Mbweenga Baibo Yamucafwa Kukoma Lipenshi Lya Kuumuninwa Kwiinda Mukuba Abeshicibusa

Mu 2023, bantu bakeeya shiinji pa buumi bwabantu bakaamba ayi kuumuninwa ndipenshi linene ndyebatoyandika kucitaawo comwi. Sa kuli ceenga catucafwa kutanoolinyumfwa kuumuninwa?

• Ba Dr. Vivek Murthy banene balanga pa shamaopaleshoni baku United States bakaamba ayi: “Na katulinyumfwa kuumuninwa akulitalamusha kubamwi, inga twaliletela lipenshi linene kubuumi bwesu akutaba alusangalalo.” Sombi bakeelikaawo akwaamba ayi: “Kuli shimwi sheenga twaciita palipenshi ili.” Ino nshiinshi nsheenga twaciita? “Bushiku abushiku inga katucita tuntu tuniini niini kwaamba ayi tuyumye bushicibusa mbotucite abamwi.”a

Kulitalamusha kubamwi teshibo nkweenga kwapa kwaamba ayi tunoolinyumfwa kuumuninwa. Bamwi balalinyumfwa kuumuninwa nabi ndyebali pa bantu baanji. Baibo inga yatucafwa, tacicite mulandu asheenga shapa kwaamba ayi tunoolinyumfwa kuumuninwa. Muli makani eenga atucafwa kuyumya bushicibusa bwesu abamwi kwaamba ayi tutanoolinyumfwa kuumuninwa bunene.

Njiisho shamu Baibo sheenga shatucafwa

Amushibe bwakubandika kabotu. Ici cileelikaawo kutanoolwitabo bamwi mbomutolinyumfwa sombi akukutika cakubikila maano bamwi ndyebatokwaamba. Na kamutondesha ayi mulabikila maano abuumbi kubamwi, bucibusa mbomucite ambabo bulaakuyuminaako.

• Njiisho yamu Baibo: ‘Munoobikila maano kushintu shicafwa bamwi kuteshibo kusheesho shicafwa ndimwe nweenka.’—Bene Filipi 2:4.

Amube bushicibusa abantu bapusenepusene. Amube balibambite kuba bushicibusa abantu bashiimo shipusenepusene, bakakulila kumusena kumwi na bakaswa kucishi cimwi.

• Njiisho yamu Baibo: ‘Amukomenye lusuno lwanu amwebo.’—2 Bene Kolinto 6:13.

Kwaamba ayi mushibileewo ashimwi mbweenga mwaba abushicibusa buyumu abamwi, amubelenge mutwi wamu Cisungu waamba ayi “Nsheenga Twaciita Kwaamba ayi Tube Abeshicibusa.”