Sa Mutokonkela Kucenjesha?

1. Ino nciinshi Yesu nceshi akacite conoono?

TUTOKALA muciindi shintu ndyeshi shikaaluke abuumbi! Conoonobo Yesu alaakoombolosha bantu boonse pacishi. Yesu wakatulwiita sheshi shikanoocitika mucishi kaatana koombolosha bantu. Wakalwiita bashikwiiya bakwe ‘citondesho’ cakubaako kwakwe alimwi “amamanino a cishi.” (Mate. 24:3) Bushinshimi ubu bulacanika mu Mateyo capita 24 a 25, Maako capita 13 alimwi amu Luka capita 21.

2. Ino tutokwiiya nshi mumutwi uyu, alimwi ino nceebonshi nsheshi twiiye shitootucafwa?

² Yesu wakasebensesha shikoshanyo shotatwe kwaamba ayi atucaafwe kuba balibambite. Shikoshanyo isho nshakutucenjesha. Wakaamba cikoshanyo ca mbelele ampongo, bamyooye bacenjete abaluya alimwi aca matalenti. Cikoshanyo comwi acomwi cilatucafwa kunyumfwishisha Yesu mbweshi akoomboloshe muntu womwi awomwi kweelana anshaacita. Mumutwi uyu, tutobandika pashikoshanyo ishi akubona nsheenga tweeyaako. Tutotaanguna kubandika pacikoshanyo ca mbelele ampongo.

MBELELE AMPONGO

3. Ino ndilili Yesu ndyeshi akoomboloshe bantu?

³ Mucikoshanyo ca mbelele ampongo, Yesu wakaamba ayi alaakoombolosha bantu kweelana anshobacita na banyumfwa makani abotu alimwi ana bakalinga kucafwa bashikwiiya bakwe bananikitwe. (Mate. 25:​31-46) Paciindi ca ‘mapensho anene’ alaakoombolosha bantu ayi ni mbelele na ayi ni mpongo Amagedoni kaitana kutalika. (Mate. 24:21) Bweenka mbuli mweembeshi mbwaapansaanya mbelele ampongo, Yesu alaakupansaanya baabo batolelela kucafwa bashikwiiya bakwe bananikitwe kubaabo bataciti boobo.

4. Kweelana a Isaya 11:​3, 4, ino nceebonshi inga twashooma ayi Yesu alaakoombolosha bantu cakutanyengelela? (Amubone acikope cili papeeji yakutaanguna.)

⁴ Baibo ilaamba ayi Yesu ndyeshi akoombolosheleko Yehova, alaakoombolosha bantu cakutanyengelela. (Amubelenge Isaya 11:​3, 4.) Alalangilisha bantu nshobacita, nshobayeeya anshobaamba kwiilikaawo anshobacita kubashikwiiya bakwe bananikitwe. (Mate. 12:​36, 37; 25:40) Yesu alaakubashiba abo bakacafwilisha bashikwiiya bakwe bananikitwe anciito yabo.a Nshila yomwi iyandika abuumbi bambelele shimwi mbobacafwa bamakwabo Klistu, nkwiinda mukubacafwilisha muncito yakushimikila. Abo babacafwilisha muncito iyi, balaakoomboloshekwa ayi ‘baliluleme’ alimwi balaakuba acoolwe cakutambula “buumi butamaani” pacishi. (Mate. 25:46; Ciyu. 7:​16, 17) Ici ncilambu cibotu abuumbi! Na bakatolelele kushomeka kuli Yehova paciindi ca mapensho anene apesule lyakwaamba ayi amana, meena abo alaakutolelela kuba mu ‘libuku lya buumi.’—Ciyu. 20:15.

5. Ino nciiyo nshi ncotwiiya kucikoshanyo ca mbelele ampongo, alimwi mbaani beenga bafubilaamo?

⁵ Amutondeshe ayi mulashomeka. Cikoshanyo ca mbelele ampongo Yesu ncaakaamba, cilaamba bunene pabaabo balangila kukala pacishi. Balatondesha ayi balicite lushomo kwiinda mukucafwilisha bamakwabo Klistu muncito yakushimikila alimwi akutolelela kukonkela butanjilishi buswa ku musebenshi ushomeka alimwi ucite maano uyo Yesu ngwaakasala. (Mate. 24:45) Sombi abalo balangila kuya kwiculu balayandika kukonkela kucenjesha kuli mucikoshanyo ca mbelele ampongo. Ino nceebonshi? Mukwiinga Yesu alabikila maano ku shintu nshobacita, nshobayeeya alimwi anshobaamba. Abalo balyeelete kutolelela kushomeka. Alimwi Yesu wakaamba shikoshanyo shobilo muli makani akoshenye ngakacenjesha bananikitwe. Shikoshanyo ishi ashalo tulashicana mu Mateyo capita 25. Amuleke ano tubandike pacikoshanyo ca bamyooye bacenjete abaluya.

BAMYOOYE BACENJETE ABALUYA

6. Ino bamyooye bamwi bali 5 bakatondesha buyani ayi balicenjete? (Mateyo 25:​6-10)

⁶ Mucikoshanyo ca bamyooye, Yesu wakaamba pa bamyooye bali 10 abo bakaya mukutambula shibwiinga. (Mate. 25:​1-4) Boonse bakalinga kulangila kuya a shibwiinga kuŋanda ya bwiinga. Yesu wakaamba ayi bali 5 bakalinga “bacenjete” lyalo bamwi bakalinga “baluya.” Bamyooye bacenjete bakalinga kulibambite akubikilako maano. Bakalinga kulibambite kulindila shibwiinga kwaciindi cilaamfu nabi wesa pakati ka mashiku. Aboobo bakanyamuna malampi kwaamba ayi banoomunikisha na kushiye. Alimwi bakayumuna amafuta amwi palubasu na caba ayi shibwiinga wacelwa kushika. Aboobo bakalinga kulibambite kwaamba ayi malampi abo atolelele kunyaka. (Amubelenge Mateyo 25:​6-10.) Shibwiinga ndyaakashika, bamyooye bacenjete bakenjilaakwe muŋanda yabwiinga. Bweenka mbocakalinga ku bamyooye bacenjete, Beneklistu bananikitwe abo beshi bakatondeshe ayi balilibambite kwiinda mukubikilako maano akutolelela kushomeka kushikila Yesu ndyeshi akese, balaakutambula cilambu cabo cakuba pomwi a Shibwiinga, nkokwaamba ayi Yesu, mu Bwaami bwakwe kwiculu.b (Ciyu. 7:​1-3) Ino nshiinshi sheshi shikacitikile bamyooye baluya bali 5?

7. Ino nciinshi cakacitika ku bamyooye baluya bali 5, alimwi ino nceebonshi?

⁷ Mubupusano abamyooye bacenjete, bamyooye baluya bali 5 tabakalinga kulibambiteewo shibwiinga ndyaakashika. Malampi abo akalinga kusuni kushimika, alimwi tabakwe kuyumunawo mafuta amwi palubasu. Ndyebakanyumfwa ayi shibwiinga atooshika conoono, bakanyamuka akuya mukuula mafuta. Kabatana kuboola, shibwiinga wakashika. Paciindi cilya, “bamyooye bacenjete abo bakalinga kulibambite, bakenjilaakwe shibwiinga muŋanda yabwiinga. Lyalo akumulyango kwakacalwa.” (Mate. 25:10) Ndipakeenda ciindi bamyooye baluya bakesa alimwi bakalinga kusuni kunjila. Sombi shibwiinga wakabalwiita ayi: “Nebo nshimwishiiwo.” (Mate. 25:​11, 12) Bamyooye aba tabakalinga kulibambiteewo kulindila shibwiinga kwaciindi cilaamfu. Ino nciiyo nshi ncobatokwiiyaako bananikitwe?

8-9. Ino nciiyo nshi nceenga bananikitwe beeya ku cikoshanyo ca bamyooye? (Amubone acikope.)

⁸ Amutondeshe ayi mulilibambite akubikilako maano. Yesu taakalinga kusansulula ayi kulaakuba makoto obilo abananikitwe, nkokwaamba ayi likoto lyakalinga kulibambite kulindila kushikila kumamanino acishi cino alyatakalinga kulibambiteewo. Sombi wakalinga kwaamba sheshi shikacitike kubananikitwe na baalilwa kuba balibambite kutolelela kuliyumya cakushomeka kushikila kumamanino. Na caba boobo, teshi bakatambulewo cilambu cabo. (Joni 14:​3, 4) Aya ngamakani ngobeelete kuyeeyawo cakubikila maano! Inga caba ayi tutolangila kuya kwiculu na kukala pacishi, soonse tulayandika kukonkela kucenjesha kuli mucikoshanyo ca bamyooye. Soonse tulyeelete kuba balibambite kuliyumya kushikila kumamanino.—Mate. 24:13.

⁹ Pesule lyakwaamba cikoshanyo ca bamyooye kwaamba ayi ayuminishe kuyandika kwa kuba balibambite akubikilako maano, Yesu wakaamba cikoshanyo ca matalenti. Cikoshanyo ici cilaamba pakuyandika kwa kusebensa cankusu.

MATALENTI

10. Ino basebenshi bobilo bakatondesha buyani ayi balashomeka? (Mateyo 25:​19-23)

¹⁰ Mucikoshanyo ca matalenti, Yesu wakaamba pa basebenshi bobilo bakalinga kushomeka ku mwaami wabo aumwi watakalinga kushomeka. (Mate. 25:​14-18) Basebenshi bobilo bakatondesha ayi balashomeka kwiinda mukusebensa cankusu kwaamba ayi bacanineewo maali aamwi a mwaami wabo. Mwaami wabo kaatana kuya palweendo wakabapa matalenti, nkokwaamba ayi maali aanji. Basebenshi bobilo bashomeka bakalinga kusebensa cankusu alimwi bakaasebensesha kabotu maali ngakabapa. Ino nshiinshi shakaswaamo? Mwaami wabo ndyaakaboola, wakacana ayi bacaninaawo maali aamwi eelene aayo ngakabapa. Mwaami wabo wakabalumba alimwi bakasangalala pomwi anguwe. (Amubelenge Mateyo 25:​19-23.) Ano ino nciinshi cakacitika ku musebenshi watatu? Ino nciinshi ncaakacita ku maali mwaami wakwe ngaakamupa?

11. Ino nciinshi cakacitika ku musebenshi “mutolo” alimwi ino nceebonshi?

¹¹ Musebenshi watatu wakapekwa talenti yomwi sombi wakalinga “mutolo.” Mwaami wakwe wakalinga kumulangila kusebensesha kabotu talenti njaakapekwa. Muciindi cakucita boobo, wakaifukila paanshi. Mwaami ndyaakaboola, musebenshi uyu wakaletabo talenti yomwi yeenka njaakapekwa. Musebenshi uyu taakalinga kuyeeya kabotu. Muciindi cakusenga kulekelelwa ceebo cakutacaninaawo maali aamwi a mwaami wakwe, wakamulwiita ayi “muli babiibi moyo.” Musebenshi uyu taakwe kusangalasha mwaami wakwe. Alimwi bakamunyaaya talenti njaakapekwa akumutandaamo muŋanda ya mwaami wakwe.—Mate. 25:​24, 26-30.

12. Ino basebenshi bobilo bashomeka baleemikaninaako baani munshiku shino?

¹² Basebenshi bobilo bashomeka baleemikaninaako Beneklistu bashomeka bananikitwe. Yesu Mwaami wabo, alabeeta kwaamba ayi ‘basangalale akusekelela pantu pomwi anguwe.’ Balatambula cilambu cabo cakuya kwiculu, nkokwaamba ayi “kubushikwa kuswa kubafu kwakutaanguna.” (Mate. 25:​21, 23; Ciyu. 20:5a) Lyalo cakubonenaako citabete kabotu ca musebenshi mutolo, cilacenjesha bananikitwe. Munshila nshi?

13-14. Ino nciiyo nshi bananikitwe ncobeeya kucikoshanyo ca matalenti? (Amubone acikope.)

¹³ Amutondeshe ayi mulasebensa cankusu. Mucikoshanyo ca matalenti a mucikoshanyo ca bamyooye, Yesu taakalinga kusansulula ayi bananikitwe balaakuba batolo. Sombi wakalinga kusansulula sheenga shacitika na bacileka kusebensa cankusu. Inga tabatoleleli kuba pabantu abo Lesa mbwaakeeta akusala, alimwi inga tabasuminishikwi kunjila mu Bwaami bwa kwiculu.—2 Pit. 1:10.

¹⁴ Cikoshanyo ca bamyooye aca matalenti Yesu ncaakaamba, shoonse shilatondesha patuba ayi Beneklistu bananikitwe boonse balyeelete kuba balibambite akubikilako maano akunosebensa cankusu. Ano sa kuli makani aamwi Yesu ngaakaamba kwaamba ayi acenjeshe bananikitwe? Ee! Inga twacana kucenjesha uko mumaswi ngaakaamba acanika pa Mateyo 24:​40, 41.

INO MBAANI BESHI ‘BAKATOLWE’?

15-16. Ino Mateyo 24:​40, 41 ilabacafwa buyani bananikitwe kushiba ayi balayandika kwikala kabalibambite?

¹⁵ Yesu kataana kwaamba shikoshanyo shotatwe nshotwabandikaawo, wakaamba koomboloshekwa kwa bananikitwe uko kweshi kukatondeshe baabo beshi bakeelele kutambula keshibilo kakweelaako. Wakaamba pabasankwa bobilo bakalinga kusebensa mumuunda abanakashi bobilo bakalinga kupela. Basankwa bakalinga kuboneka ayi batosebensa ncito yomwi, abalo banakashi mbocakalinga kuboneka. Sombi Yesu wakaamba ayi “umwi ulaakutolwa, sombi umwi ulaakucaala.” (Amubelenge Mateyo 24:​40, 41.) Lyalo wakayuminisha bashikwiiya bakwe ayi: “Anu kamulibambitebo lyoonse, mukwiinga tamwishi bushiku Mwanaamuntu ndyeshi akese.” (Mate. 24:42) Yesu wakaamba makani akoshenyeeko aaya pesule lyakwaamba cikoshanyo ca bamyooye. (Mate. 25:13) Sa makani aya aleendelana? Mbocitooboneka. Sombi abo beenkabo Lesa mbwaakananika amushimu usalashi alimwi bashomeka, Yesu mbweshi akatole mu Bwaami bwa kwiculu.—Joni 14:3.

¹⁶ Amwikale kamulibambite. Mwineklistu unanikitwe uli woonse weshi akabule kutolelela kwikala kaalibambite, teshi akabunganishikwe pomwi a “basalitwe.” (Mate. 24:31) Alimwi abo boonse balangila kukala pacishi kwamuyayaya, abalo balyeelete kwikala kabalibambite akutolelela kushomeka.

17. Ino nceebonshi tatweelete kulisukama na Yehova wasalawo kunanika bamwi mushimu usalashi munshiku shino?

¹⁷ Tulimushi kabotu Yehova alimwi tulashoma ayi nshaasalawo kucita shoonse shili kabotu. Aboobo tatulisukamiwo na Yehova wasalawo kunanika Beneklistu bamwi bashomeka mushimu usalashi, munshiku shino.c Tuleebaluka Yesu nshaakaamba mucikoshanyo ca muunda waminyansa, pa basebenshi abo bakatalika kusensa ciindi ca liwoola lya namba 11 na 17:00. (Mate. 20:​1-16, NWT) Abo bakeetwa macolesha kusa mukutalika kusebensa mumuunda wa minyansa, bakapekwa maali eelene abaabo bakatalika macuunsa. Ubu mbocibete aku Beneklistu bananikitwe. Tacicite mulandu aciindi ndyeenga basalwa, balaakutambula cilambu cabo cakuya kwiculu na batolelela kushomeka.

AMUKONKELE KUCENJESHA

18-19. Ino nshiinshi nshotweeya kuswa ku shikoshanyo Yesu nshakaamba?

¹⁸ Ino nshiinshi nshotweeya? Cikoshanyo ca mbelele ampongo cilacafwa baabo balangila kukala kwamuyayaya pacishi ayi, balayandika kutolelela kushomeka kuli Yehova pacecino ciindi apaciindi ca mapensho anene. Na kukacaalebo paniini kwaamba ayi Amagedoni italike, Yesu alaakoombolosha Beneklistu bashomeka ayi baleelela kutambula “buumi butamaani.”—Mate. 25:46.

¹⁹ Alimwi twabandika apashikoshanyo shobilo shicenjesha bananikitwe. Mucikoshanyo Yesu ncakaamba ca bamyooye bacenjete abaluya, bali 5 bakatondesha ayi bakalinga kucenjete. Bakalinga kulibambite kulindila shibwiinga kwaciindi cilaamfu, akubikilako maano. Sombi bamyooye baluya tabakalinga kulibambiteewo. Aboobo shibwiinga taakwe kubasuminisha kunjila muŋanda ya bwiinga. Aswebo tulyeelete kuba balibambite kulindila ciindi Yesu ndyeshi akanyonyoole cishi cino, nabi peende ciindi cilaamfu buyani. Alimwi mucikoshanyo ca matalenti Yesu ncaakaamba, twabandika pa basebenshi bobilo abo bakalinga kusebensa cankusu. Bakasebensa cankusu muncito mwaami wabo njaakabapa alimwi bakamusangalasha. Nacibi boobo, musebenshi mutolo taakwe kusangalasha mwaami wakwe. Ino nciinshi ncetutokwiiyawo? Tulyeelete kutolelela kusebensa cankusu muncito yakwe Yehova kushikila kumamanino. Mukweelaako, twabandika mbweenga bananikitwe batolelela kwikala kabalibambite kwaamba ayi Yesu ‘akabatole’ kwiculu mukutambula cilambu cabo. Balisunishishi abuumbi kwaamba ayi ‘bakabunganishikwe pomwi’ a Yesu kwiculu. Pesule lya Amagedoni, balaakuba nabwiinga wakwe Yesu mu bwiinga bwa Mwanaambelele.—2 Tesa. 2:1; Ciyu. 19:​7, 9.

20. Ino nshiinshi Yehova nsheshi akacitile baabo bakonkela kucenjesha kwakwe?

²⁰ Conoonobo ciindi cilaakushika Yesu ndyeshi akoomboloshe bantu, sombi tatweelete kuloonda. Na twatolelela kushomeka, Ishiwesu wakwiculu shilusuno alaakutupa “nkusu shiindaawo nshetucite” kwaamba ayi ‘tukacikoonshe kupuluka . . . ndyeshi tukeemikane kunembo lya Mwanaamuntu.’ (2 Koli. 4:7; Luka 21:36) Tulaakusangalasha Ishiwesu na twakonkela kucenjesha kuli mushikoshanyo Yesu nshakaamba, inga caba ayi tutolangila kuya kwiculu na kukala pacishi. Alimwi mukwiinga Yehova alicite nkuumbu abuumbi, meena esu alaakucanika ‘kaalembetwe mulibuku’ lya buumi.—Danye. 12:1; Ciyu. 3:5.