Ino Nceebonshi Bantu Tabekali Muluumuno?​—⁠Ino Nshiinshi Baibo Nshoyaamba?

Beendeleshi alimwi atubunga nsengwe yoonse baalilwa kuleta luumuno pacishi. Munshiku shino, kuli shankondo abuumbi alimwi bantu batocayana kwiinda ambocakalinga kuswabo ciindi ndyekwakalinga Nkondo Yapacishi Coonse Yabili. Bantu bashika pafwiifwi a 2 biliyoni balekala mumisena yakakumwa ku nkondo shitoocitika.

Ino nceebonshi bantu balaalilwa kuleta luumuno pacishi? Ino nshiinshi Baibo nshoyaamba?

Sheebo shotatwe shipa kwaamba ayi bantu baalilwe kuleta luumuno pacishi

1. 1. Bantu balatondesha mibo ipa kwaamba ayi batanookala muluumuno abamwi. Baibo yakaambila limwi ayi munshiku shino nshetutokalaamo, ‘bantu balaakuba beshikulisuna, basunishi maali, beshikulilumbaisha, beshikulisumpula, . . . batashomeki, . . . batasuni shipangano, . . . batalitibuki, bakali, . . . batalwiitikwi, baswitebo kulisumpula.’​—2 Timoti 3:2-4.

2. 2. Bantu palwaabo tabacitewo nkusu shakumana mapensho ngobatokwiindaamo kwakubula lucafwo lwakwe Yehovaa Lesa, Mulengi wabo. Baibo ilaamba ayi “muntu taacite nkusu shakweendelesha buumi bwakwe.”​—Jelemiya 10:23.

3. 3. Cishi citokweendeleshekwa amweendeleshi mubiibi alimwi ucite nkusu, Satana Diabolosi, “uyo ucenjeeka bantu boonse mucishi ca panshi.” (Ciyubululo 12:9) Kulilabo na ‘cishi coonse cinokweendeleshekwa a Mubiibi,’ bantu pacishi balaakutolelela kulwana akutanyumfwana.​—1 Joni 5:19.

Ino ngani weenga waleta luumuno pacishi?

Baibo ilatushomesha ayi bantu teshi bakaletewo luumuno pacishi, sombi Lesa alaakucikonsha kucita boobo.

• ‘‘Mukwiinga nemwiine ndishi kale miyeeyo njeencite pali ndimwe,’ mbwaamba Yehova, ‘ndicite miyeeyo yakumuletela luumuno kuteshi mapensho sobwe, kumupa kulangila buumi bubotu kunembo.’’​—Jelemiya 29:11.

Ino Lesa alaakucikumanisha buyani cishomesho ici? “Lesa upa luumuno, ulaakunyonyoola . . . Satana.” (Bene Loma 16:20) Lesa alaakusebensesha mfulumeende yakwiculu, iyo Baibo njoyaamba ayi “Bwaami Bwakwe Lesa,” kuleta luumuno pacishi coonse. (Luka 4:43) Yesu Klistu Mwaami wa Bwaami ubu ndyeshi akanokweendelesha, bantu balaakwishikwa mbweenga kabekala muluumuno.​—Isaya 9:6, 7.

• Kwaamba ayi mwiiye shiinji, amubelenge mutwi waamba ayi “Ino Nshiinshi Bwaami Bwakwe Lesa Nsheshi Bukacite?”