Amuliceeshe na Kuli Shintu Nshomutacishi

1. Ino Yehova wakatulenga munshila ya buyani, alimwi ino nceebonshi?

YEHOVA wakatulenga munshila yakwaamba ayi katucikonsha kuyeeya, kwiiya shintu shipya akushiba mbweenga twakonkela nshotwiiya. Ino nceebonshi wakatulenga munshila yamushobo uyu? Alisuni kwaamba ayi tube “alushibo . . . lwa pali Lesa” lweenga lwatucafwa kunoosala kabotu shakucita ndyetutomusebensela.—Tus. 2:​1-5; Loma. 12:1.

2. (a) Ino nciinshi ncotweelete kushiba pali ndiswe? (Bene Loma 11:​33, 34) (Amubone acikope.) (b) Ino tulafubilaamo buyani na twashiiba ayi teshi shintu shoonse nshotucishi?

² Nabi kwaamba ayi Yehova wakatulenga munshila yakwaamba ayi katucikonsha kwiiya shintu shipya, kuli shintu shiinji nshotutacishiiwo. (Amubelenge Bene Loma 11:​33, 34.) Amuyeeye pacakubonenaako cakwe Jobo. Yehova wakamwiipusha miipusho iinji yakamupa kushiba ayi kuli shintu shiinji nshatakalinga kucishiiwo. Miipusho iyo yakamucafwa kushiba ayi wakalinga kweelete kuliceesha akwaalula mbwakalinga kuyeeya. (Jobo 42:​3-6) Aswebo tulafubilaamo na twashiiba ayi teshi shintu shoonse nshotucishi. Kucita boobo kulatucafwa kuliceesha akunoshoma ayi lyoonse Yehova ananotulwiita sheenga shatucafwa kunoosala kabotu shakucita.—Tus. 2:6.

3. Ino nshiinshi nsheshi twiiye mumutwi uyu?

³ Mumutwi uyu, tutobandika pashintu nshotutacishiiwo ambweenga kutashiba shintu isho kwapa kwaamba ayi cimwi ciindi buumi butuyumine. Alimwi tutokwiiya ancocibetele kabotu kutashiba shintu shimwi. Nsheshi twiiye shitootucafwa kushoma cakutatoonsha ayi Yehova “ushi shintu shoonse,” alatulwiita shintu shoonse nshotuyandika kushiba.—Jobo 37:16.

TATUCISHIIWO BUSHIKU MAMANINO NDYESHI AKESE

4. Kweelana a Mateyo 24:​36, ino nciinshi ncotutacishiiwo?

⁴ Amubelenge Mateyo 24:36. Tatucishiiwo bushiku cishi cino ndyeshi cikanyonyoolwe. Yesu alakwe ndyaakalinga pacishi, taakalinga kucishiiwo ‘bushiku nabi ciindi.’a Ndyepakeenda ciindi, wakalwiita batumwi bakwe ayi Yehova ngoocite nkusu shakusala ciindi shintu shimwi ndyeshi shikacitike. (Milimo 1:​6, 7) Yehova wakasala kale bushiku mamanino ndyeshi akese, sombi inga tatucikonshi kushiba bushiku ubo.

5. Ino nshiinshi sheenga shatucitikila ceebo cakwaamba ayi tatucishiiwo bushiku bwiine mamanino ndyeshi akese?

⁵ Tatucishiiwo na tulaakuyandika kulindila kwaciindi cilaamfu buyani kwaamba ayi mamanino ese. Aboobo inga twaalilwa kukalika moyo na kulefuka, bunene bunene na twakatalika kale kale abuumbi kulindila bushiku bwakwe Yehova. Na mpashi inga catuyumina kuliyumya ceebo ca kusekwa ku beshikamukowa na kubantu bamwi. (2 Pit. 3:​3, 4) Mpashi inga katuyeeya ayi naakwiinga katucishi bushiku mamanino ndyeshi akese, naakwiinga kacili cuubu kukalika moyo akuliyumya na bamwi batotuseka.

6. Ino nceebonshi ncibotu kwaamba ayi tatucishiiwo bushiku bwiine mamanino ndyeshi akese?

⁶ Ceebo cakwaamba ayi Yehova taakwe kutulwiita bushiku bwiine mamanino ndyeshi akese, tulicite coolwe cakutondesha ayi tulamusebensela ceebo cakwaamba ayi tulimusuni alimwi tulamushoma. Tulisuni kusebensela Yehova kwamuyayaya, kuteshi kweelabo paciindi mamanino ndyeshi akese. Aboobo muciindi cakunoyeeya bunene ciindi ‘bushiku bwakwe Yehova’ ndyeshi bukese, ncibotu kunoyeeya pashintu shibotu sheshi shikacitike na mamanino akese. Kucita boobo kulaakutucafwa kuyumya bushicibusa bwesu a Yehova, kunoomushoma akucita nsheenga twacikoonsha kwaamba ayi tunoomusangalasha.—2 Pit. 3:​11, 12.

7. Ino nshiinshi nshotucishi?

⁷ Ncibotu kubikila maano kunoyeeya pashintu nshotucishi. Tulicishi ayi inshiku shakweelaako shakatalika mu 1914. Kwiinda mu Baibo, Yehova wakatulwiita bushinshimi butondesha patuba ayi mumwaaka wa 1914 inshiku shakweelaako ndyeshakatalika. Alimwi wakatulwiita abushinshimi buunji butondesha shintu mboshakalinga kusa mukuba mucishi pesule lya mwaaka uyu. Ceebo cakwaamba ayi bushinshimi ubo bwakakumanishikwa, tulashoma cakutatoonsha ayi ‘bushiku bunene bwakwe Yehova buli pafwiifwi.’ (Sefa. 1:14) Alimwi tulicishi ayi Yehova alisuni ayi tunosebensa ncito yakushimikila bantu ‘makani abotu aamba sha Bwaami.’ (Mate. 24:14) Makani abotu aya atooshimikilwa mushishi shishika pafwiifwi a 240 mumishobo iindilila 1,000. Tatuyandiki kushiba ‘bushiku nabi ciindi’ kwaamba ayi tunosebensa cankusu muncito iyi iyandika.

TATUSHIBIIWO YEHOVA MBWEENGA WATUCAFWA

8. Ino maswi akwaamba ayi “mulimo wakwe Lesa” alasansulula nshi? (Shikushimikila 11:5)

⁸ Teshi lyoonse ndyetushiba “mulimo wakwe Lesa.” (Amubelenge Shikushimikila 11:5.) Maswi aya alasansulula Yehova nsheenga wasalawo kucita na nsheenga wasuminisha ayi shicitike, kwaamba ayi akumanishe kuyanda kwakwe. Inga tatushibi kabotu Yehova nceenga walekela kwaamba ayi shintu shimwi shicitike na ciine nceshi akacite kwaamba ayi atucaafwe. (Kulu. 37:5) Nciyumu abuumbi kulindiswe kunyumfwishisha Yehova nshaacita, bweenka mbocitubeta ciyumu kunyumfwishisha mwaana mbwaakula mumala muli banyina. Nabibo beshisiyansi tabacina kunyumfwishisha kabotu mwaana mbwaakula mumala muli banyina.

9. Ino nshiinshi nsheenga twaciita ceebo cakutashiba kabotu Yehova mbweshi akatucaafwe?

⁹ Na katutacishi kabotu Yehova mbweshi akatucaafwe, inga twatalika kuwayawaya kusalawo kucita shintu shimwi. Mpashi inga twawayawaya kulyaaba kushiya shintu shimwi kwaamba ayi tucite shiinji muncito yakushimikila na kulongela kumusena kuli beshikushimikila baniini. Mpashi inga twatalika kuyeeya ayi Yehova taakondetwe palindiswe ceebo cakwaamba ayi tatutocikoonsha kukumanisha nshotusuni kucita lwakumushimu nabi kwaamba ayi tutokweelesha cankusu. Mpashi inga katusebensa cankusu muncito yakushimikila sombi katutaciteewo ciiyo ca Baibo nabi comwi. Na mpashi inga katusebensa cankusu muncito imwi mulibunga lyakwe Yehova, sombi katucana mapensho aanji. Ishi shoonse inga shatupa kunoobona anga Yehova taatotucafwaawo.

10. Ino ngumubo nshi uyandika ngweenga twabaawo ceebo cakutashiba kabotu Yehova nsheshi akacite?

¹⁰ Kutashiba kabotu Yehova nsheshi akacite, inga kwatucafwa kuba amibo iyandika mbuli kuliceesha. Alimwi kulatucafwa kunyumfwishisha ayi miyeeyo yakwe Yehova anshila shakwe shilinditeewo palindiswe. (Isa. 55:​8, 9) Kwiilikaawo, tuleeya kunoocinka manungo muli nguwe cakumaninina kwaamba ayi atucaafwe kuswitilila. Tulalumbaisha Yehova na mwaswa shibotu muncito yesu yakushimikila na muncito imwi ya Bwaami njeenga twasebensa. (Kulu. 127:1; 1 Koli. 3:7) Alimwi na shintu shabula kweenda kweelana ambotwalinga kulangila, tulyeelete kunokwiibaluka ayi Yehova alicishi shoonse alimwi alaakutucafwa kutolelela kuba aluumuno. (Isa. 26:12) Tulacita nsheenga twacikoonsha akushoma cakutatoonsha ayi Yehova ananootucafwa lyoonse. Tulishomete ayi ananotutanjilila nabi kwaamba ayi inga taaciti boobo munshila ya caankamiko mbuli mbwaakalinga kucita kale kale.—Milimo 16:​6-10.

11. Ino nshiinshi nshotucishi sheenga shatucafwa?

¹¹ Tulicishi ayi lyoonse Yehova alatondesha lusuno, alacita shintu mubululami alimwi ngumusongo. Tulicishi ayi alitusuni abuumbi ceebo ca shintu nshotumucitila anshotucitila bashominyineesu. Alimwi tulicishi ayi lyoonse Yehova alabapa shoolwe abo bashomeka kuli nguwe.—Ebu. 11:6.

TATUCISHIIWO SHESHI SHIKACITIKE CIILO

12. Kweelana a Jemusi 4:​13, 14, ino nshiinshi nshotutacishiiwo?

¹² Amubelenge Jemusi 4:​13, 14. Cancine ncakwaamba ayi tatucishiiwo sheshi shikatucitikile ciilo. Ndyetucili mucishi cino cibiibi, muntu uli woonse inga ‘washamwa pashiindi shipusenepusene.’ (Shiku. 9:11) Aboobo inga tatushibiiwo na nshotusuni kucita shilaakuswitilila nabi na tulaakutolelela kuba boomi kwaamba ayi tukashikumanishe.

13. Ino nshiinshi sheenga shatucitikila ceebo cakutashiba kabotu sheshi shikacitike kunembo?

¹³ Inga catuyumina kuliyumya ceebo cakutashiba kabotu sheshi shikacitike kunembo. Munshila nshi? Na katulisukama abuumbi pa sheenga shacitika, inga twacileka kuba alusangalalo. Buumi bwesu inga bwaaluka cakuteengashila na mpashi shintu shibiibi inga shatucitikila cakuteengashila. Na shamushobo uyu shatucitikila, inga twalinyumfwa cibiibi abuumbi na kukalala. Alimwi na nshetwalinga kulangila tashina kukumanishikwa, inga twalefuka abuumbi.—Tus. 13:12.

14. Ino nshiinshi nshotweelete kucita kwaamba ayi tutolelele kuba alusangalalo? (Amubone ashikope.)

¹⁴ Na twatolelela kusebensela Yehova nabi twiinde mumapensho ali buyani, tulatondesha ayi tulamusebensela ceebo cakwaamba ayi tulimusuni. Shakubonenaako shamu Baibo shilatondesha ayi teshi lyoonse Yehova ndyeenga watushitilisha kumapensho alimwi taasalili limwi sheshi shikatucikile. Alicishi ayi inga twatolelela kuba alusangalalo nabi katutacishiiwo shintu shoonse sheshi shikatucitikile. Alimwi tulaakutolelela kuba alusangalalo na katumusenga butanjilishi akunoomunyumfwila. (Jele. 10:23) Na katushoma muli nguwe ndyetutosalawo shakucita, cilababo anga tutokwaamba ayi: ‘Na nkuyanda kwakwe Yehova, tulaakubukila buumi akucita boobo aboobo.’—Jemu. 4:15.

15. Ino nshiinshi nshotucishi pasheshi shikacitike kunembo?

¹⁵ Nabi kwaamba ayi tatushibiiwo mbweshi bukace ciilo, tulicishi ayi Yehova wakatushomesha buumi butamaani—inga caba ayi nkwiculu nabi pacishi. Tulicishi ayi inga taabeciiwo alimwi taakuwo ceenga capa kwaamba ayi aalilwe kukumanisha shishomesho shakwe shoonse. (Taita. 1:2) Lakwe eenkabo ngwaacite nkusu sha ‘kwaambila limwi sheshi shikacitike. Ee, kushaambila limwi kashitana kucitika.’ Shoonse nshakaambila limwi kale kale shakacitika alimwi shoonse nshaakaamba ayi shilaakucitika kunembo, ashalo shilaakukumanishikwa. (Isa. 46:10) Tulishomete cakutatoonsha ayi taakuwo ceenga capa kwaamba ayi Yehova acileeke kututondesha lusuno. (Loma. 8:​35-39) Alaakutupa busongo, kutuyuminisha akutupa nkusu kwaamba ayi tucikoonshe kuliyumya mumapensho ali oonse eenga atupolela. Inga twashooma ayi Yehova alaakutucafwa akutupa shoolwe.—Jele. 17:​7, 8.

NCIYUMU KUNYUMFWISHISHA KABOTU YEHOVA MBWAATWISHI

16. Kweelana a Kulumbaisha 139:​1-6, ino nshiinshi Yehova nshaacishi palindiswe alimwi ino ici cilamupa kulinyumfwa buyani?

¹⁶ Amubelenge Kulumbaisha 139:​1-6. Mulengi wesu alishi shoonse palindiswe. Alicishi mbotulinyumfwa ashipa kwaamba ayi tunoyeeya mbotuyeeya. Alanyumfwa nshotwaamba alimwi alashiba shili mumoyo wesu. Alabona ashintu shoonse nshotucita ashipa kwaamba ayi tunoshicita. Kweelana a Defedi mbwakaamba, lyoonse Yehova alaba ulibambite kutucafwa. Cilayuminisha abuumbi kushiba ayi Mwaami wa bubumbo boonse alimwi Mulengi shinkusu shoonse, alatubikilako maano abuumbi! Tulalinyumfwa mbuli Defedi uyo wakaamba ayi: “Lushibo lwanu pali ndime lwanyinda ciimo. Ncakwiila nshikoonshi kunyumfwisha lushibo lwa mushobo uyo.”—Kulu. 139:6.

17. Ino nceebonshi inga catuyumina kushoma ayi Yehova alitwishi kabotu?

¹⁷ Mpashi inga catuyumina kushoma ayi Yehova ngu Ishiwesu shilusuno utubikilako maano, ceebo ca shintu shakacitika mumukwashi wesu, nkulilo yesu na shintu nshotwakalinga kushoma katutana kwiiya cancine. Na mpashi inga katulinyumfwa ayi shilubo nshotwakacita kale kale nshinene abuumbi cakwaamba ayi Yehova inga taasuni kutushiba alimwi ayi ali kulaale abuumbi andiswe. Cimwi ciindi Defedi alakwe mbwakalinga kulinyumfwa. (Kulu. 38:​18, 21) Na mpashi muntu utokweelesha cankusu kwaalula buumi bwakwe kwaamba ayi anoocita shintu shisangalasha Lesa, inga watalika kuyeeya ayi, ‘Na Lesa alicishi kabotu mbombete, ino nceebonshi alisuni ayi ngalule buumi bwangu muciindi cakundekabo bweenka mbobete?’

18. Ino kushiba ayi Yehova alitwishi kabotu kwiinda ambotulishi sobeene kulatucafwa buyani? (Amubone ashikope.)

¹⁸ Inga tweeya kunooshoma ayi Yehova alitwishi kabotu kwiinda ambotulishi sobeene alimwi ayi alabona mibo ibotu muli ndiswe mpashi swebo njeenga katutaboni. Nabi kwaamba ayi alabona shilubo nshotucita alimwi alanyumfwishisha mbotulinyumfwa acitupa kucita shintu, alicishi ayi inga twaaluka alimwi alatucafwa calusuno. (Loma. 7:15) Na twashiiba ayi lyoonse alabikila maano kumibo ibotu njotucite, tulaakuyuminishikwa kutolelela kumusebensela cakushomeka akuba alusangalalo.

19. Ino ngumubo nshi unene Yehova ngwaacite? Amusansulule.

¹⁹ Tulicishi ayi mubo unene Yehova ngwaacite ndusuno. Inga tatutoonshi nabibo paniini ayi ubo mbwaabete. (1 Joni 4:8) Tulicishi ayi shoonse nshaatulwiita kucita anshaatukasha, nceebo cakwaamba ayi alitusuni alimwi alisuni kwaamba ayi tube abuumi bubotu. Kwiilikaawo, tulicishi ayi alisuni ayi tukabe abuumi butamaani. Wakatupa cilubula kwaamba ayi cikakonsheke kukala kwamuyayaya. Ceebo ca cipo ca cilubula, inga twashooma ayi nabi tulacita shilubo, inga cakonsheka kusebensela Yehova munshila imusangalasha. (Loma. 7:​24, 25) Alimwi tulicishi ayi “lushibo lwakwe Lesa ndunene kwiinda lwa myoyo yesu alimwi ayi lakwe ulishi shintu shoonse.” (1 Joni 3:​19, 20) Yehova alabona shintu shoonse nshotucita alimwi alashoma ayi inga twacikoonsha kucita kuyanda kwakwe.

20. Ino nciinshi ncotweelete kucita kwaamba ayi tutanolisukama bunene pashintu nshotutacishi?

²⁰ Yehova alatulwiita shintu shoonse nshotuyandika kushiba. Aboobo tatuyandiki kulisukama pashintu nshotutacishi. Muciindi cakucita boobo, tulyeelete kubikila maano kushintu shiyandika abuumbi. Na twacita boobo, tulatondesha ayi tulaliceesha alimwi tulamushoma abuumbi Yehova “musongo mwiine mwiine.” (Jobo 36:4) Nabi kwaamba ayi kuli shintu shimwi nshotutanyumfwishishi pacecino ciindi, tulicishi ayi Yehova alaakutolelela kutwiisha shintu shipya kwamuyayaya. Alimwi tulisangalete mukwiinga tulaakutolelela kwiiya shintu shipya pali Lesa wesu Wiinditeewo.—Shiku. 3:11.