Kulishitilisha Ndyetuli ku Ŋanda ya Bwaami Paciindi ca Bulwashi bwa COVID-19

“Bamu Likoto Litanjilila bakasala kuyuminisha mabungano kutalika kubungana pomwi alimwi mu nsondo ya 1 April kulilabo na milawo ya mfulumende taitokasha kumusena uko.” Cakoolobesha ici ndyecakabikwa pa jw.org kumatalikilo a mweenshi wa March 2022, Bakamboni Bakwe Yehova nsengwe yoonse bakasangalala abuumbi. Sombi bulwashi bwa COVID-19 tabuna kumana.a Ino nshiinshi shakaalulwa, shakoolwa, alimwi ashakalinga kuyandika kwaamba ayi abo besa kumabungano bashitilishikwe kubulwashi ubu? Sa Maanda Abwaami akalinga kabotu cakwaamba ayi bantu inga babunganinaamo pesule lya kutabunganinaamo kwa myaaka yobilo?

Kwa myeenshi iinji bamakwesu balinga kulibambila kwaamba ayi kube kutalika kubunganina mu Maanda Abwaami.

Kwakalinga Kuyandika Shintu Shipusenepusene

Ndipakeendabo mweenshi womwi kuswabo ciindi ndyekwakaba kucileka kubungana pomwi mu 2020, bamu Dipatimenti ya Worldwide Design/Construction (WDC), ku Warwick, New York, bakatalika kubona bulwashi bwa COVID-19 mbweenga bwakuma nshetucita ndyetuli pa Ŋanda ya Bwaami alimwi ashakalinga kuyandika kwaamba ayi tulishitilishe ndyetuli kumabungano.

Shakalinga kuyandika kumusena womwi awomwi shakalinga kupusene. Ba Matthew De Sanctis basebensa mu WDC bakaamba ayi: “Mushishi shimwi tabaciteewo shakusebensesha kusamba ku maansa. Na Maanda Abwaami taacitewo kwakuteka maanshi, kulayandika kuula maanshi na kuya mukuteka ku mulonga na mukalo uli pafwiifwi. Mushishi shimwi mfulumende shakaalula makani ashiyandika mbuli ma fani eshi kupa kwaamba kube muuwo ubotu, mawindo alimwi ashitondesho sheelete kubikwa shakutondesha bantu mbobeelete kulilama akulishitilisha mubuumi.”

Ino nshiinshi bamakwesu nshebakacita kwaamba bacafwilishe ceebo ca mapensho aya? Ba Matthew bakaamba ayi, “mu Maanda Abwaami aanji kwakalinga kuyandikabo shintu shitadulite sheenga shacafwa.” Kucakubonenaako, ku Papua New Guinea kwakabambwa ma baketi ama 20 lita acite tuma taapu kwaamba ayi banoosebensesha kusamba ku maansa. Aboobo bamakwesu bakacikonsha kubika shakalinga kuyandika mu Maanda Abwaami amumishi kwiinda mukusebenseshabo maali amadola aku America ashika ku 40. Mu Maanda Abwaami amu Africa kwakoolwa shakusambilamo kumaansa shibotu alimwi shiyumu abuumbi shiindilila 6,000 kuswa ku Asia.

Shintu shimwi mbuli ma fani alimwi mawindo shipa kwaamba ayi mu Ŋanda ya Bwaami kamwiinda muuwo ubotu uunji shakabikwa. Mabungano aanji bakoola shakucatilako mamaikilofoni shilaamfu kwaamba ayi batookumbula batanoopekwa maiki mumaansa. Alimwi kwakaba kuceeshako mwakucata cata alimwi akunonanika musamu ucaya tulongolo mumbasu shicatwa bunene mbuli shakucatilako cisasa alimwi atwakucalwiitako ma taapu ashimwi sheenga shapa kwaamba ayi muntu acatwe bulwashi. Mumabungano amwi muma toileti bakabika mataapu eshi kucaluka eenka na muntu wateyakobo maansa. Ku cishi ca Chile kubika shintu shakalinga kuyandika mu Ŋanda ya Bwaami yomwi kwakatola maali aku America ashika ku 1,400.

Nakubi kwaamba ayi cakalinga cintu ciyandika abuumbi kubikila maano bwakulishitilisha mu Maanda Abwaami, bamakwesu bakatolelela kusebensesha kabotu maali apekwa mukuliyandila. Kucakubonenaako, mushishi shimwi bakasenga lucafwo ku mfulumende ayi ilipile misonko ndyebakalinga kuula shakusebensesha kusamba ku maansa alimwi ashakucatilako mamaikilofoni. Bamu misampi bakasebensela pomwi kwaamba ayi kutanyonyoolwi maali kwiinda mukuulila pomwi shintu shiinji paciindi comwi kwiinda mbociba lyoonse. Misampi alimwi a Dipatimenti Ilanga Pamakani Akuula Shintu Nsengwe Yoonse bakabika bubambo bwakuula shintu kuswa kubeshikupanga, ico cakapa kwaamba ayi kube kushuula pamutengo ucipite akwaamba ayi shishike bwangu nkoshakalinga kuyandika.

“Kushitilishikwa Nkondakalinga Kuyandika”

Bubambo bwakushitilisha bwakabikwa mu Maanda Abwaami bwakayuminisha baabo bakacikonsha kutalika kusa mukubunganina pomwi. Nankashi waliina lya Dulcine waku Peru wakaamba ayi “wakaloonda” ndyaakashiba ayi tulaakutalika kuya ku Ŋanda ya Bwaami alimwi. Wakaamba ayi: “Ndakaciswa bulwashi bwa COVID-19 paciindi ndyebwakatalikabo, aboobo cankajuminaako kuya ku Ŋanda ya Bwaami, mukwiinga ndakalinga kuyeeya ayi inga ndaciswa alimwi. Sombi ndyendakashika pa Ŋanda ya Bwaami, ndakabona ayi bamanene bakacita shintu shiinji kwaamba ayi batushitilishe, mbuli kubika musamu wakucaya tulongolo, shakucatilako mamaikilofoni, alimwi abubaambo bwakubotesha Ŋanda ya Bwaami paciindi mabungano kaatana kutalika alimwi a pesule lya mabungano. Ishi shoonse shakaampa kulinyumfwa kushitilishikwa nkondakalinga kuyandika.”b

Nankashi wa liina lya Sara mu Zambia wakacana lipenshi lipuseneeko. Wakaamba ayi: “Peenda myeenshi ano kuswa ciindi beebaangu ndyebakafwa kubulwashi bwa COVID-19. Ndakalisukama pa mbweenga ndalinyumfwa kuya mukucanika kumabungano ciindi cakutaanguna kwakubula beebaangu.” Ino alalinyumfwa buyani pacecino ciindi kucanika kumabungano? Wakaamba ayi: “Kucitila mabungano pomwi ku Ŋanda ya Bwaami kwantondesha ayi Yehova ali andiswe munshiku shino shakweelaako. Pacecino ciindi kwiinda kale kale, ndalinyumfwa ayi ndatambula kuyuminishikwa, kutondeshekwa lusuno, alimwi akucafwikwa nkonjandika kuswa ku bamanene alimwi aku bamakwesu abenankashi bamwi boonse.”

Basebenshinyineesu nsengwe yoonse balalumba abuumbi pacoolwe cakutalika alimwi kubunganina ku Ŋanda ya Bwaami. Twalumba pa maali ngomupa, alimwi aanji akapekwa kwiinda mukusebensesha nshila shicanika pa donate.jw.org. Maali aya akapa kwaamba ayi tucikonshe kushinisha ayi Maanda Abwaami motubunganina mwabikwa shintu shiyandika kwaamba ayi tushitilishikwe.