Sa Kuli Mfulumeende Njeenga Twashooma Yeenga Yeendelesha Kabotu Cishi?—Ino Nshiinshi Baibo Nshoyaamba?

Nsengwe yoonse, mfulumeende shiinji shitokwaalilwa kweendelesha kabotu ceebo ca shintu shitoocitika. Nabi mushishi muboneka ayi shintu shiliko kabotu, mfulumeende shakumwa abuumbi ceebo ca malipooti atabete kabotu pa beshimapolitiki, kutashiba kabotu bawiina na kwaba shakuvoota, bantu kubusha shoongo alimwi akupikishanya abuumbi pa shamapolitiki.

Baibo ilaamba ayi kuli mfulumeende yomwi njeenga twashooma. Mpashi mwakanyumfwawo kale pa mfulumeende iyo. Ni mfulumeende Yesu njakaambaawo mu Mupailo wa Mwaami.

• ‘Anu mbulya mbomweelete kupaila: ‘NoBeeshiwesu nomuli kwiculu, liina lyanu alisalashikwe. Abwise Bwaami bwanu. Kuyanda kwanu akucitwe panshi pano bweenka mbuli kwiculu.’’​—Mateyo 6:9, 10.

Ino nshiinshi Baibo nshoyaamba pa Bwaami ubu?

Bwaami—⁠ni mfulumeende njeenga twashooma

Bwaami ubu buleendelesha kuswa kwiculu.

• Yesu wakaamba pa mfulumeende iyi ayi ‘Bwaami bwa kwiculu.’ (Mateyo 4:17; 5:3, 10, 19, 20) Ncoceeco ncakaambila ayi: ‘Bwaami bwangu tabwishi bwa mucishi ca panshi pano.’​—Joni 18:36.

Bwaami bulaakukushawo mfulumeende sha bantu shoonse.

• Baibo ilaamba ayi: “Bwaami ubu. . . bulaakupwayoola akumanisha maleelo [abantu] oonse, akulela kwamuyayaya.”​—Danyelo 2:44.

Bwaami ubu bweendeleshekwa a Yesu Klistu, teshi bukanyonyoolweewo.

• Baibo ilaamba ayi: “Bulelo bwakwe teshi bukamaneewo alimwi bwaami bwakwe teshi bukanyonyoolweewo.”​—Danyelo 7:13, 14.

Bwaami ubu bulaakupa kwaamba ayi bantu pacishi bakanookala muluumuno alimwi cakuliiba.

• Baibo ilaamba ayi: “Muntu womwi awomwi alaakunookala muluumuno pakati ka minyansa yakwe ashisamu shakwe sha nkuyu. Ncakwiila taaku eshi akamuloondeshe.”​—Mika 4:4.

Amwiiye shiinji pa Bwaami

Yesu ndyaakalinga pacishi, cintu ncaakalinga kubikilako bunene maano “nkushimikila makani abotu a Bwaami bwakwe Lesa.’ (Mateyo 9:35) Alimwi wakaambila limwi ayi:

• ‘Makani abotu aya aamba sha Bwaami bwa kwiculu, alaakushimikilwa mucishi coonse kwaamba ayi akabe mbobukamboni kubantu boonse, lyalo mamanino alaakushika.’​—Mateyo 24:14.

Munshiku shino, makani abotu aamba pa Bwaami atoshimikilwa mushishi shiindilila 240. Tutomusenga ayi mwiiye shiinji pamfulumeende iyi ambweenga yamucafwa.

Twamusenga ayi mweebele vidyo itokwaamba ayi Ino Bwaami Bwakwe Lesa Nciinshi?