Sa Mulicishi?

Ino tulishi buyani ayi kwiimba kwakalinga kuyandika abuumbi kubene Isilaeli?

BENE Isilaeli bakalinga kukunyumfwa kabotu abuumbi kwiimba. Mankanda aanji Baibo ilaamba ayi bantu bakalinga kulisha shakulisha shimwi akwiimba nyimbo. Lubasu lunene lwa Baibo ni nyimbo. Kucakubonenaako, libuku lya Kulumbaisha, Lwiimbo lwakwe Solomoni alimwi a Malilo, ni nyimbo. Libuku limwi lyaamba pa buumi mbobwakalinga muciindi camu Baibo lilaamba ayi bene Isilaeli bakalinga kwiimba nyimbo ndyebakalinga kucita shintu shipusenepusene mubuumi bwabo.

Kwiimba nyimbo ndyebakalinga kucita shintu shabushiku abushiku. Bene Isilaeli bakalinga kulisha shakulisha akwiimba nyimbo kutondesha mbobakalinga kulinyumfwa. (Isa. 30:29) Banakashi bakalinga kulisha misebe kabeemba akushana calusangalalo, paciindi ndyebakalinga kubika mwaami pabweendeleshi, pakusekelela a na bakoma balwani babo. (Boombo. 11:34; 1 Samwe. 18:​6, 7; 1 Baam. 1:​39, 40) Bene Isilaeli bakalinga kwiimba anyimbo sha buumba na muntu wafwa. (2 Maka. 35:25) Ncakutatoonsha kwaamba ayi bene Isilaeli bakalinga kukusuni abuumbi kwiimba.

Kwiimba nyimbo muŋanda ya mwaami. Bamaami ba bene Isilaeli bakalinga kusangalala kukutika kunyimbo. Mwaami Saulo wakaleta Defedi muŋanda ya bwaami kwaamba ayi anoomulishila kalumbu. (1 Samwe. 16:​18, 23) Mukuya kwaciindi Defedi ndyakaba mwaami, wakapanga shakulishisha nyimbo, kupanga nyimbo shibotu, akusala bantu abo bakesa mukutalika kulisha nyimbo pa tempele yakwe Yehova. (2 Maka. 7:6; Amosi 6:5) Mwaami Solomoni wakalinga kucite basankwa abanakashi bakalinga kwiimba nyimbo paŋanda yakwe ya bwaami.—Shiku. 2:8.

Kwiimba pakulambila. Ciyandika abuumbi, bene Isilaeli bakalinga kwiimba nyimbo pakulambila Yehova. Alimwi basankwa bali 4,000 bakalinga kulisha shakulisha pa tempele mu Jelusalemu. (1 Maka. 23:5) Bakalinga kulisha tusenke twakulisha, tulumbu tunene atuniini amapeenga. (2 Maka. 5:12) Sombi beshikwiimba aba bakeeishikwa teshi mbobakalinga kulambila Yehova beenkabo kwiinda mu kumwiimbila. Bene Isilaeli baanji bakalinga kwiimba nyimbo ndyebakalinga kuya ku Jelusalemu kukusekelela. Inyimbo isho shakalinga kwiitwa ayi Inyimbo sha Pakutanta. (Kulu. 120-134) Alimwi kweelana ashimwi baJuda nshobakalemba, bene Isilaeli bakalinga kwiimba nyimbo shimwi shili mulibuku lya Kulumbaisha ndyebakalinga kucita kusekelela kwa Kusotokela.

Amunshiku shino, kwiimba kuciyandika abuumbi kubasebenshi bakwe Lesa. (Jemu. 5:13) Tulalumbaisha Yehova kwiinda mukwiimba nyimbo. (Efe. 5:19) Kwiimba kulatucatanya abashominyineesu. (Kolo. 3:16) Alimwi inyimbo shilatuyuminisha ndyetutokwiinda mumapensho. (Milimo 16:25) Kwiimba ninshila ibotu mbotutondesha lushomo lwesu muli Yehova ambotumusuni.