Ino Bakamboni Bakwe Yehova Bali Bongaye Nsengwe Yoonse?

Ino mulacita buyani kwaamba ayi mushibe namba ya Bakamboni Bakwe Yehova?

Bantu mbotubelenga ayi Mbakamboni bakwe Yehova mbaabo baabanamo lubasu mweenshi a mweenshi muncito yakushimikila makani abotu a Bwaami Bwakwe Lesa. (Mateyo 24:14) Ici cileelikaawo bantu bakabombekwa mbuli Bakamboni abaabo batana kubombekwa sombi bakasuminishikwa kunokwaabanamo lubasu muncito yakushimikila.

Sa muntu alyeelete kupa maali kwaamba ayi abelengwe ayi ngu Kamboni?

Sobwe. Muntu taabelengwi ayi ngu Kamboni nabi kupekwa mukuli na shoolwe mulibunga lyesu ceebo ca maali ngeenga wapa. (Milimo 8:​18-​20) Alimwi liinji maali apekwa mukuliyandila alapekwa kwakubula kushiba wapa. Kamboni uli woonse alaaba ciindi, nkusu alimwi ashintu shakwe kuncito yesu yansengwe yoonse kweelana abukaalo alimwi ambwaasuni mwiine.—2 Bene Kolinto 9:7.

Ino mulashiba buyani cibelengelo cabaabo bashimikila lyoonse?

Mweenshi a mweenshi, Bakamboni balapa lipooti kulibungano ndyebabeteemo litondesha mbobakasebensa muncito yakushimikila. Balalemba lipooti ilyo mukuliyandila.

Malipooti alibungano alasenkanishikwa pomwi, lyalo shibelengelo shoonse shilatumwa ku ofesi yamusampi yamucishi ico. Lyalo misampi ilatuma shibelengelo shoonse sha malipooti acishi comwi acomwi na musena womwi awomwi ku maofesi esu anene.

Kumamanino amwaaka wa ncito uli woonse,a tulashiba namba ya Bakamboni bali mu cishi comwi acomwi mumwaaka uyo. Lyalo shibelengelo isho shilasenkanishikwa pomwi kwaamba ayi tushibe namba ya Bakamboni nsengwe yoonse. Makani aanji aamba pa malipooti acishi comwi acomwi alabikwa palubasu lulembetwe ayi “Nsengwe Yoonse” pa webusaiti yesu. Malipooti aya alatuyuminisha, bweenka mbuli malipooti amushobo uyu mbwaakalinga kuyuminisha Beneklistu bakutaanguna.​—Milimo 2:​41; 4:4; 15:3.

Sa mulabelengelaako abaabo mbomubunganaabo sombi batashimikili?

Nabi kwaamba ayi tatubabelengeliiko pa namba ya Bakamboni, tulabatambula mumabungano esu. Baanji balacanikaako ku Ciibalusho ca lufu lwakwe Yesu cibaako mwaaka amwaaka. Aboobo namba yabo ilashibikwa kwiinda mukushiba bupusano buli pa namba ya baabo bacanikaako kukubungana uku anamba ya Bakamboni. Mu 2024, bantu bakacanikaako ku Ciibalusho bakalinga 21,119,442.

Baanji batacanikiiko kumabungano esu balafubilaamo mububaambo bwakwiiya Baibo paŋanda kwakubula kulipila. Mu 2024, avaleji ya shiiyo sha Baibo nshotwakatanjilila mweenshi amweenshi yakalinga 7,480,146, shimwi shakatanjililwa a Bakamboni baanji paciindi comwi.

Ino nceebonshi namba ya Bakamboni ilembwa amfulumeende ilaba inene kwiinda njomulemba?

Liinji bamfulumeende balashiba shibelengelo kwiinda mukwiipusha bantu nkobapaila. Kucakubonenaako, bamu U.S Census Bureau bakaamba ayi ndyebakalinga kulangoola makani “bakalinga kusuni kushiba nkobapaila abo mbobakalinga kwiipusha,” alimwi bakaamba ayi shibelengelo nshobakacana teshi shibelengelo shiine mukwiinga shakalinga kwiilikaawo abantu bayeeyabo ayi nkobapaila. Ono mubupusano, swebo mbotubelengabo ayi Mbakamboni mbaabo bashimikilako bamwi akulemba lipooti lya ncito yabo, kuteshi baabo baambabo pamulomo ayi Mbakamboni.