Bantu Tabatoshoma Bunene Beshimapolitiki—Ino Nshiinshi Baibo Nshoyaamba?

Mumwaaka wa 2024, mushishi shipusenepusene bantu balakunovoota kusala beendeleshi. Nacibi boobo, bantu baanji tabatoshoma bunene beshimapolitiki.

• Bantu baanji baku America abo bakeepushikwa bakaamba ayi “beshimapolitiki baanji balasuna kweendelesha bamwi kwaamba ayi balo bekale kabotu,” muciindi cakusuna kucafwa bantu mbobendelesha.a—Pew Research Center, September 19, 2023.

Bacanike baanji abalo tabashomi beshimapolitiki.

• “Munshiku shino, liinji bacikula bwangu balabikila maano ku nshila sha mbweenga bamana mapensho atokuma bantu abuumbi. Sombi balaamba ayi beshimapolitiki batokwaalilwa kucana nshila isho.”​—The New York Times, January 29, 2024.

• “Bacanike baanji abo bakeepushikwa bakaamba ayi balashoma baabo babika mavidiyo pa intaneti alimwi bacite beshicibusa baanji, kwiinda mbobashoma beshimapolitiki.”​—The Korea Times, January 22, 2024.

Sa inga twashooma ayi beshimapolitiki balaakukushawo mapensho ngotutokwiindaamo? Ino mbaani mbweenga twashooma?

Amucenjele abantu mbomushoma

Ncibotu kutashomabo muntu uliwoonse. Baibo ilaamba ayi “muluya ulashoma shoonse nsheenga wanyumfwa, sombi muntu ucenjete ulataanguna kuyeeya ncaaelete kucita.”​—Tushimpi 14:15.

• Kwaamba ayi mushibe sheenga shamucafwa kushiba na makani ngancine nabi sobwe, amubelenge mutwi wamu Chitonga waamba ayi “Amulikwabilile Kumakani Aakubeja.”

Kwiilikaawo, nabibo beshimapolitiki bashomeka alimwi basunishishi kucafwa bantu, tabacitewo nkusu shakucita shoonse nsheenga kabasuni. Nceceeco Baibo ilatucenjesha ayi:

• “Mutaciinki manungo mubamaami, mbantubo tabakoonshi kumufuna.”​—Kulumbaisha 146:3.

Mweendeleshi ngweenga mwashooma

Baibo ilaamba ayi Lesa wakasala mweendeleshi ucite nkusu shakucita cili coonse alimwi ngweenga twashooma: Yesu Klistu. (Luka 1:32, 33) Yesu ngu Mwaami wa Bwaami bwakwe Lesa, mfulumeende itokweendelesha kwiculu.​—Mateyo 6:10.

• Amushibe nceenga mwashomena Yesu ansheshi akacite kwaamba ayi amane mapensho ngotutokwiindaamo. Amubelenge mutwi wamu Chitonga waamba ayi “Ino Nguni Mwami wa Bwami bwa Leza?” awaamba ayi “Ino Bwami bwa Leza Buyoocita Nzi?”