Nobamakwesu Bacanike—Amukonkele Cakubonenaako Cakwe Maako a Timoti

1-2. Ino nshiinshi shakalinga kweelete kupa kwaamba ayi Maako a Timoti bataciti shiinji muncito yakwe Yehova?

NOBAMAKWESU bacanike, sa mulisuni kucita shiinji muncito yakwe Yehova akusebensela bamwi mulibungano? Ncakutatoonsha kwaamba ayi mulisuni kucita boobo. Cilasangalasha abuumbi kubona bacanike balibambite kusebensela bamwi! (Kulu. 110:3) Sombi cimwi ciindi inga tacimubeti cuubu kucita shiinji muncito yakwe Yehova. Sa mulaloonda kucita shiinji muncito yakwe Yehova ceebo cakwaamba ayi tamucishiwo buumi bwanu mbweshi bukabe na Yehova nkweshi akamutuume? Sa mwakakakawo kale kupekwa mukuli umwi ceebo cakuyeeya ayi inga tamucikoonshi kuukumanisha kabotu? Na mboboobo, amushibe ayi kuli abamwi bakalinyumfwawo kale boobo.

² Maako a Timoti abalo mbobakalinga kulinyumfwa paciindi cimwi. Sombi bakasalawo kucita shiinji muncito yakwe Yehova nabi kwaamba ayi tabakalinga kucishiiwo buumi bwabo mbweshi bukabe, akulinyumfwa ayi tabakalinga kweelela kupekwa mikuli imwi. Paciindi mutumwi Paulo a Banabasi ndyebakalwiita Maako ayi bayaakwe palweendo lwabo lwakutaanguna lwa bumishonali, cilyeelete Maako wakalinga kukala abanyina muŋanda ibotu. (Milimo 12:​12, 13, 25) Maako wakaswaako kumusena nkwaakakulila, kwaamba ayi acite shiinji muncito yakwe Yehova. Pakutaanguna, wakaya ku Antyoki. Lyalo wakaya a Paulo a Banabasi mumisena imwi yakalinga kulaale abuumbi. (Milimo 13:​1-5) Timoti alakwe mpashi wakalinga kukala abashali bakwe paciindi Paulo ndyaakamulwiita ayi batalike kusebensela pomwi muncito yakushimikila. Timoti naakwiinga wakakaka kuya a Paulo, ceebo cakwaamba ayi wakalinga wacanike alimwi taakalinga kucishi shiinji. (Amweelanye 1 Bene Kolinto 16:​10, 11 a 1 Timoti 4:12.) Nacibi boobo, wakasumina kutalika kusebensela pomwi a Paulo alimwi wakacana shoolwe shiinji.—Milimo 16:​3-5.

3. (a) Ino tulishi buyani ayi Paulo wakalinga kusuni Maako a Timoti abuumbi? (2 Timoti 4:​6, 9, 11) (Amubone ashikope.) (b) Ino njimiipusho nshi njeshi tubandikeewo mumutwi uyu?

³ Maako a Timoti ndyebakalinga bacanike, bakeeya shiinji kwiilikaawo akushiba bwakusebensa mikuli ipusenepusene mulibungano. Paulo wakalinga kubasuni abuumbi bacanike aba ceebo cakusebensa cankusu kwabo. Aboobo ndyaakalinga pafwiifwi kufwa, wakabeeta kwaamba ayi abe pomwi ambabo. (Amubelenge 2 Timoti 4:​6, 9, 11.) Ino njimibo nshi Maako a Timoti njobakalinga kucite yakapa kwaamba ayi Paulo abasuune akunoobashoma? Ino bamakwesu bacanike inga bacikonkela buyani cakubonenaako cabo? Alimwi ino maswi Paulo ngaakalwiita Timoti inga abacafwa buyani bamakwesu bacanike?

AMULYAABE KUSEBENSELA BAMWI BWEENKA MAAKO MBWAAKACITA

4-5. Ino Maako wakatondesha buyani ayi wakalinga kulyaabite kusebensela bamwi?

⁴ Kusebensela bamwi cilaamba kusebensa cankusu kwaamba ayi tubacaafwe, akutolelela kubacafwa nabi ndyecaba ciyumu kucita boobo. Ici Maako ncaakacita. Cilyeelete kwaamba ayi Maako wakalinyumfwa cibiibi akulefuka Paulo ndyakakaka kuyaakwe palweendo lwakwe lwabili lwa bumishonali. (Milimo 15:​37, 38) Ano sa ici cakapa kwaamba ayi Maako acileeke kusebensela bashominyina? Sobwe.

⁵ Maako wakaya mukusebensela kumusena kumwi pomwi a Banabasi mupyala wakwe. Ndyepakeenda pafwiifwi amyaaka 11, Maako wakalinga pa baabo bakalinga kucafwa Paulo paciindi Paulo ndyaakalinga kwangitwe ku Loma. (Filimo. 23, 24) Alimwi Paulo wakalinga kulumba abuumbi palucafwo lwakwe Maako. Wakaamba ayi ‘alanjuminisha abuumbi.’—Kolo. 4:​10, 11.

6. Ino kuba pomwi abamakwesu bashomeka kwakamucafwa buyani Maako? (Amubone futunoti.)

⁶ Kuba pomwi abamakwesu bashomeka kwakamucafwa abuumbi Maako. Pesule lyakukala a Paulo ku Loma kwakaciindi, Maako wakaya ku Babiloni mukusebensela pomwi a Pita. Bakatalika kunyumfwana abuumbi cakwaamba ayi Pita wakaamba pali Maako ayi ‘ali anga ngumwanaangu.’ (1 Pit. 5:13) Ndyebakalinga kusebensela pomwi, Pita alyeelete wakalinga kulwiita Maako makani asangalasha aamba pabuumi bwakwe Yesu ancito yakwe, ayo Maako ngaakesa mukulemba mulibuku lya Makani Abotu licite liina lyakwe.a

7. Ino Mukwesu James wakacikonkela buyani cakubonenaako cakwe Maako? (Amubone acikope.)

⁷ Maako wakatolelela kusebensa cankusu muncito yakwe Yehova akuba pomwi abamakwesu bakalinga kushimpite lwakumushimu. Ino cakubonenaako cakwe inga mwacikonkela buyani? Mpashi mulisuni kucita shiinji muncito yakwe Yehova sombi tamutokweelela kupekwa mikuli imwi mulibungano. Na mboboobo, mutalefuki. Amutolelele kucana nshila shimwi sha mbweenga mwasebensela Yehova akucafwa libungano. Amuyeeye pacakubonenaako caba James,b abo batosebensa mbuli munene mulibungano. Ndyebakalinga bacanike, bakalinga kulyeelanya kubamakwesu bacanike bamwi. Ba James bakacaalila kupekwa mikuli mulibungano. Bakalinyumfwa cibiibi akulefuka, lyalo mukuya kwaciindi bakalwiitako bamanene mbobakalinga kulinyumfwa. Munene umwi wakabalwiita ayi banoocita nsheenga bacikonsha kusebensela bamwi, nabi kwaamba ayi cimwi ciindi bamwi inga tabashibi shibotu nshobatoocita. Ba James bakakonkela nshobakalwiitikwa akutalika kucafwa bacinene abamwi bakalinga kuyandika kucafwikwa kunoocanika kumabungano. Na bayeeya paciindi cilya, balaamba ayi: “Ndakanyumfwishisha ncocaamba kucita shiinji kwaamba ayi nsebensele bamwi. Ndakaba alusangalalo ceebo cakwaamba ayi ndakalinga kucafwa bamwi.”

AMUKONKELE CAKUBONENAAKO CAKWE TIMOTI KWIINDA MUKUTONDESHA LUSUNO KUBAMWI

8. Ino nceebonshi Paulo ncaakasalila Timoti kwaamba ayi atalike kusebensela pomwi anguwe? (Bene Filipi 2:​19-22)

⁸ Paulo wakalinga kuyandika bamakwesu bataloondi ndyakalinga kuboolela mumatauni umo bantu mobakalinga kumupensha. Wakataanguna kusala Sailasi kwaamba ayi ayaakwe ceebo cakwaamba ayi wakasebensela Yehova kwamyaaka iinji. (Milimo 15:​22, 40) Ndyepakeenda ciindi, Paulo wakasala Timoti kwaamba ayi alakwe atalike kusebensela pomwi ambabo. Ino nceebonshi Paulo ncaakasalila Timoti? Ceebo comwi ncakwaamba ayi wakalinga kucite mpuwo ibotu. (Milimo 16:​1, 2) Alimwi Timoti wakalinga kubabikilako maano abuumbi bantu.—Amubelenge Bene Filipi 2:​19-22.

9. Ino Timoti wakatondesha buyani ayi wakalinga kubabikilako maano abuumbi bashominyina?

⁹ Kuswabo ciindi Timoti ndyaakatalika kusebensela pomwi a Paulo, wakatondesha ayi wakalinga kubikila maano abuumbi kushintu bamwi nshobakalinga kuyandika kuteshi nshaakalinga kusuni. Ici ncocakapa kwaamba ayi Paulo amushiye mu Biliya mukwiinga wakalinga kucishi ayi alaakubayuminisha bashikwiiya bapya. (Milimo 17:​13, 14) Paciindi ici, Timoti alyeelete wakeeya shiinji kuswa kucakubonenaako cakwe Sailasi, mukwiinga alakwe wakalinga wacaala mu Biliya. Sombi mukuya kwaciindi Paulo wakatuma Timoti kuya eenka ku Tesalonika kwaamba ayi akayuminishe Beneklistu bakalinga kukala mutauni iyi. (1 Tesa. 3:2) Mumyaaka 15 yakakonkelaawo, Timoti wakabasuna abuumbi bashominyina. Wakalinga kubasuni abuumbi cakwaamba ayi cimwi ciindi wakalinga kulila na bashominyina batokwiinda mumapensho. (Loma. 12:15; 2 Timo. 1:4) Ino bamakwesu bacanike inga bacikonkela buyani cakubonenaako cakwe Timoti?

10. Ino ba Bevin bakacita buyani kwaamba ayi beeye kunoobikila maano abuumbi kubamwi?

¹⁰ Ba Bevin bakeeya kubikila maano abuumbi kubamwi. Ndyebakalinga bacikula bwangu, cakalinga kubayumina kubandika abamakwesu abenankashi bacinene. Aboobo na bali pa Ŋanda ya Bwaami, bakalinga kubaanshabo akuswaawo. Munene umwi wakalwiita ba Bevin ayi batalike kweelesha kunobandika abacinene kwiinda mukubalwiita nshobakalinga kulumba pali mbabo. Alimwi munene uyo wakabalwiita akunoyeeya pa nsheenga bamakwesu abenankashi bacinene basuna kubandikaawo. Ba Bevin bakakonkela nshobakalwiitikwa. Pacecino ciindi ba Bevin batosebensa mbuli munene. Bakaamba ayi: “Pacecino ciindi cilambeta cuubu kubandika abantu bashiimo shipusenepusene. Ndisangalete ceebo cakwaamba ayi ano ndicishi kabotu mapensho bamwi ngobatokwiindaamo. Ici cilancafwa kushiba bamakwesu abenankashi nshebatoyandika ambweenga ndabacafwa.”

11. Ino bamakwesu bacanike inga bacita buyani kwaamba ayi beeye kunoobikila maano abuumbi kubamwi mulibungano? (Amubone acikope.)

¹¹ Nobamakwesu bacanike, amwebo inga mweeya kunoobikila maano kubamwi. Ndyemuli kumabungano, amweeleshe kunobandika abantu boonse kwiilikaawo abacinene abanike. Munobeepusha mbobatoobuka lyalo akubakutika. Kucita boobo kulaakumucafwa kushiba mbweenga mwabacafwa. Mpashi inga mwacaana ayi beebene bamwi bacinene inga bayandika kubacafwa kushiba bwakusebensesha JW Library^® appu. Na mpashi inga kabataciteewo wakuyaakwe muncito yakushimikila. Sa inga mwalyaaba kubacafwa kushiba bwakusebensesha fooni na tabuleti yabo nabi kuyaabo muncito yakushimikila? Na kamucafwa bamakwesu abenankashi munshila ishi, mulaakutondesha cakubonenaako cibotu mulibungano.

MASWI PAULO NGAAKALWIITA TIMOTI INGA AMUCAFWA

12. Ino bamakwesu bacanike inga bacita buyani kwaamba ayi makalata Paulo ngaakalembela Timoti abacaafwe?

¹² Paulo wakalwiita Timoti maswi akamucafwa kuba alusangalalo akusebensela Yehova peela nkusu shakwe. (1 Timo. 1:18; 2 Timo. 4:5) Na muli mukwesu wacanike, maswi Paulo ngakaamba amwebo inga amucafwa. Munshila nshi? Amukabelenge makalata Paulo ngaakalembela Timoti. Ndyeshi mukanoobelenga, mukanolinyumfwa anga Paulo wakalembela ndimwe akubona mbweenga mwaakonkela mubuumi bwanu. Amuleke tubandike pa maswi amwi ngakaamba.

13. Ino nshiinshi sheenga shamucafwa kutolelela kushomeka kuli Yehova?

¹³ “Usukamebo kuliisha kwikala kweelana akuyanda kwakwe Lesa.” (1 Timo. 4:7b) Paulo wakalinga kulwiita Timoti ayi alyeelete kunooshomeka kuli Yehova akunoocita shintu shimusangalasha. Sombi tulayandika kusebensa cankusu kwaamba ayi tusune Yehova akunoshomeka kuli nguwe. Ino nceebonshi nceenga twaambila boobo? Liswi lyamu ciGiliki lyakasansululwa ayi “usukamebo kuliisha,” liinji lyakalinga kusebenseshekwa kusansulula shikucica lubilo wakalinga kweelesha cankusu kuliisha kwaamba ayi alibambile kucica lubilo lwakupingana. Shikucica lubilo wa mushobo uyo wakalinga kuleya sheenga shamupilinganya lyalo akubikila maano kukushika kumamanino alubilo. Aswebo tulyeelete kuleya sheenga shatupilinganya kwaamba ayi tucikoonshe kucita shintu sheenga shatucafwa kuba abushicibusa buyumu a Yehova.

14. Ino nciinshi ncotweelete kunokwiibaluka ndyetutobelenga Baibo? Amwaambe cakubonenaako.

¹⁴ Cilayandika abuumbi kunobelenga Baibo bushiku abushiku, akunookwiibaluka ayi ncotucitila boobo nkusuna kuba abushicibusa buyumu a Yehova. Kucakubonenaako, ino nshiinshi nsheenga mweeya pali Yehova, na mwabelenga makani atondesha Yesu mbwaakabandika amusankwa wacanike mubile? (Maako 10:​17-22) Musankwa wacanike uyo wakalinga kushoma ayi Yesu ngo Mesiya, sombi taakalinga kucite lushomo luyumu kwaamba ayi abe shikwiiya wakwe. Nacibi boobo, Yesu wakalinga kumusuni musankwa wacanike uyo nabi kwaamba ayi taakalinga kucite lushomo luyumu. Wakabandikaakwe munshila yankuumbu. Wakalinga kusuni kwaamba ayi musankwa uyo asale kucita cintu cili kabotu. Alimwi Yesu wakatondesha ayi Yehova wakalinga kumusuni musankwa uyo. (Joni 14:9) Ndyeshi munooyeeya pamakani aya, amuliipushe ayi, ‘Mubupusano amusankwa mubile wacanike nshaakacita, ino nshiinshi nshonjelete kucita kwaamba ayi mbe abushicibusa buyumu a Yehova akusebensela bamwi peela nkusu shangu?’

15. Ino nceebonshi mukwesu wacanike alyeelete kutondesha cakubonenaako cibotu? (1 Timoti 4:​12, 13)

¹⁵ ‘Ube cakubonenaako kubashomi.’ (Amubelenge 1 Timoti 4:​12, 13.) Paulo wakayuminisha Timoti kwiiya kubelenga kabotu akucishiba kabotu kwiisha. Alimwi wakamuyuminisha akwiiya kuba amibo ibotu mbuli lusuno, lushomo alimwi akubula kampenda. Ino nceebonshi? Nceebo cakwaamba ayi liinji bantu balakonkela bunene nshotucita kuteshi nshotwaamba. Kucakubonenaako, amuyeeye ayi mwapeekwa lubasu lwa kuyuminisha libungano kunosebensa cankusu muncito yakushimikila. Cilaakumubeta cuubu kucita boobo na mulasebensa cankusu muncito yakushimikila. Alimwi libungano lilaakusuna kukonkela nsheshi mukaambe ceebo cakwaamba ayi mulatondesha cakubonenaako cibotu.—1 Timo. 3:13.

16. (a) Kweelana a 1 Timoti 4:​12, ino nshiinshi nsheenga bamakwesu bacanike bacita kwaamba ayi batondeshe cakubonenaako cibotu kubamwi? (b) Ino mukwesu wacanike inga wacita buyani kwaamba ayi atondeshe cakubonenaako cibotu ‘mumyaambo’?

¹⁶ Pa 1 Timoti 4:​12, Paulo wakaamba nshila shipusenepusene mbweenga mukwesu wacanike watondesha cakubonenaako cibotu. Sa inga mweelesha kwiiya pa nshila isho ndyemutoocita ciiyo capalwaanu? Kucakubonenaako, atwaambe ayi mulisuni kunotondesha cakubonenaako cibotu ‘mumyaambo.’ Amuyeeye pa nsheenga mwaamba kwaamba ayi muyuminishe bamwi. Na mucikala abashali banu, sa inga mweelesha kunoobalumba lyoonse pashintu nshobamucitila? Pesule lya kubungana, sa inga mwalwiita mukwesu nabi nankashi camuyuminisha palubasu ndwaalinga kucite? Alimwi inga mweelesha kunokwaamba shikumbulo mumaswi anu. Na mweelesha cankusu kunotondesha cakubonenaako cibotu mushintu nshomwaamba, bamwi balaakubona ayi mutooya panembo lwakumushimu.—1 Timo. 4:15.

17. Ino nshiinshi sheenga shacafwa mukwesu wacanike kukumanisha nshaasuni kucita lwakumushimu? (2 Timoti 2:22)

¹⁷ “Ucileeke lunkumbwa lwa mubili lwa bwanike, ukonkelebo bululami.” (Amubelenge 2 Timoti 2:22.) Paulo wakayuminisha Timoti kuleya kucita shintu sheenga shapa kwaamba ayi aalilwe kucita shiinji muncito yakwe Yehova na sheenga shanyonyoola bushicibusa bwakwe a Yehova. Mpashi mulatola ciindi cinene kucita shakulikondelesha aboobo tamubiwo aciindi cinene cakusebensela Yehova. Kucakubonenaako, amuyeeye paciindi ncomutola kusekana shisekano, kusebensesha intaneti, na kusekana mageemu apafooni nabi pa kompyuta. Sa inga mwapatulako ciindi ncomucita shintu ishi kwaamba ayi mube aciindi cinene cakucita shakumushimu? Mpashi inga mwalyaaba kubotesha akubamba Ŋanda ya Bwaami momubunganina na kushimikila kusebensesha kakoci. Na kamucita shintu ishi, mulaakuba abeshicibusa bapya beshi bakamucaafwe kusala shakucita lwakumushimu akushikumanisha.

MULAAKUCANA SHOOLWE NA KAMUSEBENSELA BAMWI

18. Ino nshoolwe nshi Maako a Timoti nshobakacana?

¹⁸ Maako a Timoti bakalyaaba kwaamba ayi basebensele bamwi peela nkusu shabo, aboobo bakalinga kusangalete alimwi bakacana shoolwe shiinji. (Milimo 20:35) Maako wakalinga kweenda mishinso ilaamfu kwaamba ayi acafwe bashominyina. Alimwi wakalemba makani asangalasha aamba pabuumi anciito yakwe Yesu. Timoti wakacafwa Paulo kutalika mabungano alimwi akuyuminisha bashominyina. Ncakutatoonsha kwaamba ayi Yehova wakalinga kusangalete ceebo cakulyaaba kwakwe Maako a Timoti.

19. Ino nceebonshi bamakwesu bacanike balyeelete kukonkela maswi Paulo ngaakalwiita Timoti, alimwi ino nshiinshi sheshi shikasweemo?

¹⁹ Makalata Paulo ngaakalembela Timoti, alatondesha ayi wakalinga kumusuni abuumbi. Makalata aya akatanjililwa amushimu usalashi alatondesha ayi Yehova alimusuni abuumbi andimwe nobamakwesu bacanike. Alisuni ayi munooba alusangalalo ndyemutomusebensela. Aboobo amukonkele Paulo nshaakalwiita Timoti akusunishisha kusebensela bamwi peela nkusu shanu. Na mwacita boobo, mulaakuba abuumi busangalasha pacecino ciindi alimwi mulaakucatisha “buumi bwancinencine” mbotutolangila.—1 Timo. 6:​18, 19.