Sa Mulicite Lushomo?

Tulyeelete kuba alushomo kwaamba ayi tusangalashe Yehova. Nacibi boobo, Baibo ilaamba ayi ‘teshi bantu boonse bacite lushomo.’ (2 Tesa. 3:2) Mutumwi Paulo ndyaakaamba maswi aya wakalinga kwaamba pa “bantu babiibi” abo bakalinga kumupensha. Sombi nshaakaamba palushomo mbocibete akubantu bamwi. Bantu bamwi balasalawo kukaka bumboni butondesha patuba ayi kuli Lesa uyo wakalenga shintu shoonse. (Loma. 1:20) Bamwi inga baamba ayi balashoma mucintu na mumuntu umwi ucite nkusu abuumbi. Sombi ulo teshi lushomo lwancine.

Tulayandika kushoma cakutatoonsha ayi Yehova nkwaali alimwi ayi ‘alapa shilambu’ abo bacite lushomo luyumu muli nguwe. (Ebu. 11:6) Kwaamba ayi tube alushomo lwa mushobo uyu, tulayandika mushimu usalashi wakwe Lesa. Tulayandika kupaila kuli Yehova kwaamba ayi atupe mushimu usalashi. (Luka 11:​9, 10, 13) Nshila aimwi iyandika mbweenga twatambula mushimu usalashi nkwiinda mukubelenga Baibo, iyo yakatanjililwa amushimu usalashi. Lyalo inga twayeeya pa nshotubelenga akweelesha kukonkela nshotwiiya. Na twacita sheeshi, tulasuminisha mushimu wakwe Yehova kwaamba ayi utucaafwe kunoocita shintu shitondesha ayi tulicite lushomo lwancine.