Ino Inga Ndacita Buyani na Bantu Batomfuya?

Ncotunyumfwila cibiibi

Kufuya kumwi nkubiibi mukwiinga mulaba makani akubeca kwaamba ayi muntu abishe mpuwo yanu. Ano nabi kwaamba ayi kufuya kumwi kulaba kuniini, kulacisisha moyo na twashiiba ayi wakalinga kutufuya ngumuntu ngotunyumfwanaakwe!​—⁠Kulumbaisha 55:12-14.

“Ndakanyumfwa ayi mubyaanji wakalinga kumfuya, akunokwaamba ayi nshibikili maano kubantu bamwi. Ici cakancisa kumoyo abuumbi! Nshikwe kushiba cakapa kwaamba ayi aambe shamushobo uyu.”​—Ashley.

Makani ancine: Tulalinyumfwa cibiibi na twanyumfwa ayi umwi wakalinga kwaamba shibiibi pali ndiswe, inga caba ayi ngumubyesu nabi sobwe.

Cibica ncakwaamba ayi inga tookashi bantu kukufuya

Kuli shintu shiinji shipa kwaamba ayi bantu banofuya babyaabo. Shimwi nsheeshi shitokonkelaawo:

Kubikila maano kubamwi. Soonse tulasuna kushiba shitocitika kubabyeesu. Aboobo ici ncocipa kwaamba ayi tunosuna kubandikaabo akunokwaamba pali mbabo. Alimwi ncakwiila Baibo ilatuyumisha kunoobikila maano kushintu bamwi nshobasuni.—Bene Filipi 2:4.

“Pashintu shoonse nsheenga twaambawo, tulasuna bunene kwaamba pa bantu!”​—Bianca.

“Kwaambabo lushinisho, ndanyumfwa kabotu kushiba shitocitikila bamwi akunoshibandikawo ababyaanji. Nshicishiwo cilengesha—ndanyumfwabo kabotu kucita boobo.”​—Katie.

Kulendelelwa. Muciindi camu Baibo, kwakalinga bantu bakalinga “kusunibo kwaamba akukutika kumakani apya,” na tabacite shakucita. (Milimo 17:21) Ishi nshoshicitika amunshiku shino!

“Na taakuwo shacitika pabushiku ubo, bantu balapanga makani kwaamba ayi babe ashakubandikaawo.”​—Joanna

Kulibona anga taakuwo mbotubete. Baibo ilatulwiita ayi tatweelete kunoolyelanya kubamwi. (Bene Galatiya 6:4) Cibicaako ncakwaamba ayi, bamwi na bashiba ayi kuli bamwi babendaawo, balatalika kwaamba shibiibi pali mbabo.

“Mufuishi alapa kwaamba ayi bamwi bashibe mbwaabete. Cilabonekelabo patuba ayi alanyumfwila munyono muntu ngwatokwaambawo. Alaamba makani ateshi ancine palinguwe kwaamba ayi atanoboneka anga taakuwo mbwabete alimwi cinoboneka anga lakwe aleendawo muntu uyo ngwatofuya.”—Phil.

Makani ancine: Olo ulisuni nabi toosuni, bantu balaamba pabantu bamwi alimwi inga baamba apalindiwe.

Makani abotu ngakwaamba ayi, kukufuya takweelete kukupa kunolinyumfwa cibiibi abuumbi

Ncakwiila kwaamba ayi inga tookashi bantu kwaamba palindiwe, sombi inga wasalawo nsheenga waciita. Na washiba ayi kuli makani akubeca muntu umwi ngaakaamba palindiwe alimwi atooya cipuka, kuli shintu shobilo nsheenga waciita.

CAKUTAANGUNA NCEENGA WACIITA: Nkulubakobo. Liinji cilaba kabotu kulubakobo, bunene bunene na makani ngobakaamba teshi abiibi abuumbi. Konkela Baibo nshoyaamba ayi: “Utafwambaani kukalala mumoyo wako.”​—⁠Shikushimikila 7:9.

“Kwakapuka makani akwaamba ayi ndeenda amusankwa umwi—muntu ngondatakalinga kucishiiwo alimwi ngontana kubonawo kale! Ndakashiba ayi makani aya ngakubeca aboobo ndakasekabo akulubaako.”—Elise.

“Na katucite mibo ibotu bantu teshi bakanotufuya bunene. Nabi bantu baamba shibiibi palindiwe, na ulicite mibo ibotu mbaniini beshi bakashome ayi makani ayo ngancine. Baanji balashiba ayi bakakubekeshabo.”—Allison.

Sheenga shakucafwa: Lemba (1) bantu nshobakaamba palindiwe alimwi (2) mbowakalinyumfwa. Na “walyamboosha mumoyo wako,” inga cakubeta cuubu kulubaako.​—⁠Kulumbaisha 4:4.

CABILI NCEENGA WACIITA: Bandika amuntu wakalinga kukufuya. Cimwi ciindi, inga walinyumfwa ayi makani umwi ngakaamba palindiwe ngabiibi abuumbi cakwaamba ayi wayandika kuya mukubandika amuntu uyo.

“Na wabandika abantu beshikukufuya, inga bashiba ayi nshobaamba shilashika kumuntu ngobeshikwaambawo. Alimwi inga wapa kwaamba ayi makani ancine ashibikwe, lyalo mpashi alipenshi inga lyamana.”—Elise.

Kootana kuya mukubandika amuntu wakalinga kukufuya, taanguna kuyeeya pa Malembo aya lyalo akuliipusha miipusho itokonkelaawo.

• “Uyo ukumbula kaatana kunyumfwisha makani, ngumuluya.” (Tushimpi 18:13) ‘Sa ndicite bumboni bukwene kabotu? Sa muntu wakandwiita ayi kuli bakalinga kumfuya taakwe kunyumfwishishabo?’

• “Mulyeelete kuba bantu bafwambaana kukutika, bacelwa kwaamba alimwi akukalala.” (Jemusi 1:19) ‘Sa ici inga caba ciindi cili kabotu kuya mukubandika awakalinga kumfuya? Sa ndishinishite ayi nshoontocita pamakani aya shilibo kabotu? Nabi sa ndyeelete kulindilaako kwaamba ayi mboshemo moyo?’

• “Amucitile bantu bamwi bweenka mbomusuni ayi bamucitile.” (Mateyo 7:12) ‘Ino na ndime ndakalinga kufuya muntu uyo, inga ndasuna kubandikishanya buyani anguwe? Ino nkuli nkweenga ndasuna kubandikila amuntu uyo kwaamba ayi tumane lipenshi? Ino ngamaswi nshi ngeenga ndasuna kunyumfwa alimwi alyeelete kwaamba munshila ya buyani?’

Sheenga shakucafwa: Kootana kubandika amuntu wakalinga kukufuya, lemba nshosuni kuya mukwaamba. Lyalo lindilaako kwansondo yomwi na shobilo, akunokwiindulukaamo munshowakalemba lyalo akubona na kuli nsheenga walulaako. Kwiilikaawo, lwiita bashali bako na mubyo ushimpite lwakumushimu pa nshosuni kuya mukwaamba akusenga lucafwo.

Makani ancine: Bweenka mbuli shintu shimwi shipusenepusene shicitika mubumi, inga tocikoonshi kukasha bantu kukufuya. Sombi ici tacaambi ayi ulyeelete kunokwendabo kolisukeme!