse, kwiilikaawo amwanaanu, Yehova wakatupa nkusu shakusalawo kumusebensela nabi sobwe. Na mwanaanu wakaka kusebensela Yehova, amutolelele kulangila ayi bushiku bumwi alaakuboolela. Amwiibaluke cikoshanyo ca mwaana wakaashuka. (Luka 15:11-19, 22-24) Musankwa wacanike ulya wakacita shintu shibiibi shiinji, nacibi boobo, wakaboolela mukuya kwaciindi. Bamwi inga baamba ayi, “Ici cakalinga ncikoshanyobo, sa cintu ca mushobo uyu inga cacitika?” Ee, inga cacitika! Alimwi ici ncecakacitika kumusankwa wacanike waliina lya Elie.

17. Ino shakacitikila Elie shamuyuminisha buyani?

¹⁷ Elie wakaamba pabashali bakwe ayi: “Bakacita shoonse nshobakalinga kucikonsha kwaamba ayi bancaafwe kusuna Yehova alimwi a Maswi akwe Baibo. Nacibi boobo, ndyendakalinga pafwiifwi akukwanisha myaaka 15 ndakatalika kupondoka.” Elie mubushishi wakatalika kucita shintu shitabete kabotu. Bashali bakwe bakeelesha kumucafwa kuyumya bushicibusa bwakwe a Yehova, sombi taakwe kubanyumfwila. Ndyaakaswa paŋanda wakatalika kucita shintu shibiibi. Nacibi boobo, cimwi ciindi wakalinga kubandika amubye makani amu Baibo. Elie wakaamba ayi: “Kutolelela kubandika pali Yehova amubyaanji kwakampa kutalika kuyeeya pali nguwe. Aboobo imbuto ya cancine bashali bangu njobakeelesha cankusu kushanga mumoyo wangu, yakatalika kukula paniini paniini.” Mukuya kwaciindi Elie wakaboolela mucancine.c Amuyeeyebo bashali bakwe mbobakasangalala kwaamba ayi bakamwiisha kusuna Yehova kaacili mwanike!​—2 Timo. 3:14, 15.

18. Ino mulalinyumfwa buyani pabashali basebensa cankusu kucafwa bana babo kusuna Yehova?

¹⁸ Nobashali, Yehova wakamupa coolwe cibotu abuumbi. Coolwe ca kulela lishalane lipya lya basebenshi bakwe Yehova. (Kulu. 78:4-6) Uyu ngumukuli unene abuumbi, aboobo tutoomulumba abuumbi pakusebensa cankusu kucafwa bana banu! Na mukatolelele kusebensa cankusu kucafwa bana banu kusuna akunoonyumfwila Yehova, mulaakusangalasha Ishiwesu wakwiculu shilusuno.​—Efe. 6:4.