Ino Nceebonshi Bakamboni Bakwe Yehova Balaalula Shimwi Nshobashoma?

Kuswabo kale kale, shoonse nshotushoma shilaswa mu Baibo. Aboobo tulaalula shimwi nshotushoma na twanyumfwishisha kabotu Malembo.a

Kwaalula nshotushoma kuleendelana anjiisho njotucana pa Tushimpi 4:18 paamba ayi: “Nshila ya baluleme ili anga ngumumuni wakumuyamaca uyo uya ciindaawo kutuba kushikila lisuba lyaswa.” Bweenka mbuli lisuba mboliswa paniini paniini kushikila twatalika kubona kabotu shintu, alakwe Lesa alatucafwa kunyumfwishisha cancine camu Baibo paniini paniini, paciindi mwiine ncaasuni. (1 Pita 1:10-12) Kweelana a Baibo mboyakaambila limwi, atootucafwa kunyumfwishisha kabotu cancine camu Baibo bunene bunene ‘muciindi camamanino’ ncetutokalaamo.​—Danyelo 12:4.

Kwaalula shimwi nshotushoma takweelete kutukankamika na kutupa kupilinganishikwa. Basebenshi bakwe Lesa bakale kale abalo tabakwe kunyumfwishisha shintu shimwi alimwi nshobakalinga kulangila tashikwe kucitika, aboobo bakalinga kweelete kwaalula mbobakalinga kubona shintu.

• Mose wakalinga kusuni kufuna bene Isilaeli kakucaalite myaaka 40 kwaamba ayi apekwe ncito iyi kuswa kuli Lesa.​—Milimo 7:23-25, 30, 35.

• Batumwi bakaalilwa kunyumfwishisha bushinshimi bwakalinga kwaamba pa lufu lwakwe Mesiya apa kubushikwa kwakwe.​—Isaya 53:8-12; Mateyo 16:21-23.

• Beneklistu bamwi bamuciindi ca batumwi tabakalinga kucishi cancine pamakani aciindi ‘bushiku bwakwe Yehova’ ndyebwakalinga kweelete kusa.​—2 Bene Tesalonika 2:1, 2.

Mukuya kwaciindi, Lesa wakabacafwa kushiba cancine, alimwi tutopaila ayi atolelele kucita bweenka ubo akulindiswe.​—Jemusi 1:5.