Ino Nshiinshi Baibo Nshoyaamba Pamakani Akukusha Lifumo?

Cikumbulo camu Baibo

Baibo na yasebensesha maswi akwaamba ayi “kukusha lifumo,” tayaambi mukululama shintu bantu nshobacita pa kukusha lifumo. Nacibi boobo, mavesi aanji amu Baibo alatondesha Lesa mbwaabona buumi bwa muntu, kwiilikaawo abuumi bwa mwaana utana kushalwa.

Buumi ncipo kuswa kuli Lesa. (Matalikilo 9:6; Kulumbaisha 36:9) Alabona ayi buumi bulayandika abuumbi, kwiilikaawo abuumi bwa mwaana utana kushalwa. Aboobo na muntu wakusha lifumo cakashanga, nkokwaamba ayi wacaya muntu.

Mulawo Lesa ngwaakapa bene Isilaeli wakalinga kwaamba ayi: ‘Na bantu bamwi batoolwana, ono bacisa mwanakashi uli pakati akulengesha ayi apulukemo ciindi cakwe kacitana kushika cakupulukilaamo, sombi wabula kucisikwawo munshila imwi, uyo wamucisa ulyeelete kulipila maali ngeenga ibaye wapingula. Maali ayo alyeelete kusuminishikwa aboomboloshi. Sombi na mwanakashi uyo wacisikwa bunene, cilyeelete kuba buumi pabuumi.’—Kulonga 21:22, 23.a

• Ino ndilili buumi bwa muntu ndyebutalika?

• Sa Lesa inga walekelela muntu wakakusha lifumo?

• Sa ncibiibi kukusha lifumo na buumi bwa mwanakashi nabi bwa mwaana buli mumapensho?

Ino ndilili buumi bwa muntu ndyebutalika?

Lesa alabona ayi na mwanakashi wamita, nkokwaamba ayi buumi bwa mwaana bwatalika. Baibo na yaamba pa mwaana utana kushalwa ilaamba ayi ngu muntu. Amubone shakubonenaako shimwi shamu Baibo shitondesha ayi Lesa alabona ayi taapu bupusano pa mwaana utana kushalwa amwaana wakashalwa.

• Kwiinda mukutanjililwa amushimu usalashi, mwaami Defedi wakaamba pali Lesa ayi: “Mwakambona kaantana kushalwa.” (Kulumbaisha 139:16) Lesa wakalinga kubona Defedi ayi ngu muntu nabi kaatana kushalwa.

• Kwiilikaawo, Lesa wakalinga kucite luyaando lulibetele pa mushinshimi Jelemiya nabi kaatana kushalwa. Lesa wakamulwiita ayi: ‘Kaantana kukubumba mulifumo lya banyoko, ndakalinga kukwishi kale. Ncakwiila ndakakubika palubasu kootana kushalwa. Ndakakusala ayi ube mushinshimi kumishobo iinji.’—Jelemiya 1:5.

• Luka mulembi wa Baibo alimwi mushiliki, wakasebensesha liswi lyomwi lyamu ciGiliki kwaamba pa mwaana utana kushalwa amwaana waswabo mukushalwa.—Luka 1:41; 2:12, 16.

Sa Lesa inga walekelela muntu wakakusha lifumo?

Lesa inga walekelela muntu wakakusha lifumo. Na muntu uyo watalika kubona buumi kweelana a Lesa mbwaabubona, taeelete kunoolipa mulandu. ‘Yehova ngushinkumbu alimwi ngushiluse . . . Bweenka mbuli kumbo akwicwe mbokutalamukene, mbweeke ubo shibiibi shesu mbwaashitalamusha kuswa kuli ndiswe.’b (Kulumbaisha 103:8-12) Yehova alaakulekelela baabo boonse baana kuswa kushibiibi nshobakacita kale kale, kwiilikaawo akukusha lifumo.—Kulumbaisha 86:5.

Sa ncibiibi kukusha lifumo na buumi bwa mwanakashi nabi bwa mwaana buli mumapensho?

Nabi kwaamba ayi banyina na mwaana inga bafwa pa kupulukaamo, kukusha lifumo nkubiibi kweelana a Baibo nshoyaamba pa buumi bwa mwaana utana kushalwa.

Ano ino nciinshi nceenga mwaciita paciindi ca kupulukaamo na badokota bamulwiita ayi musalewo kupulusha buumi bwa mwaana na bwa banyina? Mubukaalo ubu, abo bali lubasu lwamukwashi uyo inga basalawo ngobeelete kupulusha.