‘Amutolelele Kweenda Mucancine’

1. Ino kubandika mbotwakesa “mucancine” kulatucafwa buyani?

“INO mwakesa buyani mucancine?” Cilyeelete mpashi mwakakumbulawo kale mwiipusho uyu mankanda aanji. Ngomwiipusho womwi ngotutaanguna kwiipusha mukwesu nabi nankashi na tulisuni kumushiba kabotu. Tulanyumfwa kabotu kushiba bamakwesu abenankashi mbobakeeya pali Yehova akutalika kumusuna. Alimwi tulasangalala kubalwiita citupa kunyumfwa kabotu kuba Kamboni wakwe Yehova. (Loma. 1:11) Aboobo mibandi iyi ilatucafwa kuyeeya mbotusuni cancine. Alimwi tulaba bashinishite ‘kutolelela kweenda mucancine,’ nkokwaamba ayi kutolelela kucita shintu shisangalasha Yehova.​—3 Joni 4.

2. Ino tutoobandika nshi mumutwi uyu?

² Mumutwi uyu, tutobandika pasheebo shimwi shitupa kusuna cancine. Lyalo tutobandika mbweenga twatolelela kutondesha ayi tulicisuni abuumbi cipo cibotu ici. Kucita boobo, kutootucafwa kutolelela kulumba Yehova kwaamba ayi wakatuleta mucancine. (Joni 6:44) Alimwi kusuna cancine kulaakutucafwa kusuna kushimikilako bamwi.

INO NCEEBONSHI TULICISUNI “CANCINE?”

3. Ino nceebonshi comwi ciyandika abuumbi citupa kusuna cancine?

³ Kuli sheebo shiinji shitupa kusuna cancine. Ceebo comwi ciyandika ncakwaamba ayi tulisuni Yehova Lesa, uyo wakatupa cancine. Kwiinda mu Maswi akwe Baibo, twakeeya kwaamba ayi Yehova teshibo Mulengi shinkusu shoonse wakalenga liculu acishi capanshi, sombi ngu Ishiwesu wakwiculu shilusuno, uyo utubikila maano abuumbi. (1 Pit. 5:7) Tulicishi kwaamba ayi Lesa wesu ngu ‘Lesa uswite nkuumbu alimwi ulekelela, utafwambaani kukalala, uswite lusuno lutamaani alimwi ushomeka.’ (Kulo. 34:6) Yehova alisuni bululami. (Isa. 61:8) Cilamucisa na katupenga alimwi atolangila kunembo ndyeshi akamane mapensho oonse. (Jele. 29:11) Aswebo tutolangila kuciindi ico cibotu abuumbi! Ici nceceebo comwi citupa kumusuna abuumbi Yehova!

4-5. Ino nceebonshi mutumwi Paulo wakakoshanisha kulangila kwesu ku ceela cakwiimikisha bwaato?

⁴ Ino nciinshi cimwi citupa kusuna cancine? Cancine cilatucafwa abuumbi. Kucakubonenaako, cancine camu Baibo cileelikaawo makani abuumi mbotutoolangila kunembo. Kwaamba pakulangila mbokutucafwa, mutumwi Paulo wakalemba ayi: “Kulangila kwesu uku, kuli anga nceela cakwiimikisha bwaato mubuumi bwesu. Nkokwaamba ayi kulalengesha ayi tubule boowa alimwi tunooshinishite.” (Ebu. 6:19) Bweenka mbuli ceela cakwiimikisha bwaato mbocicafwa bwaato kukalikana, makani akulangila ngotwiiya kuswa mu Baibo inga atucafwa kutalisukama abuumbi ndyetutokwiinda mumapensho.

⁵ Mumakani aya, Paulo wakalinga kwaamba pa kulangila kwa kuya kwiculu Beneklistu bananikitwe nkobasuni abuumbi. Nacibi boobo, Beneklistu batolangila kukala buumi bwamuyayaya mu paladaiso pacishi capanshi abalo inga abacafwa. (Joni 3:16) Ncakutatoonsha kwaamba ayi kwiiya pamakani akulangila buumi butamaani, kwatucafwa abuumbi mubuumi bwesu.

6-7. Ino kwiiya cancine pamakani abuumi bwakunembo kwakamucafwa buyani nankashi Yvonne?

⁶ Amuyeeye cakubonenaako cakwe nankashi waliina lya Yvonne. Taakwe kukomenena mumukwashi wa Bakamboni Bakwe Yehova, alimwi ndyaakalinga mwanike wakalinga kuloonda lufu. Bushiku bumwi wakabelenga maswi amwi akamupa kuyeeya abuumbi. Maswi ayo akalinga kwaamba ayi: “Mukuya kwaciindi soonse tulaakufwa.” Aboobo wakaamba ayi: “Maswi ayo akampa kwaalilwa koona mashiku ceebo cakuyeeya buumi bwakunembo.” Nankashi Yvonne wakayeeya cipa kwaamba ayi tunookalabo myaaka iniini lyalo akufwa. Nabi kwaamba ayi taakalinga kunyumfwishisha ncotubetele pacishi, taakalinga kusuniiwo kufwa.

⁷ Ndyaakashika mumyaaka ya bucikula bwaangu, Yvonne wakakumanya Bakamboni Bakwe Yehova. Wakaamba ayi: “Ndakatalika kushoma ayi inga ndaba abuumi bwamuyayaya mu Paladaiso pacishi capanshi.” Ino kwiiya cancine kwakamucafwa buyani? Wakatolelela akwaamba ayi: “Ndakacileka kutoona tulo ceebo cakulisukama sha buumi bwakunembo na lufu.” Ncakutatoonsha kwaamba ayi nankashi Yvonne alicisuni abuumbi cancine, alimwi alasangalala abuumbi kushimikilako bamwi sha buumi bwakunembo.​—1 Timo. 4:16.

8-9. (a) Kweelana acikoshanyo Yesu ncaakaamba, ino musankwa umwi wakacita buyani ndyaakacana buboni? (b) Ino cancine mulacibona buyani?

⁸ Cancine camu Baibo cileelikaawo amakani abotu aamba pa Bwaami bwakwe Lesa. Palilembo lyakwe Mateyo 13:44, Yesu wakakoshanisha cancine caamba pamakani a Bwaami ku buboni bushisitwe. Wakaamba ayi: ‘Bwaami bwa kwiculu bulikoshenye abuboni bwakalinga kushisitwe mumuunda, ubo muntu mbwaakeetukila akubushisa pambi; Ono mukusangalala wakaya mukuulisha shintu shoonse nshaakalinga kucite, akuula muunda uyo.’ Nabi kwaamba ayi musankwa uyu taakalinga kulangoola buboni, ndyaakabucana wakalyaaba abuumbi kwaamba ayi abubwese. Wakoolisha shintu shoonse nshaakalinga kucite. Ino nceebonshi? Nceebo cakwaamba ayi wakalinga kucishi kuyandika kwa buboni mbwaakacana. Bwakalinga kwiindite pashintu shoonse nshaakoolisha.

⁹ Sa amwebo mbomulinyumfwa pacancine? Ncakutatoonsha mbomulinyumfwa! Tulicishi kwaamba ayi taakuwo cintu nabi comwi mucishi, ceenga ceelana alusangalalo ndotucana mukusebensela Yehova pacecino ciindi, alimwi akulangila buumi butamaani kunembo mu Bwaami bwakwe Lesa. Taakuwo nceenga tweelanya acoolwe ncetucite cakuba abushicibusa bubotu a Yehova. Cintu cinene citupa lusangalalo nkucita shimusangalasha.​—Kolo. 1:10.

10-11. Ino nciinshi cakapa ba Michael kwaalula buumi bwabo?

¹⁰ Buunji bwandiswe twakashiya shiinji kwaamba ayi tusangalashe Yehova. Bamwi bakashiya ncito sha maali abuumbi kucishi. Bamwi bakacileka kulangoola bubile alimwi bamwi bakaalula buumi bwabo pesule lyakwiiya pali Yehova. Ba Michael abalo mbobakacita. Tabakwe kukulila mucancine. Ndyebakalinga banike bakalinga kwiiya kalati. Bakaamba ayi: “Kuli ndime kuyumya mubili cakalinga cintu comwi ciyandika. Cimwi ciindi, ndakalinga kulinyumfwa ayi taakuwo weenga wankoma.” Nacibi boobo, ndyebakatalika kwiiya Baibo, ba Michael bakeeya Yehova mbwaabona nkondo. (Kulu. 11:5) Kulansha kubeebene bakalinga kubaiisha Baibo, ba Michael bakaamba ayi: “Tabana kundwiitaawo ayi ncileke kalati; bakatolelelabo kunjiisha cancine camu Baibo.”

¹¹ Kutolelela kwiiya pali Yehova kwakacafwa ba Michael kumusuna abuumbi. Cintu comwi cakabayuminisha abuumbi, nkwiiya Yehova mbwatondesha nkumbu kubasebenshi bakwe. Mukuya kwaciindi, ba Michael bakesa mukushiba ayi bakalinga kweelete kwaalula buumi bwabo. Bakaamba ayi: “Ndakalinga kucishi kwaamba ayi kucileka kalati cilaakuba cintu ciyumu abuumbi ncentana kucitawo kale. Sombi ndakalinga kucishi kwaamba ayi kucita boobo kulaakusangalasha Yehova. Alimwi ndakalinga kushomete ayi taakuwo kulyaaba kweenga kweelana akumusebensela.” Ba Michael bakalinga kucishi ayi cancine ncobakacana cakalinga cintu ciyandika abuumbi. Aboobo bakalinga kulyaabite kwaalula buumi bwabo.​—Jemu. 1:25.

12-13. Ino cancine camu Baibo cakabacafwa buyani ba Mayli?

¹² Baibo ilatondesha cancine mbociyandika kwiinda mukucikoshanisha kulilampi limunika mumunshinshe. (Kulu. 119:105; Efe. 5:8) Ba Mayli baku Azerbaijan balalumba abuumbi palucafwo ndobakatambula kuswa mu Maswi akwe Lesa. Bashali babo bakalinga kuya kubupailishi bupusene. Beshiwabo bakalinga ba Muslim, lyalo banyinawabo bakalinga ba Juda. Bakaamba ayi: “Nabi kwaamba ayi ndakalinga kucishi ayi Lesa nkwaali, ndakalinga kucite miipusho iinji. Ndakalinga kuliipusha ayi: ‘Ino nceebonshi Lesa wakalenga bantu, alimwi ino nduyaando nshi muntu ndwaeelete kupengela mubuumi bwakwe boonse lyalo akuya mukupenshekwa kwamuyayaya mumulilo wa helo?’ Mukwiinga bantu bakalinga kwaamba ayi shintu shicitika nduyaando lwakwe Lesa, ndakalinga kuliipusha ayi, ‘Sa Lesa aleendelesha bantu alimwi akunyumfwa kabotu na kabapenga?’”

¹³ Ba Mayli bakatolelela kulangoola shikumbulo kumiipusho njobakalinga kucite. Mukuya kwaciindi bakasumina kwiiya Baibo lyalo akuba Kamboni. Bakaamba ayi: “Kwiiya Baibo mboyaamba shintu mukululama kabotu, kwancafwa kuba muntu usangalete alimwi kunyumfwishisha mboisansulula makani munshila yuubu kushoma, kwancafwa kuba aluumuno.” Bweenka mbuli ba Mayli, tulalumbaisha Yehova, uyo ‘wakatwiita kuswa mumunshinshe [akutunjisha] mumumuni wakwe ukankamika.’​—1 Pit. 2:9.

14. Ino inga twacita buyani kwaamba ayi tutolelele kutondesha ayi tulisuni cancine? (Amubone kabokosi kacite mutwi utokwaamba ayi “Shintu Ashimwi Nsheenga Twakoshanisha ku Cancine.”)

¹⁴ Ishi nshakubonenaako shiniinibo shitondesha cancine mbociyandika. Ncakutatoonsha kwaamba ayi amwebo kuli shakubonenaako shimwi shiinji nsheenga mwayeeya. Mpashi inga mwabika bubaambo bwakwiiya sheebo shimwi shitupa kusuna cancine. Kutolelela kusuna cancine kulaakutupa kucana nshila mbweenga twatondesha ayi tulicisuni.

MBWEENGA TWATONDESHA AYI TULICISUNI CANCINE

15. Ino inga twatondesha buyani ayi tulicisuni cancine?

¹⁵ Inga twatondesha ayi tulicisuni cancine kwiinda mukwiiya Baibo bushiku abushiku alimwi amabuku aamba shamu Baibo. Nabi twekala myaaka iinji buyani mucancine, kuli shiinji nshotweelete kwiiya. Njashi Yamulindilishi yakutaanguna yakaamba ayi: “Kuli makani akubeca aanji abuumbi pacishi eenga apa kwaamba ayi cibe ciyumu kucishiba kabotu cancine. Aboobo mulyeelete kucilangoola kwaamba ayi mucicaane. . . . Mulyeelete kusebensa cankusu kwaamba ayi cibe caanu. Lyoonse amweeleshe kwiiya shiinji pamakani acancine camu Baibo.” Nabi kwaamba ayi kwiiya teshi cintu cuubu, mulaswa shibotu shiinji.

16. Ino nciinshi cimucafwa kwiiya kabotu? (Tushimpi 2:4-6)

¹⁶ Sobamwi tatusuni bunene kubelenga akwiiya. Nacibi boobo, Yehova alatulwiita ayi tulyeelete ‘kutolelela kulangoola’ kwaamba ayi tucinyumfwishishe kabotu cancine. (Amubelenge Tushimpi 2:4-6.) Kucita boobo lyoonse kulacafwa. Kwaamba pamakani akucita ciiyo capalwaakwe, mukwesu waliina lya Corey wakaamba ayi alabikila maano pavesi yomwi paciindi comwi. Wakaamba ayi: “Ndabelenga mafutunoti oonse, kubona malembo amwi aamba pamakani ayo alimwi akulangwetaawo makani aamwi. Kucita boobo kulancafwa kwiiya shiinji!” Inga twatondesha ayi cancine cilayandika na katucana ciindi akusebensa cankusu kuciiya.​—Kulu. 1:1-3.

17. Ino inga twacita buyani kwaamba ayi tunokonkela cancine ncotwiiya? (Jemusi 1:25)

¹⁷ Kwalo, tulicishi kwaamba ayi tatweelete kweelabo pakwiiya cancine. Kwaamba ayi cancine citucaafwe tulyeelete kukonkela nshetwiiya mubuumi bwesu. Lyalo ndyeenga twacana lusangalalo lwancinencine. (Amubelenge Jemusi 1:25.) Ino inga twacita buyani kwaamba ayi tunokonkela cancine ncotwiiya? Mukwesu umwi wakaamba ayi inga twalilanga langa kwaamba ayi tubone mbasu nshetutoocita kabotu alimwi asheenga twayandika kusebenselawo. Mutumwi Paulo wakaamba ayi: “Nacibi boobo, kweelana akuya panembo nkomwacita kale, amutolelele kweenda kabotu munshila yeenka iyi.”​—Filip. 3:16, NWT.

18. Ino nceebonshi tulacita shoonse nsheenga twacikonsha kwaamba ayi ‘tutolelele kweenda mucancine’?

¹⁸ Amuyeeyebo kucita shoonse nsheenga twacikonsha kwaamba ayi ‘tutolelele kweenda mucancine’ mbokutucafwa! Kulasangalasha Yehova alimwi abamakwesu benanakashi akutupa kuba abuumi bucite mpindu. (Tus. 27:11; 3 Joni 4) Ishi nsheebo shibotu sheelete kutupa kusuna cancine alimwi akukonkela nshetwiiya mubuumi bwesu!