Miipusho Kuswa Kubeshikubelenga
Ino cipinda cakwinjililaako cakalinga pa tempele yakwe Solomoni cakalinga cilaamfu buyani kuya mwiculu?
Cipinda cakwinjililaako cakalinga lubasu lwa mwiinjililo wakuya mu Musena Usalalite wa tempele. Kweelana ama Baibo a New World Translation of the Holy Scriptures akasansululwa mwaaka wa 2023 kootana kushika, “cipinda cakwinjililaako cakalinga kweelene aŊanda yakwe Lesa, nkokwaamba ayi mamita ali 9 (na tukokola 20) mubufwaafwi, mamita ali 54 (na tukokola 120) kuya mwiculu.” (2 Maka. 3:4) Ma Baibo amwi aalo akasansululwa ayi cipinda cakwinjililaako cakalinga cilaamfu “tukokola 120” kuya mwiculu!
Nacibi boobo, Baibo yamu Cisungu ya New World Translation yakapulintwa mu 2023 yakaamba pa cipinda cakwinjililaako cakalinga pa tempele yakwe Solomoni ayi: “Cakalinga kucite tukokola 20 kuya mwiculu,” na pafwiifwi amamita ali 9.a Amuleke tubandike pa sheebo shimwi shiniini shakapa kwaamba ayi kube kwaaluka uku.
Bulaamfu bwakuya mwiculu bwa cipinda cakwinjililaako tabuna kwaambwawo pa 1 Baami 6:3. Palilembo ili, Jelemiya wakalemba bulaamfu alimwi abufwiifwi bwa cipinda cakwinjililaako, sombi taakwe kulembawo mbocakalinga kulaampa kuya mwiculu. Lyalo mucapita 7 wakasansulula kabotu mbasu shimwi sha tempele mboshakalinga, isho shakalinga kwiilikaawo a Cingomo cakubikamo maanshi, shikoci sha mukuba shili 10 alimwi a macinko obilo amukuba isho shakalinga pansengwe lya cipinda cakwinjililaako. (1 Baam. 7:15-37) Ano na ncakwiila cipinda cakwinjililaako cakalinga kwiindilila mamita ali 50 kuya mwiculu alimwi cakalinga cilaamfu kwiinda tempele yoonse, ino nceebonshi Jelemiya taakwe kwaamba mbocakalinga kulaampa kuya mwiculu? Nabi pesule lyakwaamba ayi peenda myaka iinji, baJuda bakeeya makani akale kale tabakwe kulembawo ayi cipinda cakwinjililaako cakalinga cilaamfu kwiinda tempele yakwe Solomoni yoonse.
Bantu bakeeya abuumbi balatoonsha na palubumbu lwa tempele inga payakwa cipinda cakwinjililaako cilaamfu tukokola 120 kuya mwiculu. Kale kale, maanda akalinga kulaampa abuumbi kuya mwiculu ngobakalinga kuyaka amabwe nabi incelwa, mbuli minjililo ya kutempele yakalinga mu Ijipiti, akalinga kuba anene abuumbi kuunshi lyalo kwiculu akalinga kuceya. Sombi tempele yakwe Solomoni teshi mboyakalinga. Bantu bakeeya abuumbi balashoma ayi lubumbu lwa tempele iyi lwakalinga kucite mutika wa mamita ali 2.7 mubufwiifwi. Musankwa waliina lya Theodor Busink uyo wakeeya bunene bantu mbobakalinga kuyaka maanda kale kale wakaamba ayi: “Kweelana amutika wa lubumbu lwa [mwinjililo wa tempele] mbowakalinga kukomena, tacakalinga kukonsheka kuyakawo cipinda cakwinjililaako cilaamfu tukokola 120 [kuya mwiculu].”
Mpashi bamwi tabana kukopolola kabotu maswi acanika pa 2 Makani 3:4. Nabi kwaamba ayi mumabuku amwi akale kale palilembo ili palilembetwe “120,” mumabuku amwi bantu ngobashoma mbuli libuku lya Codex Alexandrinus ilyo lyakalembwa mpashi myaaka iindilila 1,500 yainda alimwi alya Codex Ambrosianus ilyo lyakalembwa mpashi myaaka iindilila 1,400 yainda, palilembo ili palilembetwe “tukokola 20.” Ino nceebonshi beshikukopolola bamwi bakalemba “120” muciindi cakulemba “20”? Liswi lyakwaamba ayi “handiledi” a lyakwaamba ayi “tukokola” alikoshenye mbwaboneka mu ciEbulu. Aboobo beshikukopolola bamwi mpashi bakalemba “handiledi” muciindi cakulemba “tukokola.”
Kwalo, nabi kwaamba ayi tuleelesha kunyumfwishisha mbasu ishi shoonse akutondesha tempele yakwe Solomoni kweelana amboyakalinga, tulabikila bunene maano ncoyakalinga kwiimikaninaako—nkokwaamba ayi tempele inene yakumushimu. Tulalumba abuumbi kwaamba ayi Yehova wakeeta basebenshi bakwe boonse kwaamba ayi banomulambila pa tempele!—Ebu. 9:11-14; Ciyu. 3:12; 7:9-17.
a Makani amweela ali palilembo ili alaamba ayi “mumabuku amwi akale kale palilembetwe ‘120,’ sombi mumabuku amuma Baibo amwi palilembetwe ‘tukokola 20.’”