Tukoci Twakubikawo Mabuku Tulasebenseshekwa Kupa ‘Bumboni Kubantu Boonse’

Kwa myaaka iindilila 10, tukoci twakubikawo mabuku twasebenseshekwa kushimikila makani abotu alimwi tulapa bantu kusuna kwiiya. Nsengwe yoonse, bantu balatubona tukoci utu alimwi balibeshi batusebensesha. Tukoci utu ntubotu abuumbi alimwi ncuubu kutusebensesha. Mpashi amwebo inga mwasumina shakaamba nankashi waku Poland wa liina lya Asenata uyo wakaamba ayi: “Nabi kwaamba ayi twakapangwa munshila yuubu, sombi tulaboneka kabotu abuumbi. Tatushuupi kusebensesha akukunkulusha.”

Sa mwakalipushawo kale mbotwakapangwa tukoci utu?

Twakapangwa Kabotu

Mu, 2001 bamu Likoto Litanjilila bakasuminisha bamakwesu abenankashi baku cishi ca France kweelesha kusebensesha nshila shipusene pusene shakushimikila kubantu baanji kwiilikaawo akusebensesha tukoci. Bakeelesha kupanga tukoci munshila shipusene pusene. Kucakubonenaako, bakalinga batupanga anga ntukoci twakunyamwitawo shoola na shintu kwaamba ayi kabashimikila akubikamo mabuku. Mukuya kwa ciindi, baku musampi waku France bakasala nshila yomwi bwakutupanga alimwi beshikushimikila balinga kutusebensesha kwa myaaka iinji.

Bamakwesu baku France bakasangalala abuumbi ceebo cakuya panembo kwa ncito yakushimikila mumisena mucanika bantu baanji. Aboobo mu 2011 bamu Likoto Litanjilila bakasuminisha bubambo bwakweelesha kushimikila mu tauni ya New York ku U.S.A kusebensesha tukoci a matebo. Bapainiya bakaabanamo lubasu muncito iyi yakushimikila bakabona ayi tukoci twakasebensa kabotu kwiilikaawo akutashupa kukunkulusha. Alimwi bapainiya bakaamba miyeeyo icafwa ya sheenga shacitwa kwaamba ayi tukoci tuboteleeko. Tukoci ntobakalinga kupanga kumatalikilo twakalinga kulema mukwiinga twakalinga twacisamu aboobo tecakalinga cuubu kutanta na kuseluka antuto mu masiteepu. Aboobo bakatalika kutupanga munshila yakwaamba ayi katutaleemi kunyamuna, sombi kuteshi tuubu cakwaamba ayi inga katuwa ku muuwo. Kwiilikaawo, tukoci utu twakapangwa munshila ipya, twalo tulicite mawilo anene alimwi ayumu calo cipa kwaamba ayi katutashuupi kukunkulusha munshila muli ma baampu. Kwiilikaawo, tulicite a kabokoshi kaniini mwakubika mabuku amwi.

Bubambo ubu bwakweelesha kushimikila kusebensesha tukoci bwakaswitilila! Aboobo mu 2012, bamu Likoto Litanjilila bakasuminisha kwaamba ayi bamakwesu abenankashi nsengwe yoonse batalike kusebensesha tukoci. Bamakwesu bakacana shikupanga uyo weenga wacikonsha kupanga tukoci tuunji kusebensesha shisebensesho shuubu sombi shiyumu.

Mukuya kwamyaka kwakaba kubambulula paniini bwakupanga tukoci. Kucakubonenaako, mu 2015 bakabikako twakufweka pakakoci tucite mapulasitiki atondesha shili mukakoci kwaamba ayi na kwesa mfula mabuku kaatalokwi. Ba Dina bakala ku Georgia bakalumba abuumbi pa bubaambo ubu. Baakamba ayi, “Cilibo anga kakoci kalicite likooti lyankako lya kushitilisha mabuku kumfula.” Mu 2017, shipampuleki shicite magineti shakatalika kupangwa mumishobo imwi. Mukwesu wa liina lya Tomasz waku Poland wakaamba ayi: “Yakalinga ncito inene abuumbi kwaalula shipampuleki shakalinga shakumatika. Aboobo muyeeyo wakupanga shipampuleki sha magineti ngubotu.” Mu 2019, kwakaba kwaaluka akumwi pa shisebensesho shakalinga kusebenseshekwa kupanga tukoci kwaamba ayi katukala kwa ciindi cilaamfu.

Kupanga Tukoci Twakubikawo Mabuku

Tukoci twakubikawo mabuku tulapangwa akampani yomwibo alimwi na twamana kupangwa tulatumwa ku mabungano nsengwe yoonse. Pacecino ciindi kakoci komwi kaloolwa amadola ashika ku 43, kutabelengelaako maali alipilwa kukanyamuna kuswa nkobatupangila alimwi ashimwi. Kushika pacecino ciindi, maali amadola eendilila 16 miliyoni akasebenseshekwa kuula tukoci. Alimwi tukoci twiindilila 420,000 twakatumwa kumabungano nsengwe yoonse.

Kwaamba ayi basebenseshe kabotu maali apekwa mukuliyandila baloola tukoci tuunji paciindi comwi. Kwiilikaawo, mabungano inga bawooda masupeya pati akubambisha tukoci na twafwa muciindi ca kuwooda tumwi.

Kushimikila Kwiinda Mukusebensesha Tukoci

Nsengwe yoonse beshikushimikila balasangalala kusebensesha tukoci. Ba Martina baku Ghana bakaamba ayi: “Nshila nshetusebensesha liinji kushimikila, tulashimikila bantu kwiinda mukubakonkela mumaanda abo. Sombi cinsangalasha abuumbi pakushimikila kusebensesha tukoci ncakwaamba ayi bantu mbobatukonkela. Kwiilikaawo, abantu batokwiindabo abalo balashimikilwa.”

Mucishi cimwi camu Africa, musankwa umwi wakashika pa kakoci akubwesa mabuku mumushobo wakwe. Ndyepakeendabo nsondo yomwi wakesa akwaamba ayi: “Ndakaabelenga mabuku oonse. Makani aliimo alayandika abuumbi. Alimwi ndakubalwiitaako abamumukwashi wangu na nkaboole kumushi.” Mushi wakalinga kulaale cakwaamba ayi pali mushinso ulaampa makilomita 500. Ndyepakeenda myeenshi yobilo wakesa alimwi akwaamba ayi: “Bantu mumushi winemisheesu bakaabelenga mabuku oonse, alimwi bakasangalala abuumbi amakani ngobakabelenga. Balisuni kuba Bakamboni bakwe Yehova. Sombi kuli miipusho imwi njebacite. Kucakubonenaako, balicishi ayi muntu kwaamba ayi abombekwe alyeelete kupila mumaanshi. Sombi kumushi kumisheesu taakuwo mulonga uli kufwiifwi. Sa tulyeelete kusa kokuno kwaamba ayi tukabombekwe?” Beshikushimikila bakamupa foni namba ya mukwesu painiya waamba mushobo winemishaabo. Kuswa ciindi ico, musankwa uyu wakatalika kwiiya Baibo amukwesu painiya.

Cilasangalasha kubona tukoci katusebenseshekwa kushimikila ‘mucishi coonse kwaamba ayi bube bumboni kubantu boonse.’ (Mateyo 24:14) Ino maali alaswa kuli akulipila kwaamba ayi tukoci tupangwe? Alaswa pa maali apekwa mukuliyandila kucafwilisha ncito ya nsengwe yoonse. Alimwi aanji alapekwa kwiinda mukusebensesha donate.jw.org. Twalumba abuumbi pa bwaabi bwanu.