SHAKACITIKA MUBUUMI BWABO
Nshotweeya Mubuumi Bwesu Kuswa Kumufundishi Wesu Wiinditewo
TWAKEENDA munshila motwakacana basoja bakalinga kwiimika bantu, kukala kumusena bantu nkobakalinga kwaambilisha nshobasuni, kwakalinga kuloka mfula ya cipuupu, kwakalinga nkoondo alimwi paciindi cimwi twakacicaawo paŋanda yesu. Ubu mbobukaalo bumwi buloondesha nebo amukaangu mbotwakeendaamo ndyetwakalinga kusebensa mbuli bapainiya ambuli bamishonali. Nabi kwaamba ayi twakeenda mumapensho aanji mubuumi bwesu, tulisangalete pashintu nshotwakasalawo kucita! Yehova watolelela kutucafwa akutupa shoolwe mubuumi bwesu. Mbuli Mufundishi wesu Wiinditeewo, wakatwiisha shiiyo shiyandika.—Jobo 36:22; Isa. 30:20.
BASHALI BANGU BAKANTONDESHA CAKUBONENAAKO CIBOTU
Mu 1957, bashali bangu bakalonga kuswa ku Italy kuya ku Kindersley, tauni ili kumusena wiitwa ayi Saskatchewan mucishi ca Canada. Ndyepakeendabo ciindi ciniini, bakeeya cancine alimwi soonse twakatalika kubikila maano kukusebensela Yehova. Ntokwiibaluka ndyendakalinga mwanike, ndakalinga kusebensa ciindi cilaamfu muncito yakushimikila pomwi abamumukwashi wangu. Cakalingabo anga paciindi ndyendakalinga kucite myaaka 8, ndyendakatalika bupainiya bwakucafwilisha!
Kaandi abamumukwashi wangu cakuma 1966
Bashali bangu bakalinga bapenshi, sombi bakalinga kulyaaba abuumbi kwaamba ayi basebensele Yehova. Kucakubonenaako, bakoolisha shintu shiinji nshobakalinga kucite kwaamba ayi bacane maali akucanika kukubungana kunene kwabaabo baswa mushishi uko kwakabeta mutauni ya Pasadena ku California, ku United States of America. Mu 1972 twakeenda mushinso ulaamfu abuumbi kuya ku tauni ya Trail, ili kumusena wiitwa ayi British Columbia mu Canada, kwaamba ayi tuye mukushimikila bantu baamba ciItalian. Bata bakalinga kusebensa ncito yakubotesha akubamba shintu. Bakalinga kukaka kubapolomota kuncito mukwiinga bakalinga kusuni kunoobikila maano kukusebensela Yehova.
Ndalumba abuumbi pacakubonenaako cibotu bashali besu ncobakatutondesha pomwi amunene wangu abamanike bangu bobilo. Mbobakalinga bakutaanguna kuntondesha mbweenga ndasebensela Yehova. Bankanjiisha cintu nceshi nkabule kuluba mubuumi bwangu, cakwaamba ayi na ndabika sha Bwaami panembo, Yehova alaakundama.—Mate. 6:33.
KUTALIKA NCITO YACIINDI COONSE
Mu 1980, ndakeeba mwanakashi mubotu waliina lya Debbie, uyo wakalinga kubikila maano kukusebensela Yehova. Twakalinga kusuni kusebensa ncito ya ciindi coonse, aboobo ba Debbie bakatalika bupainiya ndyepakeenda myeenshi yotatwe kuswa ciindi ndyetwakeebana. Ndyepakeendabo mwaaka womwi kuswa ciindi ndyetwakeebana, twakalongela kulibungano kwakalinga kuyandika beshikushimikila baanji. Aboobo anebo ndakatalika kusebensa bupainiya.
Pabushiku bwa bwiinga bwesu mu 1980
Ndyepakeenda ciindi, twakalefuka alimwi twakalinga kusuni kuswaako. Nacibi boobo, twakataanguna kubandika amutanjilili walubasu. Wakatulwiita cakuteenda mweela sombi munshila yalusuno ayi: “Nshomutoocita shitoopa kwaamba ayi bukaalo bwanu buyumineeko. Mutobikila bunene maano kumapensho oonse ngomutokwiindaamo. Sombi na mwabikila maano kulanga pashibotu, mulaakushicana.” Uku kwakalinga nkululika kwapaciindi ceelete. (Kulu. 141:5) Peenkaapo twakakonkela nshaakatulwiita alimwi tapana kwiinda aciindi twakatalika kubona shibotu shiinji muncito yesu. Baanji mulibungano lyesu bakalinga kusuni kucita shiinji kwiilikaawo abacanike, abaabo bakalinga mucikwati amuntu uteshi Kamboni. Ici cakalinga nciiyo ciyandika abuumbi kuli ndiswe. Twakeeya kunoobikila maano ku shibotu akushoma ayi Yehova alaakutucafwa kuliyumya mubukaalo mbweenga twendaamo. (Mika 7:7) Twakatalika alimwi kuba alusangalalo, alimwi shintu shakatalika kweenda kabotu.
Bamakwesu bakalinga kutwiisha mucikolo ca bapainiya ncotwakataanguna kucanikaako, bakasebenselawo kale mushishi shimwi. Bakatutondesha shikope, akutulwiita mapensho ashoolwe nshobakacana ndyebakalinga kusebensela kushishi shimwi, alimwi ici cakatucafwa kusuna kusebensa mbuli bamishonali. Aboobo twakasalawo kusebensa ncito iyi.
Katuli pa Ŋanda ya Bwaami ku British Columbia mu 1983
Kwaamba ayi tukumanishe nshotwakasalawo kucita, mu 1984 twakalongela kumusena nkobaamba ciFrench mu Quebec, mushinso ulaampa makilomita eendilila 4,000 kuswa kumusena wiitwa ayi British Columbia. Ici cakalinga kusansulula ayi twakalinga kweelete kwiiya bukaalo bupya amushobo upya. Lipenshi limwi ndyetwakalinga kwiindaamo ndyakwaamba ayi lyoonse tatwakalinga kubaawo amaali akwene kuula shiyandika. Cimwi ciindi, twakalinga kulyabo mapoteto ayo ngotwakalinga kuyangulula mumuunda mwiinewo mwaakatusuminisha. Ba Debbie bakalinga kwaateleka munshila shipusenepusene alimwi akalinga kubota abuumbi! Nabi kwaamba ayi twakalinga kwiinda mumapensho, twakalinga kucita nsheenga twacikonsha kwaamba ayi tuliyumye calusangalalo. Alimwi twakabona ayi Yehova wakalinga kutulama.—Kulu. 64:10.
Cakuteengashila, bushiku bumwi twakatambula fooni. Bwakalinga mbwiite bwakuya mukusebensela ku Bethel yaku Canada. Kabatana kutwiita ku Bethel twakalinga twalemba foomu yakucanika ku Cikolo ca Gilyadi. Nabi kwaamba ayi twakalinga kusangalete pa bwiite ubu, twakalinyumfwako cibiibi. Nacibo boobo, twakasumina kuya mukusebensela ku Bethel. Ndyetwakashika ku Bethel twakeepusha Mukwesu Kenneth Little wamu Komiti Yamusampi ayi, “Ino tulaakucita buyani na bakatwiite ku Cikolo ca Gilyadi?” Wakatulwita ayi, “Tulakushiba shakucita na bakamwiite.”
Ndyepakeenda nsondo yomwi, bakatwiita kuya mukucanika ku Cikolo ca Gilyadi. Aboobo twakalinga kweelete kusalawo shakucita. Mukwesu Little wakatulwiita ayi: “Cili coonse nceshi musalewo, kunembo mulakuyeeya ayi naakwiinga mwakasalawo cipuseneeko. Aboobo cili coonse nceenga mwasala, Yehova inga wamupa shoolwe.” Twakasalawo kuya ku Cikolo ca Gilyadi, alimwi pesule lya myaaka iinji twakabona ayi nshakatulwiita Mukwesu Little nshancine. Liinji twakalinga kulwiitako bamwi nshakatulwiita Mukwesu Little kulansha pa ncito njeenga basumina muncito yakwe Yehova.
KUSEBENSA MBULI BA MISHONALI
(Kucipiko) Ba Ulysses Glass
(Kululyo) Ba Jack Redford
Twakalinga kusangalete abuumbi kuba pa bamakwesu abenankashi bali 24 bakalinga mu Cikolo ca Gilyadi ca namba 83. Cikolo ici cakabeta ku Brooklyn mu New York, mu April 1987. Mukwesu Ulysses Glass a Mukwesu Jack Redford liinji mbobakalinga kutwiisha. Myeenshi ili 5 yakuba mucikolo yakeenda cakufwambaana lyalo twakamanisha cikolo ici pa 6 September, 1987. Bakatutuma kuya mukusebensela ku Haiti, pomwi aba John Goode aba Marie bakaabo.
Katuli ku Haiti mu 1988
Taakuwo bamishonali bakalinga batumwa ku Haiti, kuswa mu 1962 ndyebakabatandaamo bamishonali bakalingaamo mucishi ici. Ndyepakeenda nsondo shotatwe kuswa ciindi ndyetwakamanisha Cikolo ca Gilyadi, twakatalika kusebensela mucishi ca Haiti mulibungano mwakalingabo beshikushimikila bali 35 ilyo lyakalinga mutulundu. Twakalinga bacanike, twakalinga kweelete kwiiya shiinji alimwi twakalingabo sobilo amukaangu mbuli bamishonali. Bantu kumusena uyo bakalinga bapenshi abuumbi alimwi baanji tabakalinga kucishiiwo akubelenga. Ndyetwakalinga kukala kumusena uyo, bantu bakalinga kulwana ceebo ca shamapolitiki, kweelesha kubwesa bweendeleshi, kubusha shoongo, alimwi kwakalinga kuloka amfuula ya cipuupu.
Sombi twakeeya shiinji kuswa kubamakwesu abenankashi baku Haiti abo bakatolelela kuliyumya calusangalalo. Baanji bakalinga kwiinda mumapensho aanji, sombi bakalinga kusuni Yehova abuumbi anciito yakushimikila. Nankashi umwi wacinene taakalinga kucishiiwo kubelenga, sombi wakalinga kucikonsha kwiibaluka malembo ali 150 mumutwibo. Mapensho akalinga kumusena uyo akatupa kwiindaawo kusebensa cankusu kushimikilako bamwi ayi Bwaami bwakwe Lesa bweenkabo mbweshi bukakusheewo mapensho oonse. Tulayuminishikwa abuumbi na twayeeya pa bashikwiiya Baibo besu bamwi abo bakaya panembo akubombekwa lyalo akutalika kusebensa mbuli bapainiya baciindi coonse, bapainiya balibetele ambuli bamanene.
Ndyetwakalinga ku Haiti, ndakakumanya musankwa wacanike waliina lya Trevor uyo wakalinga mishonali mubupailishi bwaci Mormon, alimwi cimwi ciindi ndakalinga kumulwiitako makani amu Baibo. Ndyepakeenda myaaka iinji, ndakatambula nkalata isangalasha kuswa kuli nguwe. Wakalemba ayi: “Ndaakubombekwa pakubungana kwalubasu kutoosa! Ndisuni kwaamba ayi nkaboolele alimwi ku Haiti mukusebensa mbuli painiya ulibetele kumusena kweenka nkondakalinga kusebensa mbuli mishonali mu bupailishi bwaci Mormon.” Alimwi iyi njoncito njaakasebensa kwamyaaka iinji pomwi amukaakwe.
KUSEBENSELA KU EUROPE AMU AFRICA
Ndyetwakalinga kusebensela ku Slovenia mu 1994
Bakatutuma kuya mukusebensela kucishi cimwi cili ku Europe uko incito yakushimikila nkoyakalinga yatalika kuya panembo. Mu 1992 twakashika mutauni inene ya Ljubljana kucishi ca Slovenia, kufwiifwi akumusena bashali bangu nkobakakomenena kabatana kulongela ku Italy. Paciindi ici, mumisena imwi mwakalinga kunoocili nkoondo mucishi cakalinga kwiitwa ayi Yugoslavia. Ofesi ya musampi yakalinga mutauni ya Vienna ku Austria, yakalinga mutauni ya Zagreb ku Croatia, alimwi a yakalinga mutauni ya Belgrade ku Serbia, ngoakalinga kutanjilila ncito yakushimikila mucishi ca Slovenia. Nacibi boobo, cishi comwi acomwi cakalinga kweelete kuba a ofesi yamusampi yancico.
Aboobo twakalinga kweelete kwiiya mushobo upya akushibila bukaalo bupya. Bantu bakumusena nkotwakalinga kukala bakalinga kwaamba ayi “Jezik je težek,” kusansulula ayi mushobo wabo nguyumu kuwiiya. Alimwi ncakwiila wakalinga uyumu! Twakalinga kuyuminishikwa abuumbi kubona bamakwesu abenankashi mbobakalinga kulibambite kukonkela kwaaluka kuli koonse kweenga kwabaako mulibunga, alimwi twakabona Yehova mbwakabapa shoolwe. Paciindi ici alimwi twakabona Yehova mbwalulamika shintu munshila yalusuno alimwi paciindi ceelete. Twakeeya shiinji ndyetwakalinga ku Slovenia, alimwi shiinji nshotwakeeya katutana kuya ku Slovenia, shakatucafwa kuliyumya ndyetwakalongela kucishi ici.
Sombi shintu shakatolelela kwaaluka mubuumi bwesu. Mu 2000 bakatutuma kuya mukusebensela kucishi ca Côte d’Ivoire, cili kumbo lya Africa. Sombi ceebo ca nkoondo yakabaako mucishi ici, mu November 2002 bakatutuma kuya mukusebensela ku Sierra Leone. Paciindi ici, inkoondo iyo yakatola myaaka 11 ndyeyakamanabo mucishi ca Sierra Leone. Cakalinga ciyumu kuswaako ku Côte d’Ivoire mukwiinga twakekalakobo ciindi ciniini. Nacibi boobo, nshotwakeeya shakatucafwa kutolelela kuba alusangalalo.
Twakabikila maano kubantu bakalinga kusuni kwiiya cancine akubamakwesu abenankashi abo bakaliyumya ndyekwakalinga nkoondo kwamyaaka iinji. Tabakalinga kuciteewo shintu shiinji lwakumubili sombi bakalinga kwaabilako bamwi nshobakalinga kucite. Nankashi umwi wakapako ba Debbie shakufwala. Ba Debbie ndyebakawayawaya kushitambula, nankashi uyo wakabalwiita ayi: “Ndyekwakalinga nkoondo, bamakwesu abenankashi mushishi shimwi bakalinga kutucafwa. Aswebo ici nciindi cakumucafwa.” Twakaba bashinishite kukonkela cakubonenaako cabo.
Mukuya kwaciindi, twakaboolela alimwi ku Côte d’Ivoire, sombi shoongo shakalingaako ceebo ca shamapolitiki shakapa kwaamba ayi kube nkoondo alimwi. Aboobo mu November 2004, bakatunyamuna a polopela kwaamba ayi batutole kumusena kumwi. Twakanyamunabo shoola shobilo mwakalingabo shintu shiniini. Twakonabo panshi kumusumba wa bamasoja bushiku bulya, lyalo bushiku bwakakonkelawo bakatutola ku Switzerland. Twakashika mashiku kumusampi waku Switzerland. Sombi bamu Komiti Yamusampi abamakwesu bakalinga kwiisha mu cikolo ca Ministerial Training pomwi abamakaabo, bakatutambula kabotu, kutukumbata, kutupa shakulya shibotu acokoleti iinji. Nshobakacita shakatupa kulinyumfwa ayi balitusuni.
Kaŋamba likani kubantu bakacica kumishaabo mu Côte d’Ivoire, mu 2005
Bakatutuma kuya mukusebensela ku Ghana kwakaciindi, lyalo twakaboolela alimwi ku Côte d’Ivoire inkoondo ndyeyakabombaako. Twakacikonsha kuliyumya ndyetwakalinga kulonshekwa akupekwa ncito shipya ceebo ca lucafwo lwa bamakwesu abenankashi. Nebo aba Debbie twakaba bashinishite kunotondesha kulumba pa lusuno bamakwesu abenankashi ndobakalinga kututondesha. Mukuya kwaciindi, twakesa mukushiba ayi bukaalo mbotwakeendaamo bwakatucafwa kwiiya shiiyo shiyandika.
KUSEBENSELA KU MIDDLE EAST
Ndyetwakalinga ku Middle East mu 2007
Mu 2006 twakatambula nkalata kuswa kumaofesi esu anene ya kutushibisha ayi twapekwa ncito ipya yakuya mukusebensela ku Middle East. Nkokwaamba ayi alimwi twakalinga kweelete kwiiya bukaalo bupya amushobo upya. Twakalinga kweelete kwiiya shiinji ndyetwakalinga kumusena uku kwakalinga shoongo ceebo ca bupailishi ashamapolitiki. Twakalinga kusangalala kunyumfwa mishobo ipusenepusene mulibungano alimwi twakabona ayi inga twaba bacatene na katukonkela butanjilishi buswa kulibunga lyakwe Yehova. Twakayuminishikwa kubona bamakwesu abenankashi mbobakalinga kuliyumya cakutaloonda ndyebakalinga kupikishikwa kubeshikamukowa, kubeshicikolonyinaabo, kumbobakalinga kusebensaabo, akumbobakalinga kubambenaabo.
Mu 2012 twakacanika kukubungana kunene kulibetele uko kwakabeta ku Tel Aviv, mu Israel. Uku kwakalinga nkubungana kunene kwakutaanguna bantu bakwe Yehova nkobakabaako kwakacanika bantu baanji abuumbi kuswa pa Pentekositi yamu 33 C.E. Alimwi uku nkubungana nkweshi tukabule kuluba!
Paciindi ici, bakatutuma kuya mukufwakashila cishi cimwi mbasu shimwi sha ncito yesu moshakalinga shakashikwa. Twakatola amabuku esu amwi, kwaabanamo lubasu muncito yakushimikila, akucanika kukubungana kwalubasu uko kwakalinga kubabo bantu baniini. Bamasoja bakalinga kucite shilwanisho bakalinga kucanikabo pali poonse sombi twakalinyumfwa kushitilishikwa mukwiinga twakalinga kweenda cakucenjela abeshikushimikila baniini.
BAKATUTUMA KUYA MUKUSEBENSELA KU AFRICA ALIMWI
Kandibambila likani ku Congo mu 2014
Mu 2013 twakapekwa ncito ipuseneeko abuumbi. Bakatutuma kuya mukusebensela kumusampi waku Congo, cishi cinene alimwi cibotu abuumbi sombi mwakalinga nsala ankoondo abuumbi. Pakutaanguna twakaamba ayi, “Tulilibambite kuya ku Africa mukwiinga tulikushi kabotu.” Sombi twakalinga kuyandika kwiiya shiinji bunene bunene bwakweenda mumisena mwatakalingawo mabiliji nabi mashila mweenga mweenda myotoka. Nacibi boobo, twakabikila maano kushintu shiinji shibotu mbuli bamakwesu mbobakalinga kuliyumya akutolelela kuba alusangalalo nabi kwaamba ayi bakalinga kwiinda mumapensho, mbobakalinga kusebensa cankusu muncito yakushimikila ambobakalinga kweelesha cankusu kucanika kumabungano akukubungana kwalubasu. Twakabona ncito ya Bwaami mboyakalinga kuya panembo ceebo cakwaamba ayi Yehova wakalinga kutucafwa akutupa shoolwe. Mumyaaka njotwakasebensela ku Congo, twakeeya shiiyo shiyandika alimwi twakaba abeshicibusa abo balibo anga ngu mukwashi wesu.
Katuli muncito yakushimikila ku South Africa mu 2023
Kumamanino kwamwaaka wa 2017, bakatutuma kuya mukusebensela kumusampi waku South Africa. Ici cakalinga nciindi cakutaanguna kusebensela pa musampi uyu unene alimwi twakapekwa ncito nshotutana kusebensawo kale. Paciindi ici alimwi twakalinga kweelete kwiiya shiinji, sombi nshotwakeeya muncito shimwi shakatucafwa abuumbi. Tulibasuni abuumbi bamakwesu abenankashi abo bakaliyumya kwamyaaka iinji. Alimwi cilayuminisha abuumbi kubona bamumukwashi wapa musampi mbobasebensela pomwi mulucatano nabi kwaamba ayi balicite shikanda shipusenepusene ankulilo shipusenepusene. Ncuubu kubona ayi Yehova atoocafwa bantu bakwe kukala muluumuno ndyebatokweelesha kufwala buntu bupya akukonkela njiisho shamu Baibo.
Kwamyaaka iinji, nebo aba Debbie twakapekwa ncito shipusenepusene shisangalasha, kushibila bukaalo bupya akwiiya mishobo imwi. Cimwi ciindi twakalinga kwiinda mubukaalo buyumu sombi tulalinyumfwa ayi Yehova alasebensesha libunga lyakwe abamakwesu abenankashi kututondesha lusuno lutamaani. (Kulu. 144:2) Tulishomete cakutatonsha ayi incito ya ciindi coonse yatucafwa kuba basebenshi bakwe Yehova bali kabotu.
Ndalumba abuumbi pashintu bashali bangu shobakanjiisha, lucafwo lwaba Debbie mukaangu ngoonsuni abuumbi, alimwi acakubonenaako cibotu abuumbi ca bamakwesu abenankashi nsengwe yoonse. Ndyetutoyeeya pa buumi bwesu bwakunembo, tulishinishite kutolelela kwiishikwa a Yehova Mufundishi wesu Wiinditewo.