Lidonki Lyakwe Balamu Lyakaamba

Bene Isilaeli bakalinga muluyanga myaaka pafwiifwi a 40. Bakakoma bantu baanji bakalinga mumisena iyumu. Ano ndyebakalinga muliwesa lya Moabu kwicwe lya Mulonga wa Joodani, bakalinga pafwiifwi akunjila Mucishi Cakashomeshekwa. Balaki, mwaami wa bene Moabu wakaloonda ayi batoosa mukumunyaya musena. Aboobo wakeeta musankwa waliina lya Balamu kusa ku Moabu mukushinganya bene Isilaeli.

Sombi Yehova wakaambila Balamu ayi: ‘Utashinganyi bene Isilaeli.’ Aboobo Balamu wakakaka kuya. Mwaami Balaki wakamwiita alimwi linkanda lyabili akushomesha kumupa cili coonse nceenga wasuna. Nacibi boobo Balamu wakakaka. Lyalo Lesa wakaamba ayi: ‘Inga waya sombi ulyeelete kuya mukwaamba nsheshi nkulwiite.’

Balamu wakatanta lidonki akuya ku Moabu. Wakalinga kusuni kuya mukushinganya bene Isilaeli, nabi kwaamba ayi Yehova wakamukasha. Munjelo wakwe Yehova wakabonekela munshila mankanda otatwe. Lidonki lyakamubona sombi Balamu taakalinga kumubonaawo. Pakutaanguna lidonki lyakaswa munshila akuya mumuunda. Lyalo lyakaya mukulishanikisha kulubumbu akushankanya mweendo wakwe Balamu kuli ndulo. Lyalo mukweelaako lidonki lyakoona panshi pakati ka nshila. Balamu wakalinga kulyuuma lidonki na lyaswa munshila.

Ndyaakalyuuma linkanda lyatatu, Yehova wakalipa nkusu shakwaamba. Lidonki lyakeepusha Balamu ayi: ‘Ino ndacita nshi ncemwangumina mankanda otatwe?’ Balamu wakakumbula ayi: ‘Mukwiinga waneenga buluya! Nakwiinga kaancite naifi, nindakucaya.’ Lidonki lyakaamba ayi: ‘Sa teshi ndime lidonki ndyemutantaawo mubuumi bwanu boonse? Sa ndakacitawo kale camushobo wooyu kuli ndimwe?’

Lyalo Yehova wakalengesha Balamu kubona munjelo. Munjelo wakaamba ayi: ‘Yehova wakakukasha kushinganya bene Isilaeli.’ Balamu wakaamba ayi: ‘Ndabiisha. Ntoobolelaamo kumisheesu.’ Sombi munjelo wakaamba ayi: ‘Inga waya ku Moabu, sombi ulyeelete kuya mukwaambabo maswi Yehova ngeshi akakulwiite.’

Sa Balamu wakeeyawo pashakacitika? Sobwe. Pesule lya sheeshi, Balamu wakeelesha kushinganya bene Isilaeli mankanda otatwe, sombi Yehova wakamulengesha kubapa shoolwe mankanda otatwe. Lyalo mukuya kwaciindi, bene Isilaeli bakalwana bene Moabu, alimwi Balamu wakacaikwa. Nakwiinga Balamu wakanyumfwila Yehova nshaakamulwiita nakwiinga taakwe kufwa.