Inga Twekala Kwamuyayaya

1. Ino kukutumana kuyeeya pacishomesho cakwe Yehova ca buumi butamaani kulatupa kucita nshi?

YEHOVA washomesha ayi abo bamunyumfwila balaakuba a ‘buumi butamaani.’ (Loma. 6:23) Kukutumana kuyeeya pacishomesho ici cakwe Yehova, kulatupa kumusuna abuumbi. Amuyeeye paceeci: Ishiwesu wakwiculu alitusuni abuumbi cakwaamba ayi tulaakuba anguwe lyoonse.

2. Ino cishomesho ca buumi butamaani cilatucafwa buyani?

² Cishomesho cakwe Lesa ca buumi butamaani cilatucafwa kuliyumya ndyetutokwiinda mumapensho pacecino ciindi. Teshi tukacileeke kusebensela Yehova nabi balwani besu batukonga ayi batootucaya. Ino nceebonshi? Ceebo comwi ncakwaamba ayi tulishi ayi na twafwa katushomeka kuli Yehova, alaakutubusha akulangila kukala buumi bwamuyayaya. (Joni 5:28, 29; 1 Koli. 15:55-58; Ebu. 2:15) Ino nceebonshi inga twashoma ayi tulaakukala buumi bwamuyayaya? Amuyeeye pasheebo shitokonkelaawo.

YEHOVA ALEKALA KWAMUYAYAYA

3. Ino nceebonshi inga twashoma ayi Yehova alicite nkusu shakutupa kukala kwamuyayaya? (Kulumbaisha 102:12, 24, 27)

³ Tulishi kwaamba ayi Yehova inga watupa buumi butamaani mukwiinga lakwe ngo Kantupu kabuumi, alimwi alekala kwamuyayaya. (Kulu. 36:9) Ngaaya mavesi aniinibo amu Baibo atondesha ayi Yehova alekala kwamuyayaya. Kulumbaisha 90:2 ilaamba ayi Yehova nkwaali “kuswabo lili alili.” Kulumbaisha 102 ayalo ilaamba makani womwi. (Amubelenge Kulumbaisha 102:12, 24, 27.) Mushinshimi Abakuku alakwe wakalemba pali Ishiwesu wakwiculu ayi: ‘O Yehova, sa te webo nkooli kuswabo lili alili? O Lesa wangu Usalalite, webo tofwiiwo sobwe.’​—Abaku. 1:12.

4. Sa tulyeelete kulisukama na twaalilwa kunyumfwishisha cancine cakwaamba ayi Yehova alekala kwamuyayaya? Amusansulule.

⁴ Sa cilamuyumina kushoma kwaamba ayi Yehova alekala ‘kwamuyayaya’? (Isa. 40:28) Bantu baanji balaalilwa kunyumfwishisha cancine ici. Eliyu wakaamba pali Lesa ayi: “Myaaka yakwe tatukoonshi kwiibelenga napaceyuubo.” (Jobo 36:26) Ano inga tatwaambi ayi cintu cimwi teshi cancine ceebo cakwaalilwa kucinyumfwishisha. Kucakubonenaako, nabi kwaamba ayi inga tatunyumfwishishi kabotu malaiti mbwaasebensa, sa ici cilaamba ayi taakuwo malaiti? Sobwe napaceyi! Aboobo nciyumu mbuli bantu kunyumfwishisha cancine cakwaamba ayi Yehova nkwaali kuswabo kale kale alimwi alaakutolelela kubaako. Ano ici tacaambi ayi Lesa tekali kwamuyayaya. Mulengi alacita shiinji shiindite pasheesho nsheenga twanyumfwishisha na kwaalilwa kucita boobo. (Loma. 11:33-36) Alimwi wakalingaako mwiculu kamutana kuba cintu cili coonse, mbuli lisuba alimwi anyenyeenshi. Yehova alatushomesha ayi ‘ngo wakalenga cishi capanshi kwiinda munkusu shakwe.’ Alimwi wakalingaako kaatana ‘kufungulula liculu.’ (Jele. 51:15; Milimo 17:24) Ino nceebonshi cimwi ceenga catupa kushoma ayi inga twekala buumi bwamuyayaya?

YEHOVA WAKATULENGA KUKALA KWAMUYAYAYA

5. Ino beebene bakutaanguna bakalinga kulangila buumi bwa buyani?

⁵ Shintu shoonse shicite buumi Yehova nshaakalenga pacishi capanshi kukushakobo muntu, shakalengwa kwaamba ayi shinoofwa mukuya kwaciindi. Yehova wakalenga muntu kwaamba ayi anookala kwamuyayaya. Nacibi boobo, Yehova wakacenjesha Adamu ayi: “Sombi kutalya shisepo sha cisamu cipa lushibo lwa bubotu abubi, mukwiinga waakulyabo, ncakwiila ulaakufwa.” (Mata. 2:17) Naakwiinga Adamu a Efa bakanyumfwila Yehova, naakwiinga tabakwe kufwa. Aboobo cilibo kabotu kushoma kwaamba ayi mukuya kwaciindi, Yehova naakwiinga wakabasuminisha kulya shisepo sha ‘cisamu cipa buumi.’ Ici naakwiinga cakabapa kushoma kwaamba ayi ncakwiila balaakukala ‘kwamuyayaya.’b—Mata. 3:22.

6-7. (a) Ino nciinshi cimwi citondesha ayi muntu taakwe kulengwa kwaamba ayi anoofwa? (b) Ino nshiinshi shimukondelesha nshemutolangila kucita kunembo? (Amubone shikope.)

⁶ Beshisayansi bakacana bumboni butondesha ayi boongo bwesu inga bwacikonsha kulama makani aanji eendilila pamakani oonse ngeenga tweeya mubuumi bwesu pacecino ciindi. Ici cilakankamika. Mu 2010 magazini iitwa ayi Scientific American Mind yakaamba ayi boongo bwesu inga bwacikonsha kulama makani aanji abuumbi eenga eelanabo avidyo ilaamfu mawoola ali 3 miliyoni yeenga yatola myaaka 300 kweebela. Alimwi mpashi boongo bwesu inga bwacikonsha kulama makani aanji abuumbi kwiinda aaya. Nacibi boobo, ici cilatondesha ayi Yehova wakapanga boongo bwesu ankusu shakucikonsha kulama makani aanji abuumbi eendilila pamakani ngeenga tweeya mu myaaka 70 na 80.​—Kulu. 90:10.

⁷ Alimwi Yehova wakatulenga amoyo wakusunishisha kutolelela kuba abuumi. Baibo ilaamba pabantu ayi Lesa “wakabika buumi bwamuyayaya mumyoyo yabo.” (Shiku. 3:11) Nceceebo comwi ncotubonena lufu ayi ngumulwani. (1 Koli. 15:26) Na twaciswa abuumbi, sa tulekalabo akulindila ayi tufwe? Sobwe. Liinji tulaya kucipatela alimwi cimwi ciindi tulanwa musamu kwaamba ayi tube kabotu. Alimwi tulacita shoonse nsheenga twacikonsha kwaamba ayi tutafwiiwo. Alimwi na shikamukowa na shicibusa wacanike nabi munene wafwa, cilatucisa abuumbi kwaciindi cilaamfu. (Joni 11:32, 33) Inga twatolelela kwiiya kwamuyayaya alimwi tulicite moyo wakusunishisha kukala kwamuyayaya mukwiinga Mulengi wesu shilusuno mbwaakatulenga. Ncakutatoonsha alaakupa kwaamba ayi tukacikoonshe kukala kwamuyayaya. Sombi kuli sheebo ashimwi sheenga shatupa kushoma kwaamba ayi inga twekala kwamuyayaya. Amuleke tubandike Yehova nshaakacita kale kale alimwi anshatoocita pacecino ciindi isho shitondesha kwaamba ayi luyaando lwakwe talukwe kwaaluka.

LUYAANDO LWAKWE YEHOVA TALUKWE KWAALUKA

8. Ino Isaya 55:11 ilatwiisha nshi pamakani aluyaando Yehova ndwakatulengela?

⁸ Nabi kwaamba ayi Adamu a Efa bakabisha akuleta lufu kubana babo, Yehova taakwe kwaalula luyaando lwakwe. (Amubelenge Isaya 55:11.) Yehova acicite luyaando lwa kwaamba ayi bantu bashomeka bakekale buumi bwamuyayaya. Tulishi makani aya ceebo ca shintu Yehova nshaakaamba alimwi akucita kwaamba ayi akumanishe luyaando lwakwe.

9. Ino Yehova washomesha nshi? (Danyelo 12:2, 13)

⁹ Yehova wakashomesha ayi alaakubusha bafu akubapa coolwe cakukala buumi bwamuyayaya. (Milimo 24:15; Taitasi 1:1, 2) Jobo musankwa ushomeka wakalinga kushomete cakutatoonsha kwaamba ayi Yehova alisunishishi abuumbi kubusha baabo bakafwa. (Jobo 14:14, 15) Mushinshimi Danyelo wakalinga kucishi kwaamba ayi bantu balaakubushikwa akulangila kukala buumi bwamuyayaya. (Kulu. 37:29; amubelenge Danyelo 12:2, 13.) BaJuda bakalingaako paciindi Yesu ndyaakalinga pacishi, abalo bakalinga kucishi kwaamba ayi Yehova inga wapa basebenshi bakwe bashomeka ‘buumi butamaani.’ (Luka 10:25; 18:18) Yesu wakaamba pacishomesho ici mankanda aanji, alimwi lakwe mwiine ndyaakafwa baIshi bakamubusha.​—Mate. 19:29; 22:31, 32; Luka 18:30; Joni 11:25.

10. Ino makani aamba pabantu bakalinga babushikwa muciindi cakale kale alatondesha nshi? (Amubone cikope.)

¹⁰ Yehova Ngoopa Buumi alimwi alicite nkusu shakubusha bantu. Wakapa mushinshimi Elija nkusu shakubusha mwaana musankwa wa mukalubinje waku Salefati. (1 Baam. 17:21-23) Paciindi cimwi, mushinshimi Elisha kwiinda mulucafwo lwakwe Lesa wakabusha mwaana musankwa wa mwanakashi mwine Shulamu. (2 Baam. 4:18-20, 34-37) Makani aya alimwi aamwi abantu bakabushikwa alatondesha patuba kwaamba ayi Yehova alicite nkusu shakubusha bafu. Yesu ndyaakalinga pacishi capanshi wakatondesha kwaamba ayi baIshi bakamupa nkusu shakubusha bantu. (Joni 11:23-25, 43, 44) Ano pacecino ciindi Yesu ali kwiculu alimwi wakapekwa “nkusu shoonse kwiculu alimwi apacishi capanshi.” Aboobo alaakucikonsha kukumanisha cishomesho cakwaamba ayi “bafu boonse” balaakubuka akulangila kuba acoolwe cakutolelela kuba abuumi kwamuyayaya.​—Mate. 28:18; Joni 5:25-29.

11. Ino cilubula cilatupa buyani kuba acoolwe ca kukala buumi bwamuyayaya?

¹¹ Ino nceebonshi Yehova wakalekela Mwanaakwe ngwaasuni abuumbi kufwa lufu lucisa abuumbi? Yesu wakaamba cikumbulo kumwiipusho uyu ndyaakaamba ayi: “Lesa wakasunisha bantu boonse ba mucishi capanshi abuumbi. Aboobo wakatuma Mwanaakwe wakashalwabo eenka kwaamba ayi uyo woonse umushoma ataloobi, sombi abe abuumi butamaani.” (Joni 3:16) Lesa wakatupa coolwe cakuba abuumi butamaani kwiinda mukwaaba Mwanaakwe mbuli cilubula ca kufweka pashibiibi shesu. (Mate. 20:28) Mutumwi Paulo wakaamba lubasu luyandika ulu lwa luyaando lwakwe Lesa ndyaakaamba ayi: ‘Ceebo bweenka lufu mbolwakesa kwiinda mumuntu, akwalo kubushikwa kuswa kubafu kwakesa kwiinda mumuntu. Bweenka bantu boonse mbobafwa kwiinda muli Adamu, akwalo kubushikwa kwa bantu boonse mbweshi kukabe kwiinda muli Klistu.’​—1 Koli. 15:21, 22.

12. Ino Bwaami bulaakucafwilisha buyani kukumanisha luyaando Yehova ndwakatulengela?

¹² Yesu wakaiisha bashikwiiya bakwe kupaila ayi Bwaami bwakwe Lesa buse alimwi akwaamba ayi kuyanda kwakwe kucitwe pacishi capanshi. (Mate. 6:9, 10) Lubasu lwa luyaando lwakwe Lesa ndwakwaamba ayi bantu bakekala pacishi capanshi kwamuyayaya. Kwaamba ayi ishi shikumanishikwe Yehova wakasala Mwanaakwe kuba Mwaami wa Bwaami bwabu Mesiya. Lesa atoobunganya bantu 144,000 kuswa pacishi capanshi, kwaamba ayi bakasebensele pomwi a Yesu mukukumanisha luyaando lwakwe Lesa.​—Ciyu. 5:9, 10.

13. Ino Yehova atoocita nshi pacecino ciindi, alimwi ino nshiinshi nshotweelete kucita?

¹³ Yehova pacecino ciindi atoobunganya “likoto linene.” Alimwi atoobaiisha mbobeelete kukala mu Bwaami bwakwe. (Ciyu. 7:9, 10, NWT; Jemu. 2:8) Nabi kwaamba ayi bantu baanji pacishi tabacatenewo ceebo ca lupato alimwi ankoondo, bamu “likoto linene” balasebensa cankusu kwaamba ayi batabi alupato lwa mushobo uli woonse pakati kabo. Kwiinda mushintu nshebacita balatondesha ayi bakatalika kale kufula mipeeni yabo ayi shibe shakulimisha. (Mika 4:3) Muciindi cakwaabanamo lubasu munkondo isho shilengesha bantu baanji kucaikwa, batoocafwa bantu kucana “buumi bwancinencine” kwiinda mukubaiisha pali Lesa wancine alimwi aluyaando lwakwe. (1 Timo. 6:19) Beshikamukowa inga babapikisha na mpashi inga bacana lipenshi lyakubula maali ceebo cakusala kuba kulubasu lwa Bwaami bwakwe Lesa, sombi Yehova alashinisha kwaamba ayi wabacafwa kucana shintu nshebayandika. (Mate. 6:25, 30-33; Luka 18:29, 30) Ishi shilatucafwa kushoma kwaamba ayi Bwaami bwakwe Lesa mbwancine alimwi bulaakutolelela kukumanisha luyaando lwakwe Yehova.

BUUMI BUBOTU KUNEMBO

14-15. Ino cishomesho cakwe Yehova cakukushaawo lufu kwamuyayaya cilaakukumanishikwa buyani?

¹⁴ Yesu pacecino ciindi ngu Mwaami wa Bwaami bwakwe Lesa kwiculu, alimwi alaakukumanisha shishomesho shoonse Yehova nshaakashomesha. (2 Koli. 1:20) Kuswabo mu 1914, Yesu watolelela kukoma balwani bakwe. (Kulu. 110:1, 2) Conoonobo Yesu pomwi abaabo mbweshi akanokweendelesha abo balaakunyonyoola bantu bacita shibiibi boonse.​—Ciyu. 6:2.

¹⁵ Paciindi ca Buleelo Bwakwe Yesu bwa Myaaka 1,000, Yesu alaakubusha bafu alimwi alaakucafwa bantu boonse banyumfwila Yehova kuba bamaninite. Pesule lyakweeleshekwa kwa kweelaako, abo Yehova mbweshi akoomboloshe ayi mbaluleme ‘balaakutambula cishi capanshi, akukalaamo kwamuyayaya.’ (Kulu. 37:10, 11, 29) Cisangalasha, ‘mulwani wakweelaako kukomwa, lufu, alaakunyonyoolwa.’​—1 Koli. 15:26.

16. Ino nciinshi ciyandika ceelete kutupa kusebensela Yehova?

¹⁶ Kweelana anshotwabandika mumutwi uyu, cishomesho ncetutolangila cakukala buumi bwamuyayaya cilaswa mu Maswi akwe Lesa. Kulangila cishomesho ici inga kwatucafwa kutolelela kushomeka ndyetutokwiinda mumapensho amunshiku shino shakweelaako. Nacibi boobo, kwaamba ayi tusangalashe Yehova tatweelete kweelabo pakusunishisha kuba abuumi butamaani. Tulyeelete kusebensela Yehova a Yesu cakushomeka ceebo cakwaamba ayi tulibasuni abuumbi. (2 Koli. 5:14, 15) Lusuno ndotucite pali Yehova a Yesu lulyeelete kutupa kukonkela cakubonenaako cabo akulwiitako bamwi nshetutolangila. (Loma. 10:13-15) Na tweeya kulyaaba alimwi akucafwako bamwi, tulaakuba bantu beenga beelela kuba bashicibusa bakwe Yehova kwamuyayaya.​—Ebu. 13:16.

17. Ino nciinshi ncotweelete kusalawo kucita? (Mateyo 7:13, 14)

¹⁷ Sa tulaakuba pakati kabaabo beshi bakatambule buumi butamaani? Yehova watupa coolwe ici. Aboobo cili kulindiswe kusalawo kutolelela kweenda panshila itola kubuumi. (Amubelenge Mateyo 7:13, 14.) Ino buumi bulaakuba buyani na tukekale kwamuyayaya? Tulaakubandika cikumbulo kumwiipusho uyu mumutwi utokonkelaawo.