Mbweenga Basankwa Batondesha Lusuno Abulemu Kubakaabo

1. Ino nceebo nshi cimwi Yehova ncaakapeta bantu cipo ca cikwati?

YEHOVA ngu “Lesa usangalete” alimwi alisuni ayi aswebo tunoosangalala. (1 Timo. 1:​11, NWT) Wakatupa shipo shiinji kwaamba ayi tunoosangalala. (Jemu. 1:17) Cipo comwi ncakatupa ncoolwe cakuba mucikwati. Na musankwa amwanakashi beebana, balashomesha kunootondeshanya lusuno abulemu mucikwati. Alimwi inga balangila kuba alusangalalo abuumbi na batolelela kutondeshanya lusuno.—Tus. 5:18.

2. Ino nshiinshi shicitika mushikwati shiinji munshiku shino?

² Cabicaako ncakwaamba ayi beebene baanji munshiku shino tabaciti kweelana ambobakashomesha pabushiku ndyebakeebana. Aboobo tabasangaleteewo. Lipooti limwi lya conoono kuswa kulibunga lya World Health Organization lyakaamba ayi basankwa baanji balooma bakaabo, kubalwiita maswi abiibi, na kubapensha munshila shimwi. Bamwi balacitabo anga balamulemeka mukaabo na bali pa bantu sombi kabamupensha na bali paŋanda. Kwiilikaawo, banakashi baanji balalinyumfwa ayi tababasuniiwo alimwi tabasangaleteewo ceebo cakwaamba ayi beebaabo baleebela shintu shileta miyeeyo yakoonana.

3. Ino nshiinshi sheenga shapa kwaamba ayi musankwa anoopensha mukaakwe?

³ Ino nceebonshi basankwa bamwi balapensha bakaabo? Mpashi baishiwabo bakalinga kubooma banyinawabo, aboobo abalo inga kababona ayi cilibo kabotu kupensha mukaabo. Basankwa bamwi balapensha bakaabo ceebo cakwaamba ayi basankwa baanji beebete bakumusena uko mbobacita. Basankwa abo inga kabalinyumfwa ayi balyeelete kuba beshilunkutwe kumukaabo kwaamba ayi ashibe ayi balicite nkusu shakumweendelesha. Basankwa bamwi tabakwe kwiiya kulikasha na kuli cacitika kwiilikaawo a na bakalala. Bamwi liinji baleebela shintu shileta miyeeyo yakoonana alimwi kucita boobo kulapa kwaamba ayi banoobona banakashi akoonana munshila itabete kabotu. Kwiilikaawo, malipooti amwi akatondesha ayi paciindi ca bulwashi bwa COVID-19, basankwa baanji bakatalika kupensha bakaabo. Sombi taakuwo cili coonse ceelete kupa kwaamba ayi musankwa anoopensha mukaakwe.

4. Ino nciinshi basankwa Beneklistu beebete ncobeelete kucenjela, alimwi ino nceebonshi?

⁴ Basankwa beebete abo basebensela Yehova balyeelete kucenjela kwaamba ayi batataliki kunoobona banakashi munshila itabete kabotu mbuli bantu bakucishi.a Ino nceebonshi? Ceebo comwi ncakwaamba ayi shintu muntu nshayeeya liinji nsheshipa kwaamba ayi acite cintu cimwi. Mutumwi Paulo wakacenjesha Beneklistu bananikitwe baku Loma ayi “bwikaalo bwanu butabi anga mbwa bantu bamucishi.” (Loma. 12:​1, 2) Paciindi Paulo ndyaakalembela nkalata Beneklistu baku Loma, kapendite myaaka iinji kuswa ciindi bamulibungano ndyebakaba Beneklistu. Sombi maswi Paulo ngaakabalembela alatondesha ayi bamwi mulibungano bakalinga kunocikonkela tunshiyanshiya akunoyeeya mbuli bantu bakucishi. Ici ncocakapa kwaamba ayi abayuminishe kwaalula mbobakalinga kuyeeya anshobakalinga kucita. Beneklistu beebete abalo balyeelete kunokonkela maswi Paulo ngakaamba. Cabicaako ncakwaamba ayi bamwi balayeeya mbuli bantu bakucishi alimwi bakabapenshawo kale bakaabo.b Ino nshiinshi Yehova nshaasuni ayi basankwa beebete banoocita kubakaabo? Cikumbulo kumwiipusho uyo tulacicana mulilembo paswa mutwi uyu.

5. Kweelana a 1 Pita 3:​7, ino nshiinshi musankwa nshaeelete kunoocita kumukaakwe?

⁵ Amubelenge 1 Pita 3:7. Yehova alisuni ayi musankwa anolemeka mukaakwe. Musankwa ulemeka mukaakwe alamucitila shibotu akumutondesha lusuno. Mumutwi uyu, tutokwiiya mbweenga musankwa watondesha bulemu kumukaakwe. Sombi amuleke tutaangune kubandika pashintu musankwa nshateelete kucita kumukaakwe.

MUTACITI SHILI SHOONSE SHEEENGA SHAKALASHA MUKAANU

6. Ino Yehova alalinyumfwa buyani na musankwa kauma mukaakwe? (Bene Kolose 3:19)

⁶ Kuuma bakaanu. Yehova alipatite muntu uli woonse shinkoondo. (Kulu. 11:​5, NWT) Alalinyumfwa cibiibi abuumbi bunene bunene na musankwa kaapensha mukaakwe. (Mala. 2:16; amubelenge Bene Kolose 3:19.) Kweelana alilembo lya 1 Pita 3:7 paswa mutwi uyu mbolyaamba, musankwa inga wanyonyoola bushicibusa bwakwe a Lesa na kaacita shintu shitabete kabotu kumukaakwe. Alimwi Yehova inga wacileka akukutika mipailo yakwe.

7. Kweelana a Bene Efeso 4:​31, 32, ino ni myaambo ya buyani musankwa njaaelete kuleya? (Amubone alubasu lwa “Kusansulula Maswi.”)

⁷ Kukalokela bakaanu na kubalwiita maswi abiibi. Basankwa bamwi balakalokela bakaabo akubalwiita maswi acisa kumoyo abuumbi. Sombi Yehova alipatite “kukalala, . . . kukalooka nabi kutukana.”c (Amubelenge Bene Efeso 4:​31, 32.) Alanyumfwa shoonse musankwa nshaalwiita mukaakwe. Yehova alakutika cakubikila maano musankwa ndyaatobandika amukaakwe, nabi ndyebalibo bobilo. Na musankwa kaalwiita mukaakwe maswi abiibi, alanyonyoola cikwati cakwe abushicibusa bwakwe a Lesa.—Jemu. 1:26.

8. Ino Yehova alalinyumfwa buyani pamakani akweebela shintu shileta miyeeyo yakoonana, alimwi ino nceebonshi?

⁸ Kweebela shintu shileta miyeeyo yakoonana. Ino Yehova alalinyumfwa buyani pamakani akweebela shintu shamushobo uyu? Alipatite kucita boobo. Aboobo musankwa weebela shintu shileta miyeeyo yakoonana alanyonyoola bushicibusa bwakwe a Yehova alimwi taalemeki mukaakwe.d Yehova alalangila musankwa kutolelela kushomeka kumukaakwe kuteshibo kwiinda mushintu nshaacita, sombi amushintu nshayeeya. Yesu wakaamba ayi na musankwa watolelela kulangilisha mwanakashi calunkumbwa, ingayi wacita kale bulale anguwe “mumoyo” wakwe.e—Mate. 5:​28, 29.

9. Ino nceebonshi Yehova taanyumfwi kabotu na musankwa kaakakatisha mukaakwe kucita cintu ncaatasuniwo pamakani akoonana?

⁹ Musankwa taaelete kukakatisha mukaakwe kucita cintu ncaatasuniwo pamakani akoonana. Basankwa bamwi balakakatisha bakaabo koonanaabo munshila ibapa kulinyumfwa ayi tabasalalite na kupenshekwa anjeelacaamba. Yehova alipatite kulisuna kwa mushobo uyo akutabikila maano kubamwi mbobalinyumfwa. Alalangila musankwa kunotondesha lusuno kumukaakwe, kumuyeeyelaako alimwi akulemeka njeelacaamba yakwe. (Efe. 5:​28, 29) Ano ino mbuyani na musankwa Mwineklistu wakatalika kale kukakatisha mukaakwe kucita shintu nshaatasuniwo, kumupensha nabi kweebela shintu shileta miyeeyo yakoonana? Ino nshiinshi nsheenga wacita kwaamba ayi aalule mbwayeeya anshaacita?

NSHEENGA MUSANKWA WACITA KWAAMBA AYI ACILEEKE MIBO ITABETE KABOTU

10. Ino cakubonenaako cakwe Yesu inga cabacafwa buyani basankwa beebete?

¹⁰ Ino musankwa inga wacita buyani kwaamba ayi acileeke kupensha mukaakwe akutanoomukakatisha kucita shintu nshaatasuniwo? Inga wacita nsheenga wacikonsha kunokonkela cakubonenaako cakwe Yesu. Nabi kwaamba ayi Yesu taakalinga kweebeteewo, nshaakalinga kucita kubashikwiiya bakwe ncakubonenaako cibotu basankwa nceenga bakonkela, citondesha mbobeelete kunolama bakaabo. (Efe. 5:25) Kucakubonenaako, amuleke tubandike nsheenga basankwa beebete beeya kuswa ku shintu Yesu nshaakalinga kucita kubashikwiiya bakwe ambwaakalinga kubandikaabo.

11. Ino nshiinshi Yesu nshaakalinga kucita kubashikwiiya bakwe?

¹¹ Lyoonse Yesu wakalinga kucita shibotu kubashikwiiya bakwe akubatondesha bulemu. Taakalinga kucite lunkutwe kuli mbabo nabi kunoobeendelesha. Nabi kwaamba ayi Yesu wakalinga kucite nkusu kwiinda mbabo, taakalinga kusebensesha nkusu isho kwaamba ayi balinyumfwe ayi taakuwo mbobabete na kunomuloonda. Sombi wakatondesha kuliceesha kwiinda mukubasebensela. (Joni 13:​12-17) Wakalwiita bashikwiiya bakwe ayi: ‘Amwiiye kuli ndime ceebo nebo ndimoote alimwi ndimubombu moyo. Lyalo mulaakucana kookesha mumyoyo yanu.’ (Mate. 11:​28-30) Lilembo ili lyatondesha ayi Yesu wakalinga moote na muntu ulibombya. Na muntu alalibombya tacaambi ayi taacitewo nkusu. Ngu muntu ucikonsha kulikasha. Na bamwi bamukalasha, taafwambaani kukalala alimwi alaleya kwaamba na kucita cintu citabete kabotu.

12. Ino Yesu wakalinga kubandika buyani abamwi?

¹² Yesu wakalinga kuyuminisha bamwi kwiinda mushintu nshaakalinga kwaamba. Taakalinga kulwiita bashikwiiya bakwe maswi atabete kabotu. (Luka 8:​47, 48) Nabi paciindi balwani bakwe ndyebakamucobola akweelesha kumukalasha, ‘taakwe kubaboosheshaamo.’ (1 Pit. 2:​21-23) Pashiindi shimwi, Yesu wakalinga kuumunabo muciindi cakukumbula munshila itabete kabotu. (Mate. 27:​12-14) Wakatondesha cakubonenaako cibotu abuumbi basankwa beebete nceenga bakonkela!

13. Kweelana a Mateyo 19:​4-6, ino musankwa inga wacita buyani kwaamba ayi ‘apankane amukaakwe’? (Amubone acikope.)

¹³ Yesu wakalwiita basankwa ayi balyeelete kutolelela kushomeka kubakaabo. Wakaamba maswi Baishi ngobakaamba akwaamba ayi musankwa alyeelete “kupankana amukaakwe.” (Amubelenge Mateyo 19:​4-6.) Liswi lyamu ciGiliki lyakwaamba ayi “kupankana” lyakasebenseshekwa palilembo ili, lilasansulula “kucatanya” shintu shobilo kusebensesha gulu. Aboobo musankwa amwanakashi beebene balyeelete kuba abushicibusa buyumu abuumbi kubabo anga bakabacatanya a gulu. Na umwi wacita cintu ceenga cakalasha ngwaeebenaakwe, boonse bobilo nkupengelaamo. Aboobo musankwa usuni mukaakwe abuumbi alaleya kweebela shintu shili shoonse sheenga shamuletela miyeeyo yakoonana. Alafwambaana kucileka ‘kulangilisha shintu shitacite ncito.’ (Kulu. 119:37) Bweenka mbuli Jobo, alaba ushinishite kutalangilisha mwanakashi umwi calunkumbwa.—Jobo 31:1.

14. Ino nshiinshi musankwa uuma nabi kulwiita mukaakwe maswi abiibi nshayandika kucita kwaamba ayi ayumye bushicibusa bwakwe a Yehova amukaakwe?

¹⁴ Na musankwa alooma nabi kulwiita mukaakwe maswi abiibi, kuli ashimwi nshayandika kucita kwaamba ayi ayumye bushicibusa bwakwe a Yehova kwiilikaawo amukaakwe. Ino nshiinshi nshaeelete kucita? Cakutaanguna, alyeelete kushiba ayi ncaatoocita ncibiibi akunokwiibaluka ayi Yehova alabona shintu shoonse nshaacita alimwi alanyumfwa shoonse nshaamba. (Kulu. 44:21; Shiku. 12:14; Ebu. 4:13) Cabili, alyeelete kucileka kupensha mukaakwe akwaalula mibo yakwe. (Tus. 28:13) Catatu, alyeelete kusenga kulekelelwa kumukaakwe akuli Yehova. (Milimo 3:19) Alimwi alyeelete kusenga Yehova kwaamba ayi amucaafwe kwaaluka akutalika kuyeeya, kwaamba akucita shintu Yehova nshaasuni. (Kulu. 51:​10-12; 2 Koli. 10:5; Filip. 2:13) Ca namba 4, alyeelete kucitawo comwi pesule lyakupaila kwiinda mukupata kulwana kwa mushobo uli woonse alimwi amyaambo ibiibi. (Kulu. 97:10) Ca namba 5, alyeelete kuya kubamanene cakufwambaana kwaamba ayi bamucaafwe. (Jemu. 5:​14-16) Ca namba 6, alyeelete kubika bubaambo bweenga bwamucafwa kutabooshawo alimwi kucita shintu shitabete kabotu. Musankwa weebela shintu shileta miyeeyo yakoonana alakwe alyeelete kucita shintu ishi shili 6 nshetwabandikaawo. Yehova alaakumucafwa pa kweelesha cankusu kwakwe kwaamba ayi aalule nshaacita. (Kulu. 37:5) Nacibi boobo, musankwa taelete kweelabo pakuleya kucita shintu sheenga shakalasha mukaakwe. Alyeelete kwiiya akunotondesha bulemu kumukaakwe. Ino inga wacita buyani ubo?

MBWEENGA MWATONDESHA LUSUNO ABULEMU KUBAKAANU

15. Ino nshiinshi nsheenga musankwa wacita kwaamba ayi atondeshe lusuno kumukaakwe?

¹⁵ Amutondeshe ayi mulibasuni bakaanu. Bamakwesu bamwi basangalete mucikwati cabo, balacita nsheenga bacikonsha bushiku abushiku kwaamba ayi batondeshe ayi balimusuni abuumbi mukaabo. (1 Joni 3:18) Musankwa inga watondesha ayi alimusuni mukaakwe munshila shipusenepusene. Baibo ilatondesha ayi basankwa bakalinga kukumbata akufyonta bakaabo. Alimwi musankwa inga wamutumina meseji mukaakwe akumulwiita ayi “Ndamuyeeya” na kumwiipusha ayi “Mwasebensa buyani?” Kwiilikaawo, ciindi aciindi inga kaamupako shipo kwaamba ayi atondeshe ayi alimusuni. Na musankwa kaacita boobo, alatondesha ayi alalemeka mukaakwe alimwi cikwati cabo cilayuminaako.

16. Ino nceebonshi musankwa alyeelete kunoolumba mukaakwe?

¹⁶ Munoomulumba. Na musankwa kaalemeka mukaakwe, alamuyuminisha akumupa kulinyumfwa ayi alayandika. Nshila yomwi mbweenga musankwa wacita boobo nkunoolumba mukaakwe pashintu shoonse nshaacita kwaamba ayi amucaafwe. (Kolo. 3:15) Na musankwa kaalwiita mukaakwe shintu nshaasuni pali nguwe, mwanakashi alalinyumfwa kabotu. Kwiilikaawo, alaakulinyumfwa kushitilishikwa, kulemekwa akulinyumfwa ayi beebaye balimusuni.—Tus. 31:28.

17. Ino musankwa inga wacita buyani kwaamba ayi atondeshe bulemu kumukaakwe?

¹⁷ Munomuyeeyelaako akumutondesha bulemu. Musankwa usuni mukaakwe alamubona ayi alayandika alimwi alamulama kabotu. Alamubona ayi ncipo cibotu abuumbi kuswa kuli Yehova. (Tus. 18:22; 31:10) Aboobo alamuyeeyelaako akumutondesha bulemu nabi ndyebatotondeshanya lusuno pamakani akoonana. Taakakatishi mukaakwe koonanaakwe munshila njaatasuni, yeenga yamupa kulinyumfwa ayi taasalalite nabi yeenga yapa kwaamba ayi njeelacaamba inomupensha.f Alimwi musankwa alakwe alyeelete kuleya kucita cili coonse ceenga capa kwaamba ayi njeelacaamba yakwe inomupensha pamakani aya.—Milimo 24:16.

18. Ino nshiinshi basankwa beebete nshobeelete kuba bashinishite kucita? (Amubone akabokosi kacite mutwi utokwaamba ayi “Nshila Shili 4 Mbweenga Mwatondesha Bulemu Kubakaanu.”)

¹⁸ Nobasankwa nomweebete, amushibe ayi Yehova alasangalala na wabona mbomweelesha cankusu kunotondesha bulemu kubakaanu mushintu shoonse nshomwaamba anshomucita. Amube bashinishite kunobatondesha bulemu kwiinda mukuleya kucita shintu sheenga shabakalasha, kunobayeeyelaako alimwi akubatondesha lusuno. Na kamucita boobo, mulaakutondesha ayi balayandika abuumbi kuli ndimwe. Alimwi na kamutondesha bulemu kubakaanu, mulaakushitilisha bushicibusa bwanu a Yehova, ubo buyandika abuumbi.—Kulu. 25:14.